اهو اي كلام

كل سنة وانتوا طيبين ورمضان كريم

2011-08-01T17:08:00.004+03:00

اللهم امييين

كيان

2011-07-18T23:36:00.004+03:00

فييوم خدني الحنين والذكريات..

وقعدتافتكر كل اللي فات..

ووقفت علي شط احزاني ..

ابصواعيد ذكرياتي من تاني.

.لقيتني قبلك كنت غريق..

.كنت وحدي من غير صديق..

كنت تايه وسط عتمة الطريق

منغير امل.. من غير حياه..

وكانضياعي محتمل..

ويأسيوصل لمنتهاه..

لقيتكفجأه انتي الامل .

وكنتيليا طوق النجاه

.عرفتمنك معني الحياه..

وبحبك محيتي احزاني

ورجعتيضي حياتي من تاني

وبقيتيبالنسبالي كيان

كيانمليان حب وحنان

وضحكوطيبه

غريبه..!!!

اني معاكي بنسي الدنيا

بنسياسمي بنسي نفسي

بحس اني في دنيا تانيه

دنيافيها الساعات والدقايق بتبقي ثانيه

ثانيهفي بعادك حبيبتي مش بس ثانيه

ديسنين تعدي في شوق ونار

وتعبحبيبتي من الانتظار

وايامتعدي ليالي ..من غير نهار

لويوم مسمعتش فيها ضحكتك

ولاشوفت فيها بسمتك

لانكانتي شمس النهار

ومنغيرك كياني يبقي انهيار

To My Fiance
:)

ولا حلم نابت في الخلا

2011-04-22T16:00:00.003+03:00

ولو ف يوم راح تنكسر لازم تقوم واقف كما النخل باصص للسما للسما ولا انهزام ولا انكسار ولا خوف ولا ولا حلم نابت ف الخلا
ف الخلا

One shot

2011-04-20T02:32:00.000+03:00

Look, if you had one shot, or one opportunity
To seize everything you ever wanted-One moment
Would you capture it or just let it slip?

This may be the only opportunity that you got

مش مهم

2011-04-19T23:09:00.000+03:00

مش مهم النتيجة ايه ؟؟

نجحت سقطت كله بايد ربنا

المهم اني دلوقت مرتااااااااااااااااااح قوي وبالي هادي

والاهم انك انتي موجوده معايا وحققت جزء من حلمي

ربنا يخليكي ليا يارب

عكس التيار

2011-04-17T03:53:00.001+03:00

لما تحس انك في حياتك ماشي عكس التيار وان الناس بتصف تصرفاتك بالغرابه و بعدم الترتيب والتنظيم ولما تحس من جواك ويتخللك مشاعر انك فعلا زي م هما بيقولوا بتلاقي نفسك فجاه وقفت مكانك وتعبت و مش قادر تكمل

لما تقف تفكر شويه في كلامهم ولما تبص تلاقي ان تصرفاتك دي عاديه مش حاجات غريبه ولا شق من شقوق الجنون ولا درب من الخيالات والخزبعلات اللي انت ماشي وراها

لما تلاقي شخص واحد بس بيسقفلك ويقولك برافوا كمل ها يلا قربت هااااااااااااانت بتسال نفسك ياتري الشخص ده فعلا واثق في تصرفاتك ومقتنع بيها وشايف ان التيار اللي انت بتمشي عكسه تيار وهمي من نسيج الناس وانت اللي صح ؟؟

ولا بس مش راضي يكسر جواك العزيمه ولا يصدمك بالمفاجاه الموجعه انك فعلا غلط وبيقول خليه يمكن وجايز!

مش غلط ان من البدايه نمشي عكس التيار مدام مش بنمشي غلط مدام مش واخدين طريق غلط مش لازم نكون كلنا زي القطيع ماشيين في سكه واحده ومش دايما كل من انشق عن القطيع كله الديب

فيها ايه لما تكون عاوز كل حاجة في نفس الوقت؟

صحيح محدش بياخد كل حاجة بس فيها ايه لما تحاول

هتخسر؟ هتضيع منك كل حاجة؟

لا هتطول بلح الشام ولا عنب اليمن زي م بيقولوا ولا هتبقي زي اللي رقصت علي السلم لا التحت سمعوها ولا اللي فوق شفوها؟ زي م بيقولوا؟

ولازم تركز في حاجة حاجة ولازم تخلص حاجة وتبص علي اللي بعديها ياعم ده ربنا خلق الدنيا في 6 ايام انت عاوز كل حاجة مع بعض؟

كلام سليم انا مقولتش حاجة تركز في حاجة حاجة وتعمل اللي عليك عشان تتقدم للي بعديها

بس فيها ايه يعني لما تركز في كل حاجة؟!

مش هتعرف

ليه؟ هو صعب؟

اه صاحب بالين كداب وصاحب تلاته منافق

لا مش صعب فيها ايه لما تكون بتركز في كل حاجة مع بعض ومش كل حاجة فيها ايه انك بدل م تعمل حاجة واحده بس تعمل 3 وتركز فيهم هو صعب هو غلط

ليه غالبا بيتحكم علي اللي بيمشي في السكه دي انه مستعجل وعاوز كل حاجة وليه دايما بيلاقي احباطات وليه دايما بيلاقي ناس تكسر المقاديف او تقطع زعانفه عشان فكر انه يتعب شويه وينول كل حاجة مع بعض

وانا مبقولش كل حاجة انا بقول كام حاجة واحنا في عصر التخاذل فيه مينفعش لازم تجتهد ليه بقي لازم اكون زي باقي القطيع ماشي معاهم ومستني اشوف هنقف فين ليه مقررش انا هاخد اي طريق ليه مكونش انا الطريق

نظره الناس مش دايما صح ومش حتي الاغلبيه لو اتفقت انك غلط تبقي فعلا غلط فيه معتقدات كتير راسخه عند الناس مش قابلين انها تتغير والناس اكتشفت ده بعد الثوره عمر م كان حد متخيل اللي يحصل واهو حصل وكله لو كنت كلمته قبليها فيها كان هيقولك ياعم بطل هبل لكن حصل

انا مبستعجلش الامور انا مش منافق ولا كداب انا بحلم حلم علي قدي واقدر عليه محتاج توفيق بس من ربنا فيه وشويه صبر متحاولوش تحسسوني اني ماشي في طريق سد او ضلمه هتكعبل فيه وهقع علي وشي واتعور حتي لو ضلمه حسسوني ان ممكن اتكعبل واتخبط شويه لكن هوصل مش هقع بلاش التشاؤم اللي بيوصلني منكم حاولوا تحسسوني اني مش غريب ده حلم حلم مش بحلم ان يطلعلي جنحين واطير بيهم فوق السحاب ومش بحلم اني امد ايدي امسك النجوم انا بحلم حلم عادي علي قدي

صعب؟ مش مهم وايه يعني؟ لكن مش مستحيل ولو حتي في نظركم مستحيل وهياخد مش شهور سنييييين وايه يعني بدل م ياخد 10 ياخد 5 بدل م ياخد 5 ياخد تلاته

نظرتكم دي بتتعب وتفكيركم ده بيخلي الخوف والقلق يتسلل جوايا وده بيضعفني مش بيقوني بيشككني في قراري حتي ولو كان الشخص اللي واقف بيسقفلي من علي الشط مقتنع بيه لان انا نفسي مش عارف اذا كان اقتناعه ده من جواه ولا عشان بس بيحبني

مكتبتش بقالي كتير ومفضفضتش معاكم من مده بس فعلا انا مفتقد التدوين وكنت زمان بكتب عشان مش لاقي حد اتكلم معاه صحيح انا لقيته دلوقت وبقيت احكيله لكن تعرفوا مكنش هو ده سبب ابتعادي عن التدوين ابتعادي عن التدوين عشان كنت بهمش الامور مكنتش بفكر كتير وكنت مهتم بالهدف اللي انا بتكلم عليه والحلم ده وكان شاغل تفكيري لكن لما تعبت دونت

وحشتوني بجد ووحشني البلوج والميوزيك اللي مش شغاله هههههههه هظبطها عشان كان فيه ناس بتحب تسمعها

سلام والي لقاء قريب

احداث شهر 3 باختصار

2011-04-01T14:25:00.001+03:00

اول حدث في شهر 3 وتقريبا اجمل حدث حصلي من فتره الا وهو اني خطبت الانسانه القريبه من قلبي واعز وافضل صديقة ليا ربنا يكرمها ويخليهالي

وتاني حدث وده مؤسف شوية الا وهو ان رجلي اتكسرت واتجبست في اخر كام يوم من الشهر

واخر الاحداث اني حاليا بستعد لامتحان الزماله البريطانيه ويمكن ده اللي باعدني عن التدوين واكتر حاجة شغلاني طبعا بعد الخطوبه ههههههههههه

دعواتكم بقي الفتره الجايه كده بالنجاح

سلام يا احلي مدونين والي لقاء قريب فيه كلام كتيييييييييييييير

وانتصرت اراده الشعب

2011-02-12T15:35:00.000+02:00

وانتصرت اراده الشعب المصري

حقا

اذا الشعب يوما اراد الحياه فلابد ان يستجيب القدر

ولابد لليل ان ينجلي ولابد للقيد ان ينكسر

Happy New Year

2010-12-31T23:46:00.000+02:00

كل سنة وانتوا طيبين

دقايق قليلة ونبدا سوا سنة جديده علينا سنه من ضمن سنين عمرنا سنه بنتطلع فيها نحقق اللي محققناهوش في السنه اللي فاتت وبناخد علي نفسنا فيها عهود جديده ونحط لنفسنا امال واحلام وخطوات جديده وكلنا امل اننا نقدر نحققها قبل لما عقارب الساعه تعدي 12 في اخر يوم في السنه

وطبعا راحت سنه من عمرنا خلاص مش هترجع تاني وبنقعد فيها نحاسب نفسنا عملنا ايه فيها وحققنا ايه وايه معانا لسه محققنهوش وهل كانت سنة كويسه ولا كبيسة وناس بتشتم فيها وناس بتشكر فيها

عن نفسي 2010 كانت واحده من احسن السنين في حياتي برغم ان كان فيها فرح كتير قوي بس برضه مكنتش تخلي من بعض العيوب لكن برضه مبوظتش السنه عليا وكانت بالنسبالي احلي كتييييييير من 2009 و 2008

يمكن اكتر واحسن حاجة حصلت السنادي مع انه مش اول الاحداث هو اني لقيت الانسانة اللي تشاركني طريق حياتي وتكمله معايا وقدرت افاتحها واصارحها بمشاعري وقبل انتهاء السنة قدرت اني اتقدم ليها واطلبها من والدها ودي يمكن اكتر حاجة جميلة حصلت السنادي لان هي كانت الجزء الهادي اللي دايما بيهون عليا احداث السنة الصعبه ودايما يقف معايا ويساعدني وفي نهاية السنه الجديده بدعي ربنا انه يجمعنا سوا في اقرب وقت ويخليها ليا وميحرمنيش منها ابدا

لكن اول الاحداث السعيده اللي حصلت اني اتخرجت من الكلية اخييييييييييييرا وخرجت منها وانا لسه بعقلي شويه يعني وعرفت احافظ علي تقديري صحيح اني تراجعت في الترتيب لكن الحمد لله ان تقديري فضل زي كل سنه وطبعا دي كانت فرحه كبيره جدا اني خلصت مشوار صعب وطويييييييييييل ومتعب وبداية لبدء مشوار تاني اطول واصعب

نجحت في الجزء الاول من امتحان الزمالة البريطانيه لكلية الجراحين الملكيه ويارب 2011 تبقي سعيده باتمامي الجزء التاني

طبعا خطبة بعض زملائي وحضوري افراحهم

لكن علي المستوي العام السنه كلها كانت جميله قوي رحالات وضحك وهزار و اكتشاف اشخاص جداد وتكوين صدقات جديده وجميله واكتساب مهارات كتيره وتحسينها علي المستوي العلمي والعملي وبجد بشكر كل شخص قابلته السنادي واتعاملت معاه عن قرب او عن بعد وكل شخص علمني كلمة او حرف او موقف

وكل الشكر والتقدير لاهلي ووالدي ووالدتي اللي مستحملني علي طول صحيح بنختلف كتير في الاراء وبنشد مع بعض بس دايما برضه بنرجع نتفاهم ونتفق بالراحه

