CLICK HERE FOR BLOGGER TEMPLATES AND MYSPACE LAYOUTS »

Thursday 19 February 2009

انا مش لوحدي انا معايا


انا مش وحيد انا معايا وده بالنسبالي كفايه..استنوا ده مش جنان ولا لسعان تفكير..ولا تخاريف ليليه ولا خاني التعبير..انا قاصد كل كلمه في العنوان.. و هتفهموا كويس ان ده مش جنان..شعوري بالوحده مبقاش موجود.. لاني عرفت السكه وعديت الحدود..حدود اليأس والحزن والحيره... و اسوار الكأبه والحقد والغيره..لقيت اللي كنت عاوزه في صديق ..او صاحب او رفيق طريق..بس لقيته معايا زي م العنوان بيقول..وهقولكم ازاي علي طول
دورت جوايا علي الشخص المدفون ..اللي معظم الناس بتفتكره الجنون.. الشخص اللي مستني دايما علي الباب ..ومعظم الناس بتسميه اكتئاب..وقعدت معاه قدام المرايا ..نتكلم ونحكي لبعض الحكايه..حكايه ابتدت زمان ..لما لقيت نفسي لوحدي وسط عالم بالناس مليان ..وبرغم ان ليا اصحاب كتير الا ان شعوري بالوحده كان شعور كبير..وكنت ارجع في نهايه يومي.. احاول اشكي همومي ..بس اشكيها لمين ..بشكيها لرب العالمين ...اصل صوحابي مش موجودين !!.وفي يوم...قومت ووقفت قدام مرايتي..وبصيت فيها لصورتي.. و علي الشخص اللي جواها زعقت وقولت.. انت ياللي جوه اطلعلي براها حالاو دلوقت..لكن خيمت عليا حاله من السكون والصمت.. بعديها بشويه انا اتحركت .. بس مكنتش انا ده كان هو .. بيتحرك في المرايا من جوه..ونفض من علي نفسه تراب النسيان ..وقالي اهلا فينك ؟؟ ده انا مستنيك من زمان..يااااااااااااااه اخيرا افتكرت.. ده انا قولت انك علي صوحباك اقتصرت .. ونسيتني ونسيت اني معاك..وانا منك وجواك ..بصراحه انا منه اتكسفت .. و فعلا بغلطتي اعترفت ..قالي ها مالك يا سيدي عاوز ايه ؟؟..رديت مفيش مجرد شعور بالوحده مقدرش عليه ..كنت محتاج حد اتكلم معاه .. وانا اهو معاك قول علي اللي في قلبك وجواه.. وهتلاقيني دايما بسمعلك ونتكلم... ونتخانق ونجادل ونتعلم ..بس الناس هتفتكرني كده مجنون .. وايه الي في حياتنا مش جنون..بص حواليك و قولي علي اللي بتشوفه ..كدب وخداع و زيف حوالينا بيطوفوا..مشاعر كدابه وتمثيل ..وصعب تلاقي شخص اصيل .. بيني وبينكم انا اقتنعت بكلامه..اصله طول عمره حكيم و اللي في قلبه علي لسانه ..لا عمره كدب عليا ولا حتي جاملني ...ودايما بيقومني ومستحملني..مش مخادع و مصلحجي ..ولا بيفشي اسراري وعامل صاحبي..بيكشفلي عيوبي ويقولهالي ..و يفهمني حاجات مش علي بالي..يعني من الاخر انسان واضح و شفاف..مبنزعلش من بعض حتي لو كنا علي خلاف ..انسان دايما معايا صريح ..ومعظم كلامه بيطلع صحيح..كنت نسيته زمان ومصاحبتوش..لكن بعد كده احساس الوحده محستهوش..جايز يكون كلامي مجنون..وجايز جوه كل واحد منا فعلا انسان مدفون ..المهم انك تدور عليه وتلاقيه ..ولو لقيته امسك فيه ..لان هو اصدق انسان اليك..وبيقولك اللي ليك واللي عليك..
واليوم الي هتلاقي نفسك بقيت معاك ..الوحده هتتشال من جواك
:)

