CLICK HERE FOR BLOGGER TEMPLATES AND MYSPACE LAYOUTS »

Sunday 18 October 2009

عواجيز في العشرين

ايه رايكم؟
في ايه ياعم انت ؟؟
في العنوان
اصل شباب اليومين دول عجزوا بدري بدري وهما لسه يدوب في العشرين يعني تحس كده انهم مش عاوزين يتعبوا وبيرهقوا بسرعه مع اقل مجهود ومأنتخين كده وعاوزين الفلوس علي الجاهز من غير تعب ولا مجهود
بيحلم بالثروه والشقه والعربيه والعروسه وكل ده عاوزه بسرعه وعلي الجاهز ومش عاوزين يتعبوا
طيب يبصوا لاهلينا عملوا ايه وكونوا نفسهم ازاي وبنوا حياتهم ازاي ياخي دي الحياه مش بتتاخد قفش ولا في يوم وليله فيها ايه لما تتبهدلوا شويه عشان تعملوا نفسكم ولا هو خلاص مش فالحين الشباب غير في النت والدش والروشنه و خلاص

ده مش رأيي عشان محدش يدخل يشتمني ويقولي انت بتخرف ده راي ناس كتير وان كان اغلبهم من النساء في شباب اليومين دول
بيتهموهم بالاتهامات اللي فوق دي بجانب المقولة الشهيره
ان الرجاله ماتوا في 73
متهيالي الجيل اللي طالع بيقي يعرف حرب اكتوبر من المقوله دي الاول وبعدين يسال هي ايه حرب 73
انا مش هنكر ان الكلام اللي فوق فيه جزء من الحقيقه

ولكن
القضيه غير مكتملة الاركان والدليل ليس كافي ووكيل النيابة كالعاده قايم بيطالب باقصي العقوبه علي المتهم من غير ما يسمع دفاع
والحكم مش عادل المرادي
الشباب مش كده اللي الحكم ده او الراي ده اتقال عليهم فئه موجوده في المجتمع وبين الشباب ولكن ليس كل الشباب لسه فيه الشباب الكويس الخلوق الطموح اللي بيسعي بكل جهده ليحقق مراده ويحقق احلامه وبيبذل كل مجهود في سبيل ده
لسه فيه الشباب اللي بيخاف علي بنات منطقته وجواه المرؤة والشهامه
لسه فيه الشباب المتدين الصالح صاحب الفكر العالي والاسلوب المتحضر
لسه فيه شباب بيراعي ربنا في دنيته ودينه وناسه واهله
لسه فيه الشباب اللي زي اللي ماتوا في 73 بل افضل
ايام 73 وبرغم حال البلد وما بعد النكسه وغيرها الا ان لو قارنا بينهم
الشباب اللي ماتوا في 73 هدفهم كان واحد تحرير بلادهم بيحاربوا عدو واحد هو السبب في حال بلدهم سواء من حاله اقتصاديه ولا سياسيه ولا غيره بيحاولوا يهزموه عشان يعلوا وينهضوا ببلادهم كان ده الفكر السائد علي حياتهم
لكن هنا شبابنا دلوقت مش عارف اساسا عدوه مين
وهو في الاصل مش عدو واحد دول كتير
هيحارب مين ولا مين
البطالة ولا الاسعار ولا الفساد ولا الفكر اللي بيجي من بره عشان يفسده ويلهيه ولا التعليم ولا ولا ولا
الشاب في الزمن ده محاط بجيش من الاعداء بيحاول يهزمهم ويتغلب عليهم علي قد م يقدرو هدفه مش انه ينتصر عليهم لا انه بس يقدر يقف قدامهم ويصد عدوانهم مش يستسلم ليهم
مش ينهزم ويداس عليه ويبقي راح في الرجلين واصبح مجرد شبح او مجرد شخص ملوش لزووم

القاضي اللي اصدر الحكم اللي فوق محطش كل ده في الحسبان عمل مقارنه سريعه بين حال الشباب دلوقت في ايامنا دي وحالهم زمان
ونسي ان الحال غير الحال والزمان غير الزمان والظروف غير الظروف
انا عارف ان فيه كتير وكتير وكتير وكتير من الشباب دماغه خلاص ضربت وضاعت وفكره مبقاش شغال وبقي كسلان
انا شاب ومش هنكر ده
بس مش بالصوره اللي انا بسمعها ولا بقرأ عنها حرام الحكم ده يصدر بالصوره دي من غير تفكير