لكن من بقي عيوب السنه هي ان اولا فرقتنا انا واصدقاء الكفاح والشلة عن بعض وكل واحد خد طريق ومشي فيه صحيح بنتجمع كل كام شهر مره بس برضه الاحساس وحش بعد لما فجاه نبعد كده عن بعض بس برجع اقول سنه الحياه

ان كان نفسي اعمل حاجات كتير السنادي لكن مش هقول بس الوقت لا والكسل كمان مساعدونيش اني اعملها

كان نفسي ازود معلوماتي الدينيه والثقافيه بعيدا عن مجال الطب اكتر واكتر

كان نفسي احفظ كام جزء من القران ومقدرتش بصراحه

كان نفسي اتعلم سواقه وجيتار او ارجع للرسم تاني وده برضه محصلش

لكن السنه كلها علي بعضها علي المستوي العام الحمد والشكر ليك يارب كانت سنه سعيده جدا

وان شاء الله السنه الجايه تبقي احسن واحسن

وتبقي سعيده علينا كلنا ونحقق فيها كل اللي بنتمناه

فاضل ربع ساعه وتبتدي 2011 يلا كل واحد يقوم يصلي ركعتين في نص الليل ويدعي باللي عاوزه في السنه الجديده

سلام والي لقاء قريب

Days of my life

2010-12-02T20:40:00.001+02:00

These Days are wonderful

15-5-2010

3-11-2010

5-11-2010

1-12-2010

you complete me

2010-11-27T04:02:00.001+02:00

Yes, you complete me

thanks god that you are with me :)

كل سنه وانتوا طيبين

2010-11-16T23:42:00.003+02:00

لبيك اللهم لبيك لبيك لا شريك لك لبيك

ان الحمد والنعمه لك والملك لا شريك لك

لبيك

كل سنه وانتوا والامة الاسلاميه بالف خير وسعاده ويعود عليكم العيد بالخير واليمن والبركات

الله مهي سهله وبسيطة

2010-10-09T01:25:00.001+03:00

ساعات بحس ان الحياه سهله وبسيطه وابسط م احنا نتخيل لكن احنا اللي بنعقد الامور بنفسنا وبنديها اكبر من حجمها

وساعات تانيه بحس ان هي كده معقده وان في ظل الظروف والاحداث اللي احنا فيها لازم نحسب لكل خطوه حساب وناس تعتبر ده شيء جميل وناس تعتبره لا مش كويس وان لازم في الدنيا عنصر مخاطره

بس غير كده لما تلاقي احلام ليك واهداف وخطوات واحد زيك وفي نفس سنك بيحققها وانت لسه مش عارف تاخد خطوات فيها او ماشي بخطي بطيئه فيها وتحس وقتها ان فيه حاجة غلط لازم وقتها دماغك تلف وتدور وتتلخبط وتقف مع نفسك وتسال ايه الفرق ايه ؟؟

انت اللي بتعقد الامور وبتمشي بتباطؤ نحو هدفك وغايتك ولا الظروف مختلفه بينك وبينه ولا دنيتك غير دنيته ؟؟؟

مش عارف

مش عارف ايه فين وازاي ومنين؟؟؟

مش عارف بس الاكيد ان الظروف مختلفه وان فيه حاجات بتحكم دنيتك غير دنيته وان الصوره اللي انت شايفها مش هي الصوره الحقيقه ومش بالضروره تكون انت اللي صح وهو اللي اموره مختلفه بالعكس ممكن هو اللي يكون صح وانت اللي معقد الدنيا ومش بتعمل اللي عليك وان الدنيا سهلة وبسيطه وسووووووووووو ايزي زي م بيقولوا

المهم ان في الحالتين انت محتاج تفكر كويس وتشوف ايه الفروق دي وتحاول تتغلب عليها علي قد م تقدر وتصلحها بس عارفين وقتها مش هتطلع الحياه سو ايزي هتطلع برضه مش بسيطه ومحتاجة تعب ومجهود عشان توصل وتعدل الفروق دي

بس فعلا هي الحياه سهله وبسيطه زي م ناس بتقول ولا هي صعبه ورخمه زي م احنا حاسين؟ والله انا ساعات بحس بالاتنين شويه كده وشويه كده ههههههههههههههههه

بوست غريب مريب بعد غيبه معلش العقل مبقاش زي زمان حكم السن بقي ههههههههههههه

والي لقاء قريب

عيد سعيد عليكم

2010-09-08T17:32:00.000+03:00

كل سنه وانتوا طيبين :D

يعني ايه كلمة وطن؟؟؟؟؟؟

2010-09-03T00:40:00.006+03:00

ازيكم يا مدونين وكل سنه وانتوا طيبين بمناسبه الشهر الكريم طبعا متاخره بس اخيرا عدنا والحمد لله طبعا بعد غيبه كبيره بس غصب عني

اصلي عاده كنت بكتب عشان كنت فاضي وكان جوايا كلام كتير بحب اعبر عنه هنا في المدونه صحيح كاان اي كلام زي اسمها بس كان بيريح كتير

بعد التخرج بقي تقريبا كده مشيت في تيار الحياه واكتشفت ان مع هده اليوم والسعي ورا الرزق والتعليم والضغط انك بترجع تعبان وبتشوف حاجات في الدنيا يا بتبقي مش قادر تعبر من التعب ولا تمسك قلم وتكتب يا مخك نفسه مش عارف يصيغ الكلام

اكتشفت ان الظروف والعيشه في البلد بتبقي ضاغطه علي مخك وملجمه عنيك متقدرش تلف تشوف حاجة غير نفسك

عذرت الناس بصراحه كنا بنبقي قاعدين طلبه في بيوتنا نشجب وندين ونقول الناس سلبيين بصراحه الناس مظلومين

الدنيا وتيار العيشه واخدهم مش مخاليهم يعرفوا يبصوا حواليهم ويفكروا في حاجة غير ازاي يكسبوا لقمه العيش

شوفت الناس الغلابه اللي مش قادره تدفع 7 جنيه تمن تذكره الكشف الاقتصادي

والناس اللي بتدفع 2 جنيه تمن تذكره الكشف المجاني وبتترجاك تكتب علاج يتصرف عليها عشان معهاش حق العلاج اللي من بره ولما تقوله بس العلاج اللي من هنا مش علاج لحالتك وضعيف اساسا يقولك معلش يا دكتور طيب نعمل ايه وتحاول تشوف العينات المجانيه اللي بتجيلك من الساده مندوبين شركات الادويه وتطلعها تدي منها للناس دي

شوفت الراجل اللي بيصحي بدري ويقعد يكنس الشوارع عشان في اخر الشهر يطلعله مرتب بالكاد يكفيه ياكل عياله

وكتير وكتير

حتي احنا برغم اننا دكاتره لكن طالما واقعين تحت طاولة الحكومه او بلغه اصح طالما قاعدين في البلد دي وملناش ضهر ولا واسطه يبقي بندعك م بين اسنان ترس الحياه

ونرجع نقول الناس سلبيين

يعني ايه كلمة وطن؟

قبل لما اكتب البوست عملت سيرش علي الجملة لقيت كذا مدونه كاتبين نوت بنفس العنوان

دخلت قريت لقيت الكل بيعبر عن استيائه من الي بيحصل في البلد كل بطريقته

وانا من زمان بيدور في دماغي سؤال يعني ايه كلمة وطن؟

يعني ارض وحدود ومكان زي م قال محمد فؤاد ولا ايه

وانهي وطن ؟

انا زهقت من البلد او الوطن ده وفي اقرب فرصه تيجي عشان اسافر هسافر ومش هرجع

يعني ايه كلمة وطن؟

يعني مهانة وذل وخنقه وقلة قيمة و محسوبيات و رضا بالفتافيت اللي بنحاول حتي نوصلها ومش بيدونا الفرصه

هحكيلكم علي حاجة

في يوم سافرت رحلة لاسكندريه في الشهر اللي فات وروحت هناك المنتزه وكان معايا ناس صحابي وبعدين وقفت بصيت علي الناس اللي بتلعب في الميه والشط المدروس كراسي لحد 50 متر من شط الميه لبره لدرجه انك مش عارف تشوف البحر من الزحمه اساسا

وبصيت علي ضحكهم ولعبهم وبصيت علي صحابي وهما واقفين فاتحين دراعتهم للهوا وبيشموه وقعدت اقول سبحان الله الناس في مكان مش جامد مش حاجة مكان عادي جدا فيه شويه ميه عاديين مش شواطيء الريفيرا ولا حتي شرم الشيخ وبرغم كده مبسوطين

استغربت علي الناس اللي البلد خلت مجرد الحصول علي ابسط حقوقهم دي بالنسبالهم ياااااااااااااه حاجة كبيره وتفرحهم

الحاجات دي ابسط حاجة للناس التعبانه الشقيانه انهم يحصلوا عليها

وانا اهو ولسه خريج جديد وبصيت للناس دي وعرفت قد ايه البلد بتخنق ولادها بالروتين والقهر والاستعباد ومتفرقش بين الناس غير بالوسايط وقد ايه بقت مقرفه

كرهت زحمة القاهره وكرهت مواصلاتها وكرهت شوارعها وكرهت مبانيها وكرهت جوها وكرهت لياليها

يبقي ايه كلمة وطن؟

يبقي فين الحب للوطن اذا كان كرهت المكان بكل م فيه كنا بنقول زمان احنا بس كارهين النظام واللي بيعمله فينا والقيود الموضوعه المقهوره علينا لكن احنا بنحب وطنا برضه اصل مصر مكان وشعب مش مجرد حكومه ونظام

طيب واللي كره حتي المكان؟

انا مش هقول عليه خاين ولا معندوش انتماء لبلده

كل اللي هقدر اقوله انه شخص معندوش انتماء للمكان وده مش غلط

هو مش خاين هيروح يبيع اسرار بلده للعدو عشان عارف كويس ان فيه ناس فيها طيبين وناس بيحبهم

لكن جرد البلد كده من الشعب ده؟

تعالي كده نفكر لو ان الشعب ده كله سافر اي بلد تانيه وبقت البلد دي فاضيه برضه هتحبها بنفس الدرجه؟

هيبقي ايه هو الوطن؟

شويه تراب وارض

ضغط الحياه خنق عليك لدرجه انك حتي المكان كرهته كله عاوز يسيب البلد ويسافر وبيرتاح بره وبياخد وضعه صحيح بيتعب عشان يجيب القرش اللي يقدر يصرف بيه علي ولاده بس وايه يعني مدام بياخد العائد اللي يكفيه سواء فلوس او احترام لنفسه ولشخصه

فيها ايه مدام هو في وطنه هنا متهان وبيعمل اللي عليه وبرضه مخنوق عليه ومبياخدش اللي يستحقه

مقارنه بسيطه لسه قاريها النهارده علي النت وبما اني طبيب فهتكلم عن حاجة اعرف افتي فيها

بيقولك دخل الطبيب في مش عارف الدول العربيه م بين 800 الف جنيه في السنه ومليون و 800 الف في حين ان الطبيب في مصر دخله في السنه 26 الف جنيه!!