Wednesday 11 February 2009

بكلمة منك

ازيكم يا احلي مدونين معلش بقالي فتره مكتبتش حاجة جديده وكله بسبب العسكريه اللي بخدها وخلاص فاضل فيها يوم وربنا يعديها علي خير
كنت طبعا متوقف عن التدوين عشان مش بس بسبب العسكريه لا لان كمان مفيش حاجة بصراحه في دماغي او حاجة تشدني عشان اكتب عنها
لكن النهارده حصلت مفارقه هحكيلكم عليها كمان شويه
البوست عنوانه مبهم حبتين تلاته ؟؟ عادي اتعودتوا مني علي كده
علي فكره هو مش علي اغنيه شيرين عشان فكركم ميروحش بعيد
انا قصدي بكلمه منك ممكن تعمل كتير
بكمله منك ممكن تبني وممكن تهد
ممكن تفتح طرق وممكن تسد
بكلمه منك تدي امل وشعاع نور
او تزرع يأس وتسيب انسان مكسور
معلش البوست هياخد شويه رتم حزن او كأبه بس مش ده مضمونه او جايز عشان عاوز اوصل فكره فيه
كل يوم في حياتنا بنتكلم كلام كتييييييييير كلام مهم ومش مهم هزار جد تهييس وغيره وغيره وغيره وساعات كتير مبنبقاش واخدين بالنا بنقول ايه بالظبط او بتخرج منا كلمه مش في مكانها او مش قاصدينها و بتبقي نابعه من عفويه او من تربيه وثقافه فرضت علينا الاسلوب والكلام او بتبقي خارجه كده وخلاص زي البتاعه مش عارفه رايحه فين وتروح لابسه في وشك
عادي جدا بتحصل كتير ايه المشكله؟؟
المشكله انك وانت كده بتتكلم احيانا مبتبقاش واخد بالك من الانطباع اللي ممكن كلمه من كلامك تسيبه في اللي قدامك
ممكن في وسط الحوار كلمه منك تحل مشكله عند انسان او تديله امل او تفاؤل او تكسره و تسد في وشه طرق كتير
معاكم ان الانسان لازم يعتمد علي نفسه وعزيمته وميسبش نفسه للاحاديث الجانبيه و قعده القهاوي ولا كلام الناس ياثر فيه
صح جدا رايكم ده بس لما يكون الكلام من حد تحس فيه بالخبره و ممكن كنت مستني منه كلمه ترفع من روحك وتشد علي نفسك ويحصل العكس بتنهار
مش بتحصل ؟؟ اكيد اه
هقولكم علي المفارقه اللي حصلت عشان تفهموا قصدي كويس
النهارده روحت مع والدي المستشفي كنا بنغير علي الجرح و هناك قابلت الدكتور اللي عمله العمليه وبعدين بتعرف عليه و بعدين بيقولي انت سنه كام فبقوله النهائي بكالريوس خلاص بيقولي طيب ترتيبك؟؟
بقوله متاخر شويه يعني 400 وشويه لقيته بيقولي
يا ستار يارب ليه كده ؟؟؟ انا حسيت اني مثلا بلغته خبر وفاه حد يعرفه
قولتله يلا النصيب يا دكتور
رد عليا وقالي طيب دخلت طب ليه مدام مش هتطلع من الاوائل او مش ناوي علي نيابه في الكليه اصل كده خلاص ملهاش لازمه
خلاص ؟؟؟ مع تعبير تتنيح فظيع
ليه بس؟
بيقولي اصل هما بياخدوا في النيابات 100
قولتله م انا لو كنت مرتب يا دكتور ممكن متجليش النيابه اللي عاوزها و خاصه اني عاوز جراحه زي حضرتك
رد عليا وقالي وليه م انا كنت 7 علي الدفعه و كان قدامي تخصصات كتير وانا اخترت
يعني مش بس عاوزني ارتب في ال100 لا كمان عاوزني ارتب في 10 الاوائل عشان اختار التخصص اللي عاوزه
بصراحه كلمته وجعت شويه وخصوصا انه استاذ عندي في الكليه
و لاني عاوز تخصص جراحه زيه
بس م اثنتنيش عن حلمي ولا سدت في وشي طريق
طول الطريق وانا راجع مش بفكر في كلامه ولا ان خلاص كده الطريق اتسد وبتاع و لا غيره لا انا خدت كلامه من ودن وخرج من ودن التانيه
مش كل اللي اتعين في الجامعه بقي كويس ومش كل الدكاتره المشهورين اساتذه ولا كانوا مرتبين والمهم الخبره والشطاره
بس كنت بفكر في ان لو حد مكاني وسمع كده منه
هيتحطم ويكتئب
صح ولا لا ؟؟
بعد لما كان راسم لنفسه طريق وهيمشي عليه و يعمل ويجتهد و يجي دكتور استاذ كبير و في نفس التخصص اللي انت عاوزه ويقولك انت دخلت ليه طب مدام مش ناوي ترتب من ال100 الاوائل
طيب و 1600 التانيين دول ايه هيصيعوا ؟ فشله ؟
بجد قولت الحمد لله انها جات فيا مش حد تاني
لاني الحمد لله مبسمعش للكلام واللي في دماغي في دماغي بس افتكر واحد صاحبي لو سمع كلمه زي دي ممكن يحصله حاجة
مش متخيلين كلمه في وسط الكلام ممكن تعمل ايه في انسان يكون عنده حلم وعزيمه يحققه و بيسال اهل خبره عشان يساعدوه يلاقيهم بيقولوا لا خلاص
خلاص؟؟ يعني ايه ؟؟ امتي نقول خلاص ومين اللي بيحدد ؟؟ انت ولا انا ؟؟ لا طول م جوايا عزيمه واراده وفيا نفس مش خلاص
خلاص دي لما اقولها ابقي بقيت انسان ياس محبط محطم
عارفين لما تلاقي انسان زعلان وحزين ممكن بكلمه منك تزيح حزنه ده وممكن بكلمه تانيه تزوده
بكلمه ممكن بدل م تزرع في نفس انسان ياس وترسم طريق نهايه
تزرع امل و تمهد طريق البدايه