هو حقيقي العنوان صحيح
حقيقي ان الشباب عجز في العشرين وبقي زيه زي واحد في الخمسين من بتوع زمان لكن مش بسبب كسل وانتخه ولا تواكل
بسبب ظروف حياه عايشين فيها ودنيا غير الدنيا عاوزين شاب شايف من حواليه فضائيات بتعرض تفاهات وجامعات بتعلم اي كلام وفكر جايله من بره عاوز يدمر عقله وبلد كل حاجة فيها بتلغي الا البني ادم هو اللي بيرخص و غيره وغيره زي ما انتوا عارفين وشايفين
وفي زحمه كل ده مطلوب منه يحافظ علي كيانه واسلوبه واخلاقه ودينه وتربيته و يكون نفسه ولو فكر في الارتباط يعيش الانسانه اللي هيرتبط بيها عيشه كريمه ويقدر علي متطلبات الحياه
كل ده ومش عاوزينه يعجز بدري بدري طيب ازاي؟
لازم يعجز في العشرين ده بيحارب اكتر واعنف من اللي كانوا في تلاته وسبعين

مش هطول عليكم
بس عذرا ياساده الحكم غير عادل وعشان انا شاب انا بطعن فيه
فكروا شويه بجديه وبعمق ومن كل الجوانب
وبعدين

اصدروا الاحكام

سلام :)


Wednesday 14 October 2009

كان ليه حلم


زيه زي اي شاب ..شاب عادي ...زيي وزيك.. انسان زي اي انسان بسيط ليه حلمه الي بيسعي وراه ونفسه يحققه
بيدرس عشان يحقق حلمه ومنتظر الوقت اللي يتخرج فيه عشان يبدا في تحقيقه
بيحلم بالراحه والاستقرار ..بيحلم بالزوجه والبيت والاولاد ..بيحلم بالحياه الجميله السعيده
بيحلم بالكتير والكتير واهي احلام وامنيات عايشين عليها و ليها و بنجري في دنيتنا عشان نحققها احلام بتبقي لينا الامل الي بيدينا القوه والاراده انا نصبر علي دنيتا

لكن هو القدر م امهلهوش يحقق احلامه .. توفاه ربه الرحيم
وكل اللي بيحلم بيه متحققش

تاني انسان اعرفه يتوفي بنفس الطريقه وفي السن ده
وكل مره اقف وقفه اكبر من اللي قبليها واصرخ باعلي صوت وازعق واقول ياااااااااااااااااااااا الله يا ارحم الراحمين دلني علي طريق الهدايه و نور لي بصيرتي واعني علي طاعتك وحسن عبادتك واغفر لي خطاياي وتوفني وانت راض عني

انسان عادي زيي بيدرس اكيد كان ليه حلمه اللي نفسه يحققه في لحظه وفجأه اكتشف انه عنده سرطان في الدم وشهر والتاني و توفي
مخدش حاجة معاه
مش هينفعه غير عمله الصالح و الكلمه الطيبه اللي كان بيقولها
بجد كل يوم بيرسخ في ذهني الجمله اللي اتقالتي يا بني الدنيا اكتر كتير من درجه في امتحان ولا بنت حلوه تتجوزها ولا عربيه تركبها ولا مركز اجتماعي و لا ولا
الدنيا اختبار و مرحله لحياه بعديها كل اللي فيها فان وفي لحظه بيروح
بجد من بعد لما بقعد افكر في الكلمه دي بحس فعلا اننا بنموت نفسنا وبنحرق دمنا ونضيع عمرنا علي كلام ملوش لازمه وناسين نفسنا
بستغرب من اللي بيعيط عشان ضاع منه درجات في امتحان ولا اتصدم في قصه حب ومش بيعيط عشان ناسي نفسه وربه وبيجري ورا الفلوس ولا اللي وخداه تلاهي الدنيا و عايش في الاوهام ولا ولا ولا امثله كتير وكتير واحنا منهم ماشين وناسيين ان في لحظه ممكن نموت في لحظه كل اللي بنرتبله يضيع واننا مرتبناش لاهم حاجة
اخرتنا
عملنالها ايه ؟؟
جبت امتياز في الكليه ؟؟؟ طظ
اتجوزت اجمل نساء الدنيا؟؟طظ
بقيت رئيس الجمهوريه؟ طظ
المهم عملت ايه للاخره
مفيش
من زمان فيه مقوله بحبها قوي بتقول
من اراد واعظا فالموت يكفيه
وانا اخترت اسمي ديد عشان تبقي دايما قدامي ومش هغيره عشان دايما افتكر الجمله دي