طيب منين يا ولاد الكدابه؟ ده حتي بيقبضونا 250 جنيه عاوزين تحسنوا حتي صورتكم في الحسابات وبتكدبوا ياسيدي هو لو الواحد دخله في السنه 26 الف من الحكومه هيضايق ؟ معتقدش يعني بياخد في الشهر بتاع الفين جنيه وشويه

بس سيبنا من كل ده ومش هندخل في تفاصيل بس انا بوريكم مقارنه م بين زي م بيقولوا اسمي المهن في الدنيا م بين هنا وبره

في ظل الظروف المنيله دي

يبقي ليه ابكي علي مكان مش مقدراني

ليه لما اسافر بره والاقي تقدير من العالم كله الا بلدي ابقي عاوز ارجع

ليه احمد زويل خرج بره ودرس ووصل للي هو فيه

وكلام كتير بس مش عاوز اطول عليكم وعارف اني راجع ببوست يخنق بس والله مش عارف اكتب تفاريح من اللي ابتديت اشوفه

في البلد دي او في الوطن ده بس محتاج حد يجاوبني بفكر تاني ويقولي

يعني ايه كلمة وطن؟
http://www.youtube.com/watch?v=zI49jcsXv3Q

Back Soooooon

2010-06-29T03:48:00.000+03:00

Wait for me

انا اتخرجتتتتتتتتتتتتتتتتتتتتتتت

2010-02-02T22:53:00.019+02:00

يااااااااااااااااااااااه وحشني البلوج جداااااااااااا وكل المدونين والمدونات
( قصدي البلوجات لحسن دماغكم تروح لبعيد ها )

ههههههههههههه

ازيكم يا جماعه عاملين ايه واخبار التدوين من غيري اكيد مفتقديني زي م انا شايف كده حتي بصوا الكومنتات كتيره ازاي بتسال عليا وعلي اخباري

ههههههههههه

طبعا انا توقفت عن التدوين لسببين اولهما ان تقريبا كانت دماغي فاضيه ومش عارف اكتب ايه

وثانيهما عشان كنت في فتره امتحانات من شهر 12 لحد اخر شهر 1

وكنت خدت عهد علي نفسي ان اول بوست اكتبه في المدونه بعد الامتحانات هيكون بعد النتيجه

واخيرا يا جماعه وبعد عناء 6 سنين دراسه وسهر وتعب وحرقه دم واعصاب وانكسارات وفرح وحزن واكتئابات في طب عين شمس اخيرا

اتخررررررررررررررجت

صحيح مش قوي يعني عشان لسه فيه سنه امتياز لكن مش مهم المهم اني خلاص خلصت الطب وبلاويه والضغط العصبي اللي كان بيجيلنا فيه

ياااااااااااااااااااه سنين كتير والله عدت

واحد صاحبي بيقولي مروا بسرعه محسناش بيهم

لكن انا مش عارف والله اقول ايه

مش عارف مروا بسرعه فعلا ولا مروا بتقل وبطء ساعات اقعد افتكر كده الايام واقول معقوله والله جريت وساعات اقول لاااااا ده انا قعدت كتييييييير في الكليه و سنين مرت صعبه علينا

لكن اللي متاكد منه ان زي م كان فيه ايام حزن واكتئاب وصدمات وخنق كان فيه ايام فرح ولعب وضحك وسعاده وهزار

والحلو يغطي علي الوحش

بدل م هفتكر الكليه بمزاكرتها وقرفها وامتحانتها ونظامها التعليمي المستفز

هفتكر فيها الصحاب والاخوات والصدقات والرحالات والضحك والهزار والفرفشه والفرح

حتي اوقات الحزن اللي كنا بنقضيها مع صحابنا كانت برضه لحظات متتنسيش وبيبان فيها الصحاب بجد

6 سنين

ياه عمر ياجدعان لو حكيت علي كمية الاحداث والتغيرات اللي حصلت فيه هحسهم انهم 20 سنه مش 6 سنين

سنين استفدت فيهم بجد كسبت فيهم ناس بجد هونوا عليا ايام الطب وقرف الكليه

مش هضحك عليكم واقول ان شخصتي متغيرتش كتير عن دخولي لا فيه حاجات كتير اتغيرت واتطورت ونضجت فكريا ونفسيا وشعوريا ومتعلمتش في الكليه الطب بس
( علي اعتبار يعني اني اتعلمته واخدين بالكم معايا )
لا اتعلمت حاجات تانيه كتير في حياتي هتفيدني كتير

بشكر ربنا وبحمده انه دايما كان جنبي رغم اني كتيييييييييير كتير كنت مقصر في حقه بس هو عارف اني دايما والله بحاول اوفي حقه وعارف انا بدعي دايما بايه

و بشكر كل انسان ساعدني ووقف معايا فتره الدراسه دي

بشكر والدي ووالدتي بكل اللي عملوه عشاني واقولهم معلش صحيح كنت رخم حبه ودماغي ناشفه بس بجد كفايه اللي بتعملوه عشانا واحنا من غيركم والله منسواش

بشكر صحابي واخواتي الاشقاء واللي طلعت بيهم من الكليه اللي دايما كانوا جنبي في وقت الشده و الصعاب وبيخففوا عني ودايما كانوا بيدعولي وبقولهم بجد والله دوركم كان كبييييييييييييييييييييييييييير فوق ما تتخيلوا وكفايه حبكم ليا ده عندي بمليون بكالريوس والله

انتهت مرحلة في حياتي وابتدت مرحلة جديده احساس غريب متضارب فرح علي حيرة لكن المهم ان احساس ان الواحد حقق حاجة في حياته ده احساس جميل يااااااااااه اخيرا الواحد حس ان اللي بيعمله جاب نتيجه وهنحسه اكتر واكتر لما نطبقه عملي في خدمه الناس وتخفيف الامهم باذن الله ووالله ده مش كلام شعارات يا جماعه انا ميهمنيش الطب ولا اني ابقي دكتور اكتر م يهمني ان مهنتي دي تبقي بفايده مش مجرد شهاده ولقب خدته لا اني اسخره في تقديم مساعده للغير

فاكر كلمة قالتهالي مريضه يوم امتحان النسا بتاعي وتقريبا عمري م هنساها

قالتلي يا دكتور لما بتكبروا وتركبوا العربيات بتنسوا الناس الغلابه

ربنا يعلينا ويوطي انفسنا ويبعدنا عن الكبر والغرور

والله انا دايما حاطط في بالي ان مهما حصل لازم افتكر الناس الغلابه دي وان عمري م نفسي تعلي عليهم

طولت عليكم ؟ معلش بس بقالي كتير مكتبتش وانتوا وحشتوني وكمان بقي يوم تخرجي بقي اكتب براحتي

يلا اسيبكم علي خير وان شاء الله هشوفكم قريب م خلاص خلصنا وبقينا فاضيين ولا عزاء للدارسين :P

دعواتكم في اللي جاي يا بشر واللي يدعيلي يدعي بان ربنا ينور بصيرتي ويهديني لصالح الاعمال

يلا سلام يا مدونين
:D

اللي معاهوش ميلزموش

2009-11-09T04:22:00.005+02:00

حكمة وقالوها اهلنا زمان
اللي معاهوش ميلزموش
او اللي معندوش ميلزموش
دايما الناس القدام دول بيقولوا حاجات غريبه يا جدع وفي نفس الوقت في الصميم
بصراحه بيني وبينكم عندهم حق
بس هو ياتري هما قالوها ليه ؟ وعلي ايه ؟
تقريبا معظم الافلام القديمه كانت بتتقال فيها الجمله دي او المثل ده علي مثلا موضوع بيع وشرا او جوازه وطلبات اهل العروسه للعريس المبالغه فيها او اشياء من هذا القبيل
لكن انا هنا مش هتكلم عليه من ناحيه البيع والشراء
طيب ايه اللي خلاك ياعم تفكر في المثل ده ؟؟
بصراحه مفيش هو مجرد افتكرت الجمله وقعدت افكر فيها ولاقيت انها بتنطبق علي حاجات كتير و تمام ميه الميه او يمكن عشان قعدت افكر كده انا معايا ايه وعاوز ايه
اصلها مش بس موضوع بيع وشرا لا دي طلعت بتدل ان الانسان اللي ميمتلكش المقومات والشروط اللي تؤهله للحصول علي الشيء يبقي ميستحقوش
مثلا اللي مبيزاكرش مش من حقه انه ينجح
اللي معندوش اراده و عزيمه مش من حقه انه يحقق احلامه
اللي معندوش تدين واخلاق مش من حقه انه يطالب بالجنه
اللي معندوش موهبه الرسم مش من حقه انه يبقي رسام
اللي معندوش مقومات انه يتزوج ويتجمع بالانسانه اللي اختارها علي خير مش من حقه انه يحب
(عارف فيه ناس هتدخل تضربني عشان دي ههههههههه )
وهكذا
يعني قبل لما اطالب بحاجة او احلم بيها لازم ارتب نفسي واهيئها ان يكون بداخلها المقاومات اللي تخليني اقدر احصل عليها او حققها
يعني اجتهد واعمل بجد عشان احسن المستوي اللي انا فيه بما يتناسب مع حجم الحلم او الشيء اللي انا عاوزه
والمستوي هنا مش مقصود بيه مستوي مادي ولا اجتماعي لا مش شرط ممكن يكون مستوي ثقافي او فكري او اخلاقي او ديني او او
المهم اني اعرف ايه اللي محتاج احسنه في حياتي او شخصيتي عشان اقدر احقق اللي عاوزه
صحيح الصوره في البوست المرادي مش متوافقه قوي مع الموضوع لكن عشان برضه فراغ العقل احد الاشياء اللي من ضمن الموضوع
يعني ميبقاش مخي فاضي مفيهوش اي حاجة كده و عاوز ابقي كذا وكذا واحقق كذا وكذا وقاعد اقول ان شاء الله وخلاص
صحيح كل حاجة بمشيئه الله عز وجل لكن برضه محتاج انك ترسم لنفسك حاجة عشان تمشي عليها وتسعي فيها بكل جهد وبمشيئه المولي تحققها يعني ترتب وتحدد اهدافك وتتوكل علي الله مش تتواكل
وهو ده اللي انا قصدي عليه اننا نبحث جوانا ونشوف احنا عاوزين ايه وقبل لما نطالب بيه ولا نحلم بيه ونسرح في الحلم ونلعن الظروف والايام اللي بتبعده عننا نفكر شويه كده مع نفسنا هو احنا نستحق الحلم ده ؟؟ هو احنا نستحق نفوز بيه ؟؟هل عندنا المقومات دي ؟؟ هل فعلا الظروف اللي بتبعدنا عن حلمنا ولا احنا المتخاذلين ؟
فيه ناس عارف هتدخل تعترض علي اللي بقوله وتقولي وايه يعني لما يحلم هو الحلم حرام وفيها ايه يعني يا عم لما واحد يحلم بحاجة كان نفسه فيها
زي واحد علي قد حاله بيحلم انه يبقي حاجة كبيره
ولا واحد غلبان بيحلم ان ولاده يكبروا ويطلعوا مهندسين ودكاتره ويمسكوا مراكز مرموقه في البلد
انا معاكم ان دي احلام بس حتي الحلم المفروض يبقي علي قد الامكانيات اللي معاك عشان تقدر تحققه عشان متصابش بالاحباط واليأس
الراجل اللي علي قد حاله ده وبيحلم انه يبقي حاجة كبيره م يشتغل ويعمل بجد انه يحقق لنفسه مكانه كويسه ويوم بعد يوم يحقق حلمه الكبير
الراجل الغلبان اللي بيحلم بان ولاده يكونوا دكاتره ومهندسين واصحاب مراكز مرموقه يقدر ينفذ الجانب الخاص بيه من الحلم وهو انه يربيهم علي اسس سليمه و يوفر ليهم الظروف السليمه علي قد ما يقدر والباقي عليهم
وهكذا يعني لو بصينا برضه هتلاقي انك حتي لو بتحلم حلم كبير وبتقول ان الظروف هي اللي مش مساعده في تحقيقه لازم برضه تسعي فيه بكل جهدك عشان تحققه وبعد كده يتحقق او ميتحقش المهم تبقي عملت اللي عليك
صحيح ان الظروف ساعات كتيره بتفرض عليك واقع في حياتك غير قابل للتعديل حتي لو اجتهدت فيه وانا مش هنكر ده لكن علي الاقل يكفيك شرف المحاوله وانك تبقي عرفت ان العيب مكنشي فيك والعيب فعلا في الظروف

السؤال بقي اللي كل واحد فينا محتاج يجاوب عليه بعد لما يعرف هدفه وحلمه
ياتري انا ايه اللي محتاجه يكون معايا عشان احقق حلمي ده ؟؟
وياريت لو قدر يوجده معاه ويسعي انه يكون جواه

سلام يا مدونين والي لقاء قريب :)