انا بجد مش عارف قصدي وصل ولا لا بس ياريت ناخد بالنا من كلامنا مع الناس ونشوف رايح ازاي
مش هيكلفك حاجة لما تقول لانسان كلمه كويسه ولو حتي مش صحيحه بس اهو بتديله امل و تشيل عنه كتير وجايز يتحقق اللي عاوزه

لكن حرام لما تقول كلمه احباط لبني ادم ممكن يكون جواه انه يعمل كتير و تيجي انت بكلمه تهدم كل ده

في الاول والاخر عزيمتك وعقلك سلاحك ومتسمعش للكلام وخلي طريقك قدام عنيك وسيبك من غربان ولا وحوش الليل اللي بتظهر عشان تبعدك عنه
مدام شايف نور ولو حتي بسيط يبقي فيه قمر ومدام القمر منور يبقي الامل موجود

:D



Monday 2 February 2009

حركات مستفزه


ازيكم يا مدوانين ؟
اول تدوينه بعد دخولي التربيه العسكريه وكان لازم افضي بقي الاحساس ده دلوقتي عشان من الصبح اللي حصل النهارده حارق دمي بشكل وحش
المهم
صاحي الساعه 5 ونص الصبح عشان اروح العسكريه و بعدين اتوضيت وصليت الفجر و كويت اللبس الغريب اللي بنلبسه القميص اللبني و البنطلون الجينز ولبست ونزلت من البيت علي الساعه 6 وشويه والمفروض اني اكون هناك علي 7 ونص عشان ناخد التمام
نازل في امان الله و بعدين ابص الاقي واحد من سكان العماره واقف بره البوابه و بيقولي ده استاذ فلان كسر مفتاحه في بوابه الشارع بعد لما قفلها و سلم عليا ومشي!!!