ياريت بجد نفوق شويه
دول لا هيبقي اول ناس راحوا ولا حتي الاخرين دول عظه للحاضرين

انا لله وانا اليه راجعون

ربنا يرحمك يا محمد انت وادم ويدخلكم جناته

:(((

Wednesday 7 October 2009

اي كلام وخلاص


بقالي فتره كبيره مش بكتب حاجة هنا و كمان لما بكتب بتبقي حاجات عادية وتهاني وخلاص
الحقيقة اني مش عارف اصلا افكر زي زمان ولا اكتب زي الاول
تفكيري بقي عادي جدا مبيتعداش احداث اليوم الروتينيه اللي بتمر عادي زيها زي اي احداث عند اي شخص مبقتش افكر في اللي حواليا زي زمان ولا بقيت احلل الامور واخرج منها بكذا فكره وكذا حاجة
حتي الجادوفرينيا او الشخص التاني مش لاقيه
دورت عليه كتير ولكنه مش موجود معايا وكأنه رجع لمرايته من تاني و سكن جواها وسابني بقيت اروح اطفي نور الاوضه وافتح الشباك بالليل واقف فيه منتظره يخرجلي مصحوب بموسيقي تصويريه زي بتاعت فيلم اسف للازعاج ولكن برضه مبيخرجش
عشان انا نفسي مخي مبقاش يفكر كتير ويسأل ويستفسر زي الاول
معقول اكون خفيت ؟؟؟
اه اصل انا كنت بعتقد اللي عندي وتفكيري الزايد ضرب من الجنون وناس كانت بتقول اني بصعب الامور وبكلكع الدنيا واني مبخدش الحاجة زي م هي من شكلها لا لازم افصصها
علي فكره علي قد م ان اللي انا فيه حاليا مضايقني لانه سحب مني قدرتي علي التعبير والكتابه هنا علي قد م انا مرتاح ان دماغي بقت ثابته ومستقره
حتي حياتي نفسها مبقتش زي الاول او انا اللي حاسس انها كده
حاسس انها فيها حاجات اتغيرت واهتمامات اتبدلت
تستغربوا لو قولتلكم مبقتش فعلا ازعل علي حاجة زي الاول ؟؟ ولا اضايق روحي واقعد اعيط ليها واشتكي زي زمان ويمكن ده احد اسباب اختفاء الجادوفرينيا
اصل فعلا مفيش حاجة مستاهله نضيع ايام وشهور في البكاء عليها
حاجات قليله قوي قوي في حياتنا وان كانت تبدو كتيره هي اللي تستاهل يتبكي عليها بجد
حاسس ان الدنيا حلوه قوي بس احنا اللي بنصعبها وبقيت ابص لنص الكوبايه المليان بس برضه مبنساش اشوف الجزء الفاضي منها عشان مبقاش عايش في دنيا الاحلام الورديه والنظره الحالمه العابره للواقع الاقرب للمستحيل
ناس كتير بقت تتهمني بالتشاؤم وانا بستغرب جدا دلوقت لده لاني الفتره دي متفائل جدااااااااااااااااا بس عشان لما بيتكلموا معايا بيلاقوني بفكر لكل خطوه بمشيها وبحسبها وهما يقعدوا يقولولي يابني بطل مش كده الدنيا مش بتتاخد كده وانا معاهم بس بحب اكون منظم وعارف هعمل ايه حتي لو جد في الامور امور واتلخبط كل ترتيبي لكن علي الاقل ابقي راسم طريق ولو في مخيلتي

انا عشان اكتب البوست ده عمال امسح واكتب فيه بشكل كبير وده عمره م حصل وانا بدون
علي طول بدون علي البلوج علي طول مش بكتب البوست بره وانقله دلوقت بكتب وبمسح ولا كاني بكتب موضوع تعبير عاوز احسن صياغته للناس او كاني اول مره ادون هنا

كالعاده طبعا هتقولوا علي كلامي اي كلام
بس متنسوش اسم المدونه ايه

اهو اي كلام :D
سلام
:)