عواجيز في العشرين

2009-10-18T20:52:00.006+03:00

ايه رايكم؟
في ايه ياعم انت ؟؟
في العنوان
اصل شباب اليومين دول عجزوا بدري بدري وهما لسه يدوب في العشرين يعني تحس كده انهم مش عاوزين يتعبوا وبيرهقوا بسرعه مع اقل مجهود ومأنتخين كده وعاوزين الفلوس علي الجاهز من غير تعب ولا مجهود
بيحلم بالثروه والشقه والعربيه والعروسه وكل ده عاوزه بسرعه وعلي الجاهز ومش عاوزين يتعبوا
طيب يبصوا لاهلينا عملوا ايه وكونوا نفسهم ازاي وبنوا حياتهم ازاي ياخي دي الحياه مش بتتاخد قفش ولا في يوم وليله فيها ايه لما تتبهدلوا شويه عشان تعملوا نفسكم ولا هو خلاص مش فالحين الشباب غير في النت والدش والروشنه و خلاص

ده مش رأيي عشان محدش يدخل يشتمني ويقولي انت بتخرف ده راي ناس كتير وان كان اغلبهم من النساء في شباب اليومين دول
بيتهموهم بالاتهامات اللي فوق دي بجانب المقولة الشهيره
ان الرجاله ماتوا في 73
متهيالي الجيل اللي طالع بيقي يعرف حرب اكتوبر من المقوله دي الاول وبعدين يسال هي ايه حرب 73
انا مش هنكر ان الكلام اللي فوق فيه جزء من الحقيقه

ولكن
القضيه غير مكتملة الاركان والدليل ليس كافي ووكيل النيابة كالعاده قايم بيطالب باقصي العقوبه علي المتهم من غير ما يسمع دفاع
والحكم مش عادل المرادي
الشباب مش كده اللي الحكم ده او الراي ده اتقال عليهم فئه موجوده في المجتمع وبين الشباب ولكن ليس كل الشباب لسه فيه الشباب الكويس الخلوق الطموح اللي بيسعي بكل جهده ليحقق مراده ويحقق احلامه وبيبذل كل مجهود في سبيل ده
لسه فيه الشباب اللي بيخاف علي بنات منطقته وجواه المرؤة والشهامه
لسه فيه الشباب المتدين الصالح صاحب الفكر العالي والاسلوب المتحضر
لسه فيه شباب بيراعي ربنا في دنيته ودينه وناسه واهله
لسه فيه الشباب اللي زي اللي ماتوا في 73 بل افضل
ايام 73 وبرغم حال البلد وما بعد النكسه وغيرها الا ان لو قارنا بينهم
الشباب اللي ماتوا في 73 هدفهم كان واحد تحرير بلادهم بيحاربوا عدو واحد هو السبب في حال بلدهم سواء من حاله اقتصاديه ولا سياسيه ولا غيره بيحاولوا يهزموه عشان يعلوا وينهضوا ببلادهم كان ده الفكر السائد علي حياتهم
لكن هنا شبابنا دلوقت مش عارف اساسا عدوه مين
وهو في الاصل مش عدو واحد دول كتير
هيحارب مين ولا مين
البطالة ولا الاسعار ولا الفساد ولا الفكر اللي بيجي من بره عشان يفسده ويلهيه ولا التعليم ولا ولا ولا
الشاب في الزمن ده محاط بجيش من الاعداء بيحاول يهزمهم ويتغلب عليهم علي قد م يقدرو هدفه مش انه ينتصر عليهم لا انه بس يقدر يقف قدامهم ويصد عدوانهم مش يستسلم ليهم
مش ينهزم ويداس عليه ويبقي راح في الرجلين واصبح مجرد شبح او مجرد شخص ملوش لزووم

القاضي اللي اصدر الحكم اللي فوق محطش كل ده في الحسبان عمل مقارنه سريعه بين حال الشباب دلوقت في ايامنا دي وحالهم زمان
ونسي ان الحال غير الحال والزمان غير الزمان والظروف غير الظروف
انا عارف ان فيه كتير وكتير وكتير وكتير من الشباب دماغه خلاص ضربت وضاعت وفكره مبقاش شغال وبقي كسلان
انا شاب ومش هنكر ده
بس مش بالصوره اللي انا بسمعها ولا بقرأ عنها حرام الحكم ده يصدر بالصوره دي من غير تفكير

هو حقيقي العنوان صحيح
حقيقي ان الشباب عجز في العشرين وبقي زيه زي واحد في الخمسين من بتوع زمان لكن مش بسبب كسل وانتخه ولا تواكل
بسبب ظروف حياه عايشين فيها ودنيا غير الدنيا عاوزين شاب شايف من حواليه فضائيات بتعرض تفاهات وجامعات بتعلم اي كلام وفكر جايله من بره عاوز يدمر عقله وبلد كل حاجة فيها بتلغي الا البني ادم هو اللي بيرخص و غيره وغيره زي ما انتوا عارفين وشايفين
وفي زحمه كل ده مطلوب منه يحافظ علي كيانه واسلوبه واخلاقه ودينه وتربيته و يكون نفسه ولو فكر في الارتباط يعيش الانسانه اللي هيرتبط بيها عيشه كريمه ويقدر علي متطلبات الحياه
كل ده ومش عاوزينه يعجز بدري بدري طيب ازاي؟
لازم يعجز في العشرين ده بيحارب اكتر واعنف من اللي كانوا في تلاته وسبعين

مش هطول عليكم
بس عذرا ياساده الحكم غير عادل وعشان انا شاب انا بطعن فيه
فكروا شويه بجديه وبعمق ومن كل الجوانب
وبعدين
اصدروا الاحكام

سلام :)

كان ليه حلم

2009-10-14T20:59:00.009+03:00

زيه زي اي شاب ..شاب عادي ...زيي وزيك.. انسان زي اي انسان بسيط ليه حلمه الي بيسعي وراه ونفسه يحققه
بيدرس عشان يحقق حلمه ومنتظر الوقت اللي يتخرج فيه عشان يبدا في تحقيقه
بيحلم بالراحه والاستقرار ..بيحلم بالزوجه والبيت والاولاد ..بيحلم بالحياه الجميله السعيده
بيحلم بالكتير والكتير واهي احلام وامنيات عايشين عليها و ليها و بنجري في دنيتنا عشان نحققها احلام بتبقي لينا الامل الي بيدينا القوه والاراده انا نصبر علي دنيتا

لكن هو القدر م امهلهوش يحقق احلامه .. توفاه ربه الرحيم
وكل اللي بيحلم بيه متحققش

تاني انسان اعرفه يتوفي بنفس الطريقه وفي السن ده
وكل مره اقف وقفه اكبر من اللي قبليها واصرخ باعلي صوت وازعق واقول ياااااااااااااااااااااا الله يا ارحم الراحمين دلني علي طريق الهدايه و نور لي بصيرتي واعني علي طاعتك وحسن عبادتك واغفر لي خطاياي وتوفني وانت راض عني

انسان عادي زيي بيدرس اكيد كان ليه حلمه اللي نفسه يحققه في لحظه وفجأه اكتشف انه عنده سرطان في الدم وشهر والتاني و توفي
مخدش حاجة معاه
مش هينفعه غير عمله الصالح و الكلمه الطيبه اللي كان بيقولها
بجد كل يوم بيرسخ في ذهني الجمله اللي اتقالتي يا بني الدنيا اكتر كتير من درجه في امتحان ولا بنت حلوه تتجوزها ولا عربيه تركبها ولا مركز اجتماعي و لا ولا
الدنيا اختبار و مرحله لحياه بعديها كل اللي فيها فان وفي لحظه بيروح
بجد من بعد لما بقعد افكر في الكلمه دي بحس فعلا اننا بنموت نفسنا وبنحرق دمنا ونضيع عمرنا علي كلام ملوش لازمه وناسين نفسنا
بستغرب من اللي بيعيط عشان ضاع منه درجات في امتحان ولا اتصدم في قصه حب ومش بيعيط عشان ناسي نفسه وربه وبيجري ورا الفلوس ولا اللي وخداه تلاهي الدنيا و عايش في الاوهام ولا ولا ولا امثله كتير وكتير واحنا منهم ماشين وناسيين ان في لحظه ممكن نموت في لحظه كل اللي بنرتبله يضيع واننا مرتبناش لاهم حاجة
اخرتنا
عملنالها ايه ؟؟
جبت امتياز في الكليه ؟؟؟ طظ
اتجوزت اجمل نساء الدنيا؟؟طظ
بقيت رئيس الجمهوريه؟ طظ
المهم عملت ايه للاخره
مفيش
من زمان فيه مقوله بحبها قوي بتقول
من اراد واعظا فالموت يكفيه
وانا اخترت اسمي ديد عشان تبقي دايما قدامي ومش هغيره عشان دايما افتكر الجمله دي

ياريت بجد نفوق شويه
دول لا هيبقي اول ناس راحوا ولا حتي الاخرين دول عظه للحاضرين

انا لله وانا اليه راجعون

ربنا يرحمك يا محمد انت وادم ويدخلكم جناته

:(((

اي كلام وخلاص

2009-10-07T16:49:00.006+03:00

بقالي فتره كبيره مش بكتب حاجة هنا و كمان لما بكتب بتبقي حاجات عادية وتهاني وخلاص
الحقيقة اني مش عارف اصلا افكر زي زمان ولا اكتب زي الاول
تفكيري بقي عادي جدا مبيتعداش احداث اليوم الروتينيه اللي بتمر عادي زيها زي اي احداث عند اي شخص مبقتش افكر في اللي حواليا زي زمان ولا بقيت احلل الامور واخرج منها بكذا فكره وكذا حاجة
حتي الجادوفرينيا او الشخص التاني مش لاقيه
دورت عليه كتير ولكنه مش موجود معايا وكأنه رجع لمرايته من تاني و سكن جواها وسابني بقيت اروح اطفي نور الاوضه وافتح الشباك بالليل واقف فيه منتظره يخرجلي مصحوب بموسيقي تصويريه زي بتاعت فيلم اسف للازعاج ولكن برضه مبيخرجش
عشان انا نفسي مخي مبقاش يفكر كتير ويسأل ويستفسر زي الاول
معقول اكون خفيت ؟؟؟
اه اصل انا كنت بعتقد اللي عندي وتفكيري الزايد ضرب من الجنون وناس كانت بتقول اني بصعب الامور وبكلكع الدنيا واني مبخدش الحاجة زي م هي من شكلها لا لازم افصصها
علي فكره علي قد م ان اللي انا فيه حاليا مضايقني لانه سحب مني قدرتي علي التعبير والكتابه هنا علي قد م انا مرتاح ان دماغي بقت ثابته ومستقره
حتي حياتي نفسها مبقتش زي الاول او انا اللي حاسس انها كده
حاسس انها فيها حاجات اتغيرت واهتمامات اتبدلت
تستغربوا لو قولتلكم مبقتش فعلا ازعل علي حاجة زي الاول ؟؟ ولا اضايق روحي واقعد اعيط ليها واشتكي زي زمان ويمكن ده احد اسباب اختفاء الجادوفرينيا
اصل فعلا مفيش حاجة مستاهله نضيع ايام وشهور في البكاء عليها
حاجات قليله قوي قوي في حياتنا وان كانت تبدو كتيره هي اللي تستاهل يتبكي عليها بجد
حاسس ان الدنيا حلوه قوي بس احنا اللي بنصعبها وبقيت ابص لنص الكوبايه المليان بس برضه مبنساش اشوف الجزء الفاضي منها عشان مبقاش عايش في دنيا الاحلام الورديه والنظره الحالمه العابره للواقع الاقرب للمستحيل
ناس كتير بقت تتهمني بالتشاؤم وانا بستغرب جدا دلوقت لده لاني الفتره دي متفائل جدااااااااااااااااا بس عشان لما بيتكلموا معايا بيلاقوني بفكر لكل خطوه بمشيها وبحسبها وهما يقعدوا يقولولي يابني بطل مش كده الدنيا مش بتتاخد كده وانا معاهم بس بحب اكون منظم وعارف هعمل ايه حتي لو جد في الامور امور واتلخبط كل ترتيبي لكن علي الاقل ابقي راسم طريق ولو في مخيلتي

انا عشان اكتب البوست ده عمال امسح واكتب فيه بشكل كبير وده عمره م حصل وانا بدون
علي طول بدون علي البلوج علي طول مش بكتب البوست بره وانقله دلوقت بكتب وبمسح ولا كاني بكتب موضوع تعبير عاوز احسن صياغته للناس او كاني اول مره ادون هنا

كالعاده طبعا هتقولوا علي كلامي اي كلام
بس متنسوش اسم المدونه ايه

اهو اي كلام :D
سلام
:)