حركه قمه الاستفزاز بصراحه
يعني ايه قفل الباب و كسر المفتاح ومشي و ساب الناس بقي تولع و تتاخر عن مواعيدها
وبعدين مش عارف يقفل الباب والكالون معلق خلاص فيه ترباس اقفله و امشي لكن اللي يغيظك اكتر ان المفتاح مكسور عشان كان عاوز يقفل التكه التانيه في اللسان يعني مش تكه واحده يعني دمك يتحرق اكتر واكتر كل لما تعرف ده

طبعا طلعت في الاسانسير جررررررررررري علي الشقه و جبت كماشه وادتها للراجل بره
وعمال يحاول ويحاول و انا احاول و مش راضي المفتاح المكسور يخرج اصل الاستاذ كسره و هو مش علي عدله لا وهو معوج كمان و ترس الكالون
قعدت حوالي نص ساعه في الموضوع ده والساعه بقت حوالي 7 الا 10 و بعدين سكان العماره نزلوا واحد واحد عشان يروحوا الشغل 
و طبعا كلنا متعطلين عشان البوابه المقفوله و اللي مينفعش فيها لا تكسير ولا اي حاجة عشان حديد
واللي غايظني اكتر ان كل العماره عرفت دلوقتي اني عندي عسكريه واتفرجت عليا الصبح
عااااااااااااااااااااااااااااااااااااااااااااااااااا :(
فين وفين لحد لما عرفنا نخرج المفتاح و قدرنا نفتح البوابه كانت الساعه بقت 7 وخمسه
و جري علي محطه المترو و ركبت المترو
ويجي المترو ماشي بسلام لحد محطه كوبري القبه و هوب يقف حبه و يقعد يفتح في الباب ويقفل 
طيب انا عاوز انزل منشيه الصدر يعني مش عارف يقف في المحطه دي براحته دي محطه واحده يا جدعااااااااااااااااااااااااااااااان ولو اتاخرت اليوم هيروح عليا و يمكن العسكريه كلها
وبعدين في الاخر اتحرك و نزلت المحطه المنشوده وهناك الاقي كل الاتوبيسات رايحه في حته الا عبده باشا وكليه الهندسه 
قولت اخد تاكسي في السريع
لقيت تاكسي واقف بقوله عبده باشا يا اسطي قالي لا 
طيب انت واقف ليه هنا اصلا ؟؟ وبعدين لا ليه انت نازل من بيتكوا تتفسح في العربيه يعني ؟؟ عالم مستفزه 
قولت امري لله اقف استني وخلاص فاضل بتاع 5 دقايق علي طابور الجمع بتاع العسكريه
لحد م لقيت واحد جاي بيقولي رايح عبده باشا قولتله اه قالي اركب التاكسي اللي قدام ده بتاعي
اتاريه سواق كان واقف وسمع انا بقول للسواق الاولاني رايح فين و ربنا يكرمه راح تعطف عليا وركبني 
وبيقولي انا مش عارف بيقولك لا ليه مش ده رزق وجايله المفروض ياخده ميرفضوش دي ساعه استفتاح 
وسالني هو يا باشمهندس مش هندسه اجازه ؟؟قولتله اه بس طب بياخدوا العسكريه هناك
كتر خيره الراجل وده يمكن الحاجة الكويسه اللي حصلت الصبح وصلني في المعاد بالظبط وقضينا اليوم في محاضرات عن ازاي نعرف الشمال و تعريف الهضبه والتبه و مساحه مصر و منخفض القطاره و بحيره ناصر وحاجات كده بتاعت الدراساات الاجتماعيه في ابتدائي
وعدي اليوم علي خير وسلام  
اللي مستفز في كل ده ان فيه ناس مبتراعيش شعور اللي حواليها ولا بتاخد بالها وهمها نفسها بس مش مهم الناس اللي وراها دي في ضيق ولا شده
زي اللي كسر المفتاح و مشي و نسي ان فيه ناس ممكن تكون متعطله
و زي سواق التاكسي اللي مش هامه الناس المتاخره دي وواقف مستني مشوار قريب لحد الجامعه مش عبده باشا عشان يرجع يحمل تاني و تالت ورابع

يلا ربنا يهدي الجميع ومعلش صدعتكم بس عشان دمي كان محروق الصبح و كنت عاوز ارجع والع في العماره بحالها بسبب الموقف ده 

يلا سلام واشوفكم بعد العسكريه :D