عيد فطر مبارك وسعيد

2009-09-18T07:11:00.003+03:00

مسافر كمان ساعة وقاعد بفكر كده اكتب بوست قبل السفر عشان فيه حد عزيز كان بيسالني ياتري هتكتب حاجة ولا لا قبل لما اسافر وقولتله اني دماغي فاضيه ومش بقيت عارف اكتب في المدونة بس مرديتش اسافر قبل لما اعيد عليكم
كل سنه وانتوا طيبين وبالف صحه وسلامه ويجعل العيد عليكم مليان هنا وسعاده وحب وتسامح وفجأه
نطت في دماغي جملة كنت بسمعها كتير في المسلسلات ولا في الحياه
يا عم سامح ده ربنا بيتوب علي العبد وبيسامح انت مش هتسامح ؟؟!!
وهنا سألت نفسي هو فعلا الانسان ممكن مش يسامح حد علي حاجة عملها ؟
ممكن؟
ليه م الناس بتقول اذا كان ربنا بيسامح الانسان وبيغفر له خطاياه بمجرد م بيتوب اليه ويندم عليها سواء كان سارق -كافر- زاني ايا كان انت مش هتسامح؟؟
اه ممكن اصل السماحه دي صفه من صفات الله سبحانه وتعالي وهي الغفران واسم من اسمائه وهو الغفور
الانسان بقي ساعات مبيقدرش يسامح لانه انسان مش إله
طبيعه النفس البشريه دايما كده بتحوم حوالين الاختلافات والتناقضات سواء في الشخصيه او التربيه او التفكير والاسلوب
ومن ضمنها دي التسامح
مهما كنت ايه ووصلت لدرجه من الحكمه والعقل والتمسك بالدين هتلاقي ان فيه حاجات لو حصلت متقدرش تسامح فيها اللي عملها
ممكن نقول تقدر تسامح وتعفو عما سلف ومتبقاش شايل من ناحيته خلاص لكن عمرك م هتقدر ترجع انت وهو زي الاول تاني
الزوج اللي زوجته خانته وطلقها و ندمت وتابت و و و عمره م هيرجعها لعصمته من جديد دايما هيحس ان فيه حاجة اتكسرت خلاص مينفعش تتصلح و اكتر شيء ممكن يقدمه انه خلاص يعفو عما سلف وميبقاش فيه ضغينه بينهم
الصاحب اللي صاحبه خانه و باعه بالرخيص عمره م هيقدر يؤتمنه علي سر تاني حتي ولو سامحه وخلاص مش شايل منه
اصل دي طبيعه بشريه يا ساده صفاء النفس بالمنظر اللي انا بفكر فيه شيء صعب جدا او شبه مستحيل
وفيه مستحيلات كتير وانا رجل اؤمن بالمستحيل لان بالطبع هناك مستحيلات ولا اؤمن بجمله مفيش حاجة مستحيله لا فيه
المستحيلات مختلفه وبتتفاوت من نظره لاخري
اقدر اقولك ان مستحيل الانسان يعيش من غير اكسجين صح ؟
مستحيل ان السمك يعيش بره الميه وعلي الارض؟
ده مش مستحيل ؟؟ اه مستحيل
وفيه مستحيل تاني نسبي
يعني؟؟
يعني انك لو فكرت فيه من منظور واحد هتلاقيه مستحيل ومن منظور تاني هتلاقي الاستحاله اختفت واصبح شيء سهل
زي؟
صعود القمر زمان كان شيء مستحيل لكن حاليا بقي مش مستحيل خلاص وناس طلعت وناس راحت وجت
ده نسبي حسب الزمان والمكان لكن فيه مستحيلات مش هتتغير مهما اتغير الزمان والمكان وعشان كده فيه مستحيلات وانا اؤمن بيها
والتسامح الخالص ده واحده منها

معلش بوست ملخبط بقالي كتير مش بدون وحبيت بس اعيد عليكم واشاركم كام فكره هبله جت في دماغي قبل لما اسافر وتقريبا دي تخاريف من قله النوم ههههههههههههههههه

يلا اشوفكم علي خير ان شاء الله
والي لقاء قريب
:)

يوم من حياتي

2009-09-08T06:50:00.004+03:00

امبارح كان واحد من اجمل الايام اللي قضيتها في حياتي و واحد من اجمل الايام القليله جدا اللي عدت عليا في الست سنين في الكليه اللي تعلق في الذاكره وتفتكرها وتبقي سعيد
امبارح كنا في افطار مع الاطفال المرضي في مستشفي االاطفال بالدمرداش
يوم كان تحفه بكل ما تحمله الكلمه من معني
يوم فعلا كل اللي حضروه وحسوه هيبقي بالنسبالهم يوم من حياتهم
احكيلكم اليوم باختصار
افطار متنظم تبع رابطه اصدقاء الاطفال المرضي اننا هنقعد في اليوم من الضهر لحد الفطار مع الاطفال في الغرف نلاعبهم ونعلمهم حاجات و نفطر معاهم وبعد كده حفله ليهم
وكان فيه اجتماع الصبح عشان توزيع المهام ...بس لما حضرته حسيت اني مش ميال اني اقعد مع الاطفال في الغرف فقولت هشارك في التنظيم والتجهيزات واننا نجيب الحاجات الناقصه وكده لحد لما الوقت يعدي
بس تحس بجد من بدايه اليوم ان ربنا مبارك في العمل الصالح اللي الانسان بيعمله
من ساعه لما خدت المهمه اللي مكلف بيها وخلصتها مكنتش تحس باي عقبات وبعد كده رجعت قولت هطلع اشوف النظام ايه في الغرف مع الاطفال والعنابر وقد كان
طلعت ولفيت علي كام عنبر كده ودخلت اكتشف الجو ايه ونظامه
صحيح اني علي وشك اني اصبح طبيب وصحيح اني دخلت المستشفيات كتير واتعاملت مع ناس كتيروشاركت في نشاطات طلابيه كتير بس عمري م اتيح ليا اني اتعامل مع الاطفال المرضي عن قرب للدرجه دي اكتر معامله ليا معاهم كان وقت الامتحانات والراوندات وانا بكشف عليهم
فعلا حاجة مختلفه تماما
انا مش هحكي تفاصيل عشان عارف ناس بتزهق وناس هتقول واحنا مالنا انا هقولكم انا بكتب البوست ده ليه بعد غيبه
-اليوم فعلا كان رائع للناس قبل الاطفال
وفيه الواحد اكتشف حاجات اكتر جواه ...يعني انا مكنتش حاسس اني هعرف اقعد مع طفل واتكلم معاه واقوله علي حاجات ونصائح واهزر واضحك ونلعب ونرسم لاني زي م قولتلكم تعاملي معاهم كان من بعيد وتعاملي دايما مع الكبار
لكن فجأه لقيت ان الموضوع غير م كنت متخيل بالعكس سهل جدا انك تقعد تعمل كل ده
انك ترسم بسمه علي وجه طفل مريض دي حاجة مش متخيلين قد ايه فظيعه بالنسبه للانسان لما تدخل عنبر اطفاله كلهم مرضي بامراض سرطانيه او امراض الدم وتشوفهم في حاله هزال وبرغم ده بيضحك ويلعب وعنده احلام انه يطلع دكتور ومدرس ومهندس حاجة رائعه
تخليك تفكر مليون مره في حياتك وتقف عليها من بعيد
وتحمد ربنا علي اللي انت فيه واللي عفاك منه وتعرف ان الدنيا اقل كتير كتييييييييييييييييييييييييييير من ان يتبكي عليها البكي اللي بنشوفه في المدونات واللي كانت مدونتي واحده منهم
انا مبقولش اننا خلاص نمشي بمشاعر سلبيه والحزن من حياتنا ننهيه لكن مش علي اي حاجة نزعل زي م بشوف لان فعلا اللي شوفته امبارح حسسني ان معظمنا عايش جوه صندوق مقفول عليه بمشاكله واحزانه وافراحه مشغول فيها مبيفكرش في اللي حواليه
حسسني قد ايه فيه ناس محتاجه فعلا الرعايه و لو بس بالكلمه
متتخيلوش سعاده كل اللي كانوا منظمين الحفل امبارح قد ايه وهما شايفين الاطفال المرضي دول بيلعبوا ويضحكوا وسعاده اهاليهم وكميه الدعاء اللي دعوها ليهم
وفرحتهم بان اولادهم فرحانين ومبسوطين
حتي الاولاد نفسهم كانوا زي العسل وبيضحكوا معاك برغم االالام اللي هي كانت فيها
المفارقه في اليوم اني بعد لما كنت شغال في التنظيم لليوم سواء من وجبات او تنظيم للحفل وغيره اصبحت مسئول عن عنبر كامل من الاطفال
يعني شوفوا من بدايه اليوم كنت حاسس اني مش هعرف اتعامل واذ فجأه بقيت مسئول عن عنبر كامل فيه حوالي 6 اطفال بالمتطوعيين اللي قاعدين معاهم
بجد انا راجع امبارح بسعاده فظيعه وراحه نفسيه رهيبه
وكل اللي كانوا معايا راجعين كده
يوم بجد بجد رائع
اشتغلت في حاجة غريبه عليا لاول مره
اتعرفت علي ناس قمه في الجمال وسباقين لعمل الخير
اشتغلت مع اخواتي و اكتر ناس بحبهم في الكليه وقضينا يوم فعلا مش هننساه وربنا يكرره دايما
ورسمنا بسمه علي وجوه الاطفال واهاليهم
باختصار ميتقالش علي اليوم ده الا انه
يوم من حياتي
:)

رمضان كريم

2009-08-20T04:31:00.003+03:00

كل سنه وانتوا طيبين يا معشر المدونين رمضان كريم وربنا يعوده عليكم بالخير يارب ويكون شهر مبارك عليكم وعلي الامة الاسلامية اجمع
ياريت بقي في رمضان السنادي كده نحاول نقرب من ربنا اكتر واكتر وياريت نقعد مع نفسنا كده في الشهر الكريم ده بدل م نقعد قدام المسلسلات والبرامج التافهة ونشوف احوالنا عامله ايه وياتري ممكن نحسنها ازاي
عن نفسي الشهر انا مستنيه بفارغ الصبر عشان اعمل كده
(هيدخل واحد ويقولي وانت يعني خلاص مستني رمضان عشان كده وسايب باقي السنه )
لا انا مش مستني رمضان يعني عشان كده بس لكن في رمضان هكون خلصت من موجه الامتحانات اللي شغال فيها بقالي فتره دي و المزاكره اللي خنقاني بقالها 4 شهور ومش مدياني فرصه اني اقعد مع نفسي وافكر
وان شاء الله هرتاح منهم الشهر ده خالص واخده عباده و احاول ابص لنفسي ناقصها ايه من جوه لان فعلا هي محتاجه حاجات كتير فيها تتصلح وان تبدو للناس كويسه لكن كل انسان اعلم باللي يحتاج يتصلح فيه ويتظبط مش لازم الناس عشان شيفاك كويس تبقي فعلا كده لو دورت هتلاقي شويه حاجات برضه ولو طفيفه محتاجه تتعدل طيب ليه بقي متعدلهاش وتظبطها
ان شاء الله انا هستغل فتره الروحانيه والهدوء وسلسله الشياطين في الشهر الكريم واحاول اطلع منه باكبر مكسب سواء علي المستوي النفسي او المستوي الديني لان السنه اللي فاتت ضيعته من غير م اعمل فيه اي حاجة عشان كان جاي في وسط امتحاناتي وراح فيها
:(
انا بس حبيت ارمضن عليكم قبل الشهر عشان الواحد مش ضامن ظروفه ايه واقولكم ربنا يباركلم في الشهر الكريم ويتقبل منكم صيامكم مقدما ويتقبل دعواتكم
و كل سنه وانتوا طيبين تاني

سلام

انفجار وتخبيط

2009-08-03T05:01:00.002+03:00

من الاخر مدام لسه بتمد ايدك تاخد مصروفك من ابوك يبقي متعرفش معني المسئوليه الحقيقيه واللي عاملين فيها رجاله وهما لسه بيقولوا هات ياوالدي المصروف يتبطوا ويتكتموا ولحد لما تعرف هي ايه المسئوليه الحقيقه وتبقي قدها يبقي خليك في اللي انت فيه متتكلمش في حاجات متقدرش تعملها وحاليا منتش قدها

-------------------------

من حقك تحلم بس علي قدك و يكون لحلمك اساس عشان تعرف تحققه مش تحلم وانت نايم مأنتخ في بيتكم تحت التكييف قدام الدش والكومبيوتر وتقول نفسي ونفسي لو بتحلم وانت في الوضع ده يبقي الحلم ليك خساره

----------------------------

الرجوله اللي اهلك مستنيها منك مش ان تعدي سن الرشد و يطلعلك شنب في وشك يقف عليه الصقر ولا دقن تمشي فيها حشرات الدنيا ولا فنجريه بوق وصوت عالي

الرجوله اللي عاوزينها منك انك تستحق فعلا اللي بيعملوه علشانك وتبقي صورتك قدامهم دايما محل احترام وانك تبقي قدمهم الابن اللي بيتمنوه قلبا وقالبا

--------------------------

الي كل واحد بيزعل ابوه وامه ولا مش عارف قيمتهم و بيتخانق معاهم لو تعرف بيتعبوا عشانك قد ايه عشان تلبس اللي انت بتلبسه ولا تاكل اللي انت بتاكله كنت رويت بدمك الارض اللي ماشيين عليها ولا عمرك حتي هترد جزء من اللي بيعملوه

لكل جذمه ....ايوه جذمه خلي والدته في يوم تدمع ولا زعق لابوه ولا سخط عليهم روح بوس ايد امك وابوك وابكي تحت رجليهم عشان انت من غيرهم ولا تسوي وهتفضل طول عمرك جذمه

---------------------------

مش من حقك تحب مدام مش قد الحب ومش من حقك تطالب بيه وتقول من حقي مدام منتش قادر عليه والشباب التعبان اللي ماشي يحب علي روحه لما يا حضرت تبقي قادر تقف قدام ابوها وتقوله يا عمي انا اهو قدامك اقدر اعمل واعمل واعمل مش لسه بمد ايدي اخد مصروفي حتي ولو لسه في بدايه حياتك وهتتبهدل وهتتعب ساعتها بس ده يبقي حقك غير كده خليك في مزاكرتك منك ليه و بطل شغل افلام عبد الحليم وليلي مراد

----------------------------

يا كابتن انت وهو ياللي ماشي تبص علي بنات الناس وتعاكس دي ودي لو ليك اخت افتكر ان كما تدين تدان لو حتي مش هامك غض البصر ولا حتي خايف من عقاب ربنا علي الاقل خاف لا تترد في حد من قرايبك جتكم داهيه مليتو البلد <_<

---------------------------

وانت ياللي فاكر ان الشباب يعني تنطيط وتظبيط وروشنه و تهريج وقلش علي تفاهه وانتخه في البيت ياريت تفوق بدري بدري وتبص لدنيتك ولحياتك وتهتم باللي مطلوب منك في المرحله اللي انت فيها لان بعد كده هتفوق متاخر وتلاقي نفسك خسرت كتير

----------------------------

الناس اللي محتاجه تنضف وتغسل نفسها من جوه وبره بكلور وبرسيل و تنر وبنزين عشان قلوبها المنيله و السنتها الزفت اللي بقت مسيطره علي تعاملتهم وتفكيرهم اليومي ياريت تنضفوا بدري عشان بجد ريحتكم فاحت قوي

-------------------------

انا مش بطلب نكون زي عمرو ابن الخطاب ولا علي ابن ابي طالب بس علي الاقل نحسن نفسنا علي قد م نقدر ونعمل علي ده مش كل واحد يقول نفسي ويرجع لنقطه الصفر من تاني واللي مش حاسس ان فيه حاجة غلط يبقي هو الغلط نفسه لو دورت هتلاقي وحاولت تصلحه شوف انت مقصر في ايه في حق نفسك وحق اللي حواليك كفايه بقي واصحي من اللي انت فيه

-----------------------------

اللي معتقد ان هو الصح ورايه هو التمام وبيسفه ويتفهه من اراء اللي حواليه يريت يعدل مخه اللي متركب غلط ويفهم الناس بتقول ايه كويس مش لازم تكون انت الصح ومش لازم اكون انا الصح المهم النقاش ومحوره لكن متقاوحش في الحقائق والبينات وتقول اصل وفصل

-------------------------------

الناس اللي بتهيص مع الهيصه وملهاش راي والناس اللي كل يوم تطلع بمبدأ وتعمل عكسه بقولهم كلهم انا بحتقر اللي زيكم

--------------------------------

محتاجين نحس شويه باللي احنا فيه ووصلنا لحد ايه ولازم بسرعه نلحق نفسنا ونتدارك الموقف

------------------------------

اللامبالاه والسلبيه والكسل والتكاسل والفكر السطحي والاراء المستفزه لاصحابها الاكثر استفزازا في ستين داااااااااااااااااهيه

----------------------------

مش معني ان مجموعه من الناس متفقين علي حاجة ان الحاجة دي الصح ومش معني انها هي السمه السايده بين الناس والاشخاص ان ده التصرف السليم فكر بعقلك متمشيش ورا الناس زي القطيع وتقول اللي يسري عليا اهو ماشي عليهم

-----------------------------
الصحوبيه اللي تسحب لتحت مش ترفع لفوق متباقش صحوبيه تبقي قله ادب وتضييع وقت في كلام فارغ الصحوبيه اللي بجد اللي تعلي بالصحاب سوا وتوصل بيهم للرفعه والاحترام والمكانه العاليه
------------------------------

حبه كلام حبيت اقولهم لانهم جم في دماغي مره واحده وحبيت افضيها عشان اعرف ازاكر الكلام مش لحد بعينه ده لكل الناس اللي تحس فيها حاجة منه وانا معاكم

سلام والي لقاء قريب :)

شعور المطارد

2009-07-11T03:00:00.004+03:00

عمرك في يوم حسيت احساس المطارد ؟؟

احساس انك بتجري من حاجة و فيه حاجة بتطاردك

مش احساس انك بتقص الوقت و لا بتجري عشان تلحق حاجة لا دي شعور تاني مش هو اللي قصدي عليه

الشعور اللي قصدي عليه في البوست ده هو شعور ان فيه حاجة هي اللي بتجري وراك عاوزه تلحقك

اهو انا ساعات كتير بيجيلي الاحساس او الشعور ده

بحس اني بجري وفيه حاجة بتجري ورايا و انا بحاول اجري عشان متلحقنيش

ايه هي الحاجة دي ؟؟ معرفش مجرد ضباب بيطاردني وبيجري ورايا عاوز يحصلني زي الصوره دي

واقعد اجري اجري اجري بشكل فظيع مصحوب بقلق وخوف ان الحاجة دي تحصلني ايا كانت هي ايه لانها بالنسبالي مجهوله

بس ساعات كتير الضباب ده بيختفي لوحده و ابص ورايا الاقيه مش موجود و ساعات تانيه يرجع تاني .
لكن في اوقات وهو بيطاردني يبتدي يختفي واحده واحده وابتدت الصوره توضح ولو بشكل بسيط و ابتديت اتعرف علي الحاجة اللي بتطاردني

هي مش مجرد حاجة هي حاجات

ساعات بيكون
الوقت
مش موضوع اني مثلا مزنوق في حاجة مطلوب مني تخلص في فتره زمنيه معينه و انا بسابق عشان اخلصها لا
احساس ان الوقت بيجري ورايا ويعدي ويمر
ساعات كتير بفسر سببه ان جايز يكون المزاكره وضغطها لكن مببقاش مزنوق في المزاكره ولا حاجة بالعكس بيبقي معايا وقت كافي اني اراجع وازاكر مره واتنين ولكن احساس ان الوقت بيجري ورايا دايما بيوصلي ليه مش عارف

وساعات تانيه بتكون
الذكريات
ساعات كتير بترجع تطاردني من جديد وتظهرلي فجأه
ذكريات واخطاء و مواقف كتير بتظهرلي وتطاردني و احاول اجري عشان متحصلنيش
ده مش هروب علي فكره من الماضي لاني واجهت الماضي بكل اللي فيه وحش وحلو و وقفت قدام كل مشكله مريت بيها لحد لما انتهت ولكن مجرد انك بتفتكر انك عملت في ماضيك اخطاء صعب تنساها وتمحوها من زاكرتك ده في حد ذاته شبح بيفضل وراك طول العمر
حقيقي ان اخطائي مهما كانت مش كبيره ولكنها بالنسبالي كبيره لان فيه حاجات منها فعلا لما بقعد افتكرها بقول انا ازاي كنت كده ولا عملت كده و ايه اللي في الوقت ده خلاني اوصل للمرحله دي

وساعات تالته بيكون
الملل
وحش بيطارد مخيلتي و يلجم افكاري ويضيق نفسي ويحسسني بالروتين

واحيانا كتير بيكون
الكسل
بحاول اجري منه عشان ميلحقنيش صحيح ساعات كتير بيقفشني بس بحاول علي قد م اقدر اهرب منه ومسمحلوش يوصلي ويتغلغل جوايا و يضيع مني كتير

واهم واحد في ده كله
اليأس
اه لما بيجري ورايا بيقطع نفسي
اهو ده اكتر حاجة بخاف منها لما بتطاردني في يومي او حياتي
مجرد التفكير بس في انها ممكن تمسكني بيرعبني
لو وصلي هيثبط عزيمتي و يسلبني الدافع للعمل و هيقتل جوايا الامل

صحيح انا بحاول اجري من كل دول علي قد م اقدر بس شعور المطارد اللي بيجري يجري مش عارف هيقف امتي بيبقي جوايا كتير
و متهياليش اني هبطل جري لحد لما اموت
لان ميتهياليش ان الحاجات اللي بتطاردني دي بتختفي من حياتنا ولو حتي اختفت بيبقي لفتره مؤقته و ترجع تطاردك تاني والفتره اللي بتختفي فيها دي هي الفتره اللي انت بتكون قدرت تهرب منها كويس وتعمل الحاجات اللي متخليش اي حاجة من اللي قولتها تجري وراك
لكن بمجرد م تنتهي منها تظهرلك من جديد كل الوحوش دي و تطاردك من جديد

بوست ملخبط وعبيط؟؟
مش مهم
مجرد شعور بيجيلي كتير حبيت اشاركم فيه واقولكم عليه

وزي م عنوان المدونه بيقول

اهو اي كلام
:)

مش هي دي مصر

2009-07-01T23:45:00.006+03:00

طبعا كلنا سمعنا عن الفيلم الجديد (دكان شحاته ) للمخرج خالد يوسف
من حوالي اسبوع اتفرجت علي الفيلم ده ومن ساعه م شوفته وانا عاوز اكتب عنه بس انشغالي منعني وكمان عشان اتاكد ان كلامي اللي هقوله ده صح علي الاقل بالنسبالي
انا مش هعلق علي احداث الفيلم ولا علي الاخراج زي م معظم الناس بتعمل بس هقولكم علي نقاط معينه فيه
الفيلم كمجمل مش وحش بالعكس كويس علي عكس م كنت متوقع وانا بتفرج عليه
الممثلين كلهم ادوا الادوار باتقان وخصوصا عمرو سعد و عمرو عبد الجليل اللي كان فاكهه الفيلم و الجزء الكوميدي اللي بيكسر بيه التنشن في الاحداث و بصراحه اكتر شخص عجبني في الفيلم من ناحيه التمثيل
اما بقي السيده هيفاء وهبي فبالرغم من ان تمثيلها كان ضعيف و كان ممكن ان المخرج يجيب اي ممثله مبتدئه او مصريه ويديها الدور الا انها عملت الدور بشكل اعلي مما كنا نتوقع
الفيلم زي م قولت مش وحش الا ان الاستفاده اللي المخرج كان لازم يستفادها من وجود هيفاء في الفيلم و حشوه لبعض اللقطات الخارجه اللي ملهاش اي لازمه هو ده اللي بوظه وضره بجد
سبونا من هيفاء و الابطال و تعالوا نعرف علاقه العنوان بالفيلم والبوست
الاستاذ المخرج خالد يوسف في الفيلم بيتكلم عن مصر في السنه 2012 يعني كمان 3 سنين و بيحكي قصه عائله صعيديه
الفيلم انا شايفه مش بيمثل حال مصر ومش هي دي مصر
اولا: القصه صحيح واقعيه وهي ظلم الاخوات لبعضهم و خيانتهم واكلهم حقوق بعض ولكن الطبقه اللي هو جايبها والفئه ناس صعايده
وجايب هيفاء في الفيلم و ظاهرها انها بنت متحرره شويه لا شويه ايه متحرره كتييييييييييييييييييير يعني مع خطيبها يمسك ايديها و و و و

وانتوا طبعا فاهمين قصدي ايه

وطبعا الصعياده مش كده ابدا ولا دي صورتهم وانا اهلي صعايده واعرف بتكلم عن ايه

ثانيا: مبين ان مصر في الفتره الجايه انتشر فيها المجاعات والمصلحه الشخصيه اكتر من المصلحه العامه صحيح ده موجود حاليا لكن مش لدرجه ان الناس مش هيبقي همها علي بعض
صور ان المستشفيات هتقفل بوابها في وشوش المرضي عشان يخلصوا منهم والعلاج مش مكفي واهو العدد يخف
كمان الموز بيتباع بالواحده مش بالكيلو
و الناس بتقطع بعض علني ومبقاش في امن
وبيسرقوا الغلال و يقتلوا بعض عشان رغيف العيش
كل ده انا عارف ان ناس هتدخل تقول يا ديد مهو اصلا البلد حالها كل يوم في تدني و ده بيحصل اصلا مش لسه هيحصل
انا معاكم بس مش بالصوره دي
مش بالضرب بالمطاوي وان مصر بلد الامان تتحول لوكر عصابات و بلطجيه الكلمه السايده هي حد السيف والامن مستواه ينحدر
في اخر الفيلم جايب ان البلد خلاص باظت وان الارهاب انتصر وجايب ناس بجلاليب بيضه وبدقون و بيوقفوا واحد ومراته في الشارع عشان مش محجبه وبيغصبوها تلبسه وفي ايديهم سنج ومطاوي
يعني صور ان البلد هتوصل لدرجه ان الارهاب هيبقي ماشي كده في الشارع من غير م يعمل حساب لبوليس ولا امن دوله ولا غيره ويفرض رايه وبلطجته علي الناس حسب فكره وارائه
انا مش شايف ان دي مصر
من ايام الاحتلال سواء انجليزي ولا اسرائيلي ومن ايام الحكم الملكي و مع مرور مصر بكل اللي حصلها من احداث تاريخيه و اقتصاديه عمرها م وصلت للدرجه اللي المخرج شايف انها هتحصل كمان 3 سنين او حتي 10 ولا 15
يمكن جزء من اللي هو شايفه صح بس مش بالصوره دي
مصر صحيح مش بلد متكامله بس هتظل بلد الامن والامان
واهلها مهما كانوا لسه فيهم ناس كتير طيبين اكتر من الوحشين -الناس اللي تدي الغير و تيجي علي نفسها عشان مصلحه غيرها وتساعد بعضها وتشيل اللقمه من بوقها وتديها للمحتاج مش اللي تخطف الحاجة من ايديك وكمان تقطعها عشان تخدها
عمر شعبنا م كان كده
انا قولت اني عارف ان حال البلد مش اللي هو بس برضه مش متخيل ان الصوره اللي في الفيلم دي هي مصر
الفيلم فعلا مصور البلد وصله لحاله من القحط و الانحطاط و البلطجه بصوره كبيره
مصور ان الناس بتقتل بعض عيني عينك و الناس واقفه تتفرج ولا فيه بوليس ولا حد بيحجز وانا عارف ان ده حصل في اسكندريه بس دي حادثه واحده اول مره تحصل ومش بتحصل كل يوم
مش هو ده حال بلدنا
الفيلم برغم انه بيحكي احداث بتحصل بس بيصور صوره ميتهياليش انها هتحصل في يوم في مصر انا اول مره اكتب بوست عن فيلم واول مره اناقش موضوع بالصوره دي بس انا مبنقدش لا فنيا ولا سياسيا انا بتكلم عن بلد شايفها وعايش فيها وشايف انها مش هي دي اللي في الفيلم وجايز ناس تكون متفقه معايا وجايز ناس تعارضني

ودلوقتي الفيلم خلص و كله يلا يروح بيته و هنور نور الصاله

قصدي المدونه :D

يلا سلام

تباديل

2009-06-27T01:19:00.001+03:00

في حياتنا حاجات كتير بتتبدل و حاجات كتير بتاخد اماكن مختلفه و مراتب معينه
حياتنا في تكوينها عامله زي المكعب ده
متكون من مكعبات صوغيره ملونه
واحنا طول حياتنا بنركب فيه عشان نعرف نحل اللغز والفزوره
واثناء حلنا للمكعب بنبدل لون مكان لون نجيب الاحمر فوق والازرق تحت لا الابيض في اليمين لا لا في الشمال و الاصفر في النص و الاخضر ده يبقي في تاني صف وهكذا واللون الاخضر مثلا النهارده في تاني صف بكره يبقي في الاول ولا التالت ولا الرابع الخ
كل ده عشان نوصل بيه اننا نكمل الالوان و نرتبها صح
وحياتنا فعلا قريبه شويه من كده
طول الوقت حاجات فيها عماله تتبدل سواء اولويات او فكر او حتي اشخاص
وتبادل الاشياء ساعات بيكون شيء طبيعي ناتج عن تغير الوقت والزمان والمكان وساعات تانيه بيكون بايدك عشان توصل للاحسن و للصوره المطلوبه
يوم عن يوم الالوان بتبدل و تتلخبط و تترتب ومعاها تفكيرنا واهتمامتنا
ناس بتختفي من حياتنا وناس بتجد فيها و ناس بتاخد مرتبه اعلي من اللي قبليها وناس بتتصدم فيهم وناس لفقدانهم بنبكي عليهم
و انت نفسك مش بتفضل في نفس المكان النهارده عاوز كذا بكره لا عاوز كذا وممكن تكون لسه محققتش هدفك الاولاني الا ان اولوياتك بقت شيء تاني
بس مش دايما التبديل في المكعب بيوصل بيه انه يترتب صح لا جايز يلخبطه اكتر من الاول وجايز يعقده زياده و تحتاج وقت اكتر عشان ترتبه من جديد
بس مش مهم هياخد وقت قد ايه مدام الوقت مش هيطول ولا هيفوت الاوان
المهم انك ازاي تمسكه صح وتبدا في الترتيب
وانك تبتدي فعلا في الالوان وترتبها
ممكن في اثناء ترتيبك للون تلاقي لون تاني اترتب بكل سهوله غير م كنت متوقع انك هتتعب فيه
وجايز التالت كمان يترتب وراه
وجايز اصلا وانت بترتب لون معين اللون التاني يترتب قبليه
وهنا بيلعب عامل الصدفه و التوفيق من عند ربنا و القدر دور كبير
في الاخر هو مكعب الوان متلخبطه ومتبعتره والحياه مواقف و احداث منفصله او مترابطه وساعات متكرره

ها فهمتوا حاجة ولا كعاده تدويناتي بتبقي ليكم دايما مشبره
هههههههههههههههههه

انا اتسرقت

2009-06-20T03:10:00.003+03:00

ثواني انا متسرقش مني فلوس ولا اتسرق مني عربتي (مع اني معنديش عربيه)
اللي اتسرق مني تدويناتي

وكانت ريهام صاحبه مدونه همسه حب
عامله تدوينه عن الموضوع ده وبقولها اهو ياريهام جت فيا انا كمان :(

وانا بدور علي النت وبكتب اسامي تدوينات معينه كنت كتبتها في قسم خواطر ميت من مده قولت اشوف كلام ريهام ده يمكن حصل معايا لقيت ناس كتيرفعلا سارقه التدوينات دي
منهم اللي كاتبها في منتدي ومش قايل بتاعت مين وده كنت بقول عادي ياعم مش مشكله اهو الواحد بيتعرف ههههههههههههههه

لكن اللي استفزني وخلاني اعمل الموضوع وكمان اني هدخل ارد عليهم ان واحد خد بوست حكايه قلب
عندي في المدونه وحور فيه وزود عليه حاجات ونسبه ليه وده اللينك
http://elmadridi.great-forum.com/montada-f51/topic-t2397.htm

و انسه تانيه خدت تدوينه ساعات
بتاعتي بالصوره كمان وقالت انها اللي كاتباها وبتتلقي تهاني عليها :D
http://www.crezeman.com/vb/showthread.php?p=593553#post593553

و تدوينه انعزال
http://www.7lmena.com/forum/index.php?showtopic=22447&start=0&
p=305585&#entry305585

و ماذا تريدين
http://ahsaweb.net/vb/showthread.php?s=6db54a3f291e2af7062a2b2533a6f1ae&p=1878885#post1878885

ده غير تدوينه رباعيات ميت اللي بنت خدتها و نسبتها للمؤنث وقالت رباعيات ميته
وهنا صاحب الموضوع افتكرها رباعيات جاهين
:D
http://www.rozaya.com/board/index.php?showtopic=10268&mode=threaded

وغيرها

انا عارف ان واحد هيقولي م يسرقوا ياعم هي يعني كتابات العقاد ولا نزار قباني ولا يكونش انت فاروق جويده

ياعم انا محصلتش ولا واحد من دول ولا حتي لبيسه قلم من اللي كانوا بيكتبوها

لكن التدوينات ايا كانت اللي المدونين بيكتبوها بتبقي حاجة عزيزه عليهم كل تدوينه ليها موقف وليها ذكري ليها قصه وليها فكره
مجرد ان يجي شخص تاني يخدها ويقول انها بتاعته دي حاجة تألم
انا ميهمنيش انه يقول انها بتاعتي ولا يقول ايه مصدرها وياخدها يحطها مطرح مهو عاوز ولكن مينسبهاش ليه
وميقولش شكرا علي مرورك الجميل علي موضوعي ولا يتقبل التهاني علي التدوينه
لان التدوينات دي مش مجرد كلام علي صفحه انترنت وخلاص كتبناه ومر مرور الكرام
كل بوست هنا في المدونه دي وكل حرف ليه عندي حكايه و خد مني وقت سواء تفكير او كتابه ومش انا بس كل المدونين
عالم المدونين غير عالم المنتديات
ده عالم خاص بنفسه قافل عليه بابه وان كان مفتوح علي بعضه
خاص مستقل بذاته
لما نخرجه للناس من مكمنه عشان يشوفه نخرجه زي مهو من غير تشويه ولا بهدله
انا مبكبرش الموضوع وعارف انه جايز لناس كتير ميستهلش بس انا دمي اتحرق عشان فعلا لقيت ناس بيتقالها سلمت يداكي واحساسك رائع و حاجات كده كتير و بيردوا عادي ويقولوا شكرا وانتي الاكثر احساس وبتاع كانها فعلا بتاعتهم
انا بس بستغرب الحكايه دي وان اغلبهم بنات مش ولاد
وازاي سامحين لنفسهم ينسبوا تعب شخص تاني ليهم
ذكريات انسان اخر و مشاعر واحسايس تتاخد وتتحط علي منتدي ويتحور فيها ويتقال عليها بتاعت شخص تاني
طيب ازاي
مفيش احترام لاحساس ولا شعور
انا رديت علي بعض منهم ردود عاديه وقولت ان الحاجات دي بتاعتي و بعد كده ياريت الناس تبقي تقول ده لما تاخد تدوينه من اي مدونه علي النت وتنشرها

وانا قولت اعمل البوست ده عشان اوريكم مثال للي بيحصل وااكد علي كلام ريهام في تدوينتها الاخيره و كمان عشان ميجيش واحد في يوم يقولي انت سارق التدوينات دي من فلانه وانا قريتها عندها قبل كده

خدوا بالكم من تدويناتكم :)

سلام والي لقاء قريب :)

مش هي دي الطريقه

2009-06-11T02:50:00.006+03:00

جميل اننا نحب والاجمل اننا نتحب والاجمل والاجمل ان الحب يكون متبادل
ثواني انا مقلبتش اسامه منير و شويه شويه هنزل بالدباديب ولا اشغل ميوزيك رومانسيه في الخلفيه

مع ان فيه ميوزيك شغاله ههههههههههههه
لكن انا هتكلم عن موقف ما ..شوفته كتير قدامي والموقف مش رومانسي ولا حاجة

طيب ارغي ياعم
بالراحه شويه حاضر جايلكم في الكلام اهو

انا قولت جميل انك تحب وتتحب والاحلي من ده كله ان الانسان التاني ده يبدا معاك مشوار حياتك من البدايه وتبنوه طوبه طوبه
لكن
فيه ناس بتدور علي الحب في كل مكان وبتستني اي فرصه يتهيالها منها ان ده حب وتمسك فيها وتحورها وتكبرها وتفتكرها حب
مش عشان نفسه يبقي معاه حبيبه ولا خطيبه ولا غيره ويبقي زيه زي صاحبه بتاع الجامعه الفلانيه اللي مقضيها ..بالعكس
الشخص بيبقي ملتزم جدا ونفسه فعلا يرتبط بالانسانه اللي تبدأ معاه مشوار حياته
لكن تاني
مش هي دي الطريقه
مش اي حد قدامنا نحس فيه انه شخص كويس و فكره عظيم نفكر فيه من الناحيه دي
مش عشان نفسنا حياتنا من بدايتها تكون مشاركه مع شخص تاني يبادلنا نفس المشاعر والاحاسيس يبقي ندور علي الحب والشخص منين م نروح ونتعامل
مش هي دي الطريقه
الموضوع مش مجرد انسان كويس فكرا واخلاقا ودينا و شكلا
الموضوع موضوع احساس وشعور قبل اي حاجة تانيه وفي الاول والاخر نصيب ومش صح انك تبني مشاعرك وتكبرها علي احساس صوغير انت فاكره انه حب
انا شوفت كذا حد اعرفه سواء قريب او لا بيسلك الاسلوب ده
انه ارتبط بانسانه ما و بعد كده محصلش نصيب شهر والتاني ويفكر في انسانه تانيه بس مش عشان هو زي م قولت بيدور علي الحب من باب الموضه ولا من باب النسيان اللي ينسيه اللي قبليها لا عشان عاوز حد معاه في حياته ويشاركه فيها
بصراحه انا لما اتناقشت معاهم ملومتهمش لاني قولتلكم انه جميل ان يكون معاك حد يشاركك دنيتك من بدايتها وتعيشوا لحظه بلحظه مع بعض من وانتوا شباب لحد لما تكبروا تعجزو وشنانكم تقع ههههههههههههه

طيب وفيها ايه يا جاد مدام الشخص نيته خير ونفسه فعلا يستقر و داخل البيت من بابه ؟؟
مفيهاش حاجة وربنا يتممله بخير لكن انا وقتها حسيت ان الشخص ده كده مش عارف يحب اصلا واتحول الوضع الي جواز صالونات تقليدي ونظام خاطبه وخلاص انسان بيدور علي عروسه و همه كله حد معاه وماشي بمبدأ البنات كتير ولو مش دي يبقي غيرها
وجايز خوفه من انه يواجه المستقبل لوحده مخليه دائم البحث والفحص والتدوير علي الانسانه المناسبه
وجايز برضه انه عاوز حد ينشرله الغسيل
هههههههههههههههههههههههه خفه <_<

طيب مدام يا جاد انت مش بتقول ان ده غلط ايه بقي لزمته البوست
كل الموضوع اني حاسس ان مش هي دي الطريقه فعلا زي عنوان الموضوع
مش منين م انا رايح بدور علي حد
مش في كل قاعده وكل مكان احس ان فلانه مناسبه ولا غيره
مش اي بنت لاحظت فيها مواصفات معينه اروح اتكلم معاها واجرب ليه لا الموضوع مش تجربه عمال علي بطال واشوف يا صابت يبقي خير وبركه ولو خابت يبقي مخسرتش حاجة
انا مقتنع ان النصيب نصيب واول لما بيجي محدش بيتدخل و ان الانسان ميدورش علي نصيبه بالمنظر ده بالعكس هيجيله لحد عنده لكن عليه بالصبر لكن الوضع والاسلوب ده

مش هي دي الطريقه :)
معرفش بالظبط الموضوع صح كده ولا لا بس البوست من وجهه نظري

انتوا ايه رايكم؟؟؟ :)

اللي اتلسع من الشوربه

2009-05-23T02:27:00.004+03:00

ورررررررررجعتلكم تاني بعد غياب طويل صحيح ارتحتوا مني شويه كتير بس مفتقد المدونه جامد جدا قوي خالص موت طحن هبد رزع
اكيد وانتوا مفقتدكم طبعا ومفتقد كتباتكم وتدويناتكم مع اني شايف حاله ركود تدويني في المدونات اللي لينكاتها عندي ...معلش الغيبه كانت عشان الفراغ التدويني وشويه مشاكل في النت وكمان بسبب النسا والولاده اللي مش مدياني فرصه افكر في حاجة ولا في اي موضوع وربنا يستر عليا منها يا هتخلص عليا يا هتخلص عليا :(

المهم
انتوا ايه اخباركم كويسين ؟ طيب الحمد لله يارب دايما
وايه اخبار الصحه ؟ يارب كده بمبم كالعاده من غير قر والله
وايه اخبار الاولاد للي عندهم اولاد ؟ يارب يكونوا بخير

شوفتوا غبت غبت ورجعت بصوره تفتح النفس اهو طبق شوربه فراخ بالكريمه هو صحيح معرفش بتتعمل ازاي ولا الاتنين بيتاكلوا مع بعض ازاي بس ده اللي لقيته في وشي وانا بدور علي صوره للبوست وقولت احطه يمكن حد يعجبه الاسم ويعرف الطريقه ويعملها ويبعتلي طبق :P

البوست ده تبع قسم اللي قبلينا قالوا ايه ؟ اللي في المدونه لان دايما كلام اللي قبلينا حكم والله

طبعا العنوان واضح
(اللي اتلسع من الشوربه... ينفخ في الزبادي)

ايوه وبعدين بقي ماله العنوان م عارفينه وحافظينه

بالراحه طيب عليا انتوا لسه حمقيين كده زي م انتوا :D
انا عارف انكم عارفين المقوله ولا المثل ده وانه معناه ان اللي حصل معاه موقف او اخطأ مره بيخاف بعد كده وياخد حذره في حياته عشان ميكرروش
بس واخدين بالكم من الزبادي ؟؟؟
هههههههههههههههههه
قصدي انه بياخد حذره حتي من الحاجات اللي متحتاجش ده
انا قصدي ايه عشان مطولش عليكم طيب
انا اللي عاوز اقوله ان ساعات الانسان لما بيتلسع من الشوربه بينفخ في الزبادي والمربي والجبنه والعصير وكل حاجة
يعني؟
يعني بيحتاط بشده في اللي جاي وبيكون حذر جدا لدرجه ان احتياطه ده ممكن يضيع منه كتير قدامه

انا مبلموش علي فكره علي حذره ده بالعكس ده حقه ان ده يحصل لانه بيخاف يكرر نفس الخطأ مره تانيه وخوفه ده بيمنعه من انه ياخد خطوات كتير في حياته وياخره في وقت بنحتاج فيه المغامره مره تانيه عشان نكمل الخطوات دي ونكمل الطريق

الحياه مليانه كتير مواقف بنغلط فيها ومواقف بنكون صح والمواقف اللي بنغلط فيها بنتعلم منها وجميل اننا نتعلم من اخطأنا دي ونستفيد منها ونستخدم الاستفاده دي بعد كده في حياتنا ...بس من غير نفخ في الزبادي من غير الخوف من الحاجات اللي ميتخافش منها من غير اننا نخاف نكرر الخطأ لدرجه اننا نقف مكانا منحركش ونخسر حاجات قدامنا كتير وفرص اكتر

قبل لما تنفخ في الزبادي وخايف تكون سخنه زي الشوربه بص عليها كويس شوفها زبادي ولا لا اسال اللي جنبك ياعم الحاج دي شوربه ولا زبادي استشير خد الاراء عشان تطمن انها مش هتلسعك لكنك متقفش خايف منها كده

البوست مليان شوربه علي زبادي لحد لما جوعتكم كده هههههههههههههه معلش بس انتوا عارفين لما مبكتبش كتير دماغي بتبقي عامله زي طبق المكرونه الاسباجتي بجمله طبق اليوم اللي فتحته في البوست ده
ههههههههههههههههههههههههههههههه

معرفش الموضوع والمقوله دي جم في دماغي ليه فجأه وحبيت اشاركم فيهم

بس يمكن عشان شوفت ناس كتير فعلا حواليا بتنفخ فعلا في الزبادي ويمكن عشان انا نفسي كنت بنفخ فيها
:D
سلام والي لقاء قريب :)

تاج 2

2009-04-28T04:29:00.003+03:00

السلام عليكم

ازيكم يا مدونين وعاملين ايه

معلش علي الغيبه بس انتوا عارفين مبكتبش الا لما تكون في دماغي حاجة بحاول استفسر عنها معاكم

المهم ده تاج جالي من بندقه صاحبه مدونه

simply me
وهي بتقول بعتاهولي غلاسه مش اكتر :)

وكمان من ريهام العربي صاحبه مدونه

همسه حب

هو انا عملته قبل كده تقريبا لما المدونه دي اتمسحت في مره وراح مع التدوينات اللي كانت فيها

بس قولت اعمله تاني

بسم الله نبدأ

اسمك؟

محمد

المشهور بيه وسط صحابك ؟

جاد وفيه اللي بيقولي يا ديد ده اللي يعرفني من المدونه او النت لكن الاغلبيه بيقولولي جاد

سنك؟

23 سنه

يلا عجزنا بقي وحسن الختام ههههههههههههه

مجال دراستك؟

كليه طب بشري

هعمل ايه بقي قدر واتكتب عليا :(

اسم مدونتك؟

اهو اي كلام

صورتك الرمزيه في المدونه بتعبر عن ايه؟

في الاول كانت صوره جمجمه في الرمل عشان كنت في مود سيء للغايه والحمد لله خرجت منه

وبعدين غيرتها للصوره دي وهي صوره واحد حر علي البحر باصص للسما وعنده امل ويمكن حاطط تحتيها جمله انا كنت ميت وصحيت عشان تعبر عن كنت ازاي وبقيت ايه وفكرت كتير اغير الاسم بس خلاص اتعرفت بيه :)

هل فكرت في اغلاق المدونه؟؟ والسبب؟

قفلتها مره وراحت هي وكل البوستات اللي فيها والسبب كانت ظروف ومشاكل حصلت السنه اللي فاتت خلتني بعدت عن التدوين ومحبتش اني اكتب اي حاجة وكنت كاره الكلام حتي مع النفس فقفلتها بس رجعت فتحتها تاني من فتره وضميت عليها مدونتين تانين سكيزوفرينيا و خواطر ميت

ايه رد فعلك لو حد قل ادبه في تعليق؟

محصلتش الحمد لله بس لو حد بينتقد بتقبل ده بصدر رحب لكن لو شتيمه وكده دليت علي طول للكومنت ولا كانه اتكتب

اسوا مدونه؟

في راي اي مدونه بتبقي حلوه مدام بتعبر عن صاحبها وبيكتب فيها ويفضفض ويعمل فيها حاجة بيحبها

لكن المدونه اللي تبقي معموله لغرض شكل مش اكتر وتحصيل حاصل مبحبهاش والمدونه اللي محتواها سيء سواء كلام او افكار

هيحصل ايه للايميل بعد لما تموت؟

هيعدي عليه فتره و الشركه هتعمله دي اكتيفيشن و يتمسح بس ابقوا افتكروني :)

اديت الباسورد لحد قبل كده؟

لا محصلتش مش ناقصه يهم

السفر بالنسبالك ايه؟؟

ياااااااااااااااااااااه

نفسي اسافر حلم حياتي بزاكر واتعب و عاوز اتخرج عشان اسافر بحب السفر للسفر مش اكتر مش للفلوس والشغل لكن لمجرد اني اسافر

هتسالني ليه؟؟ عاوز اشوف ناس غير الناس واتعامل مع بشر تانيين صحيح هما بشر بس عاوز اشوف تفكير وثقافات ناس تانيه و اشوف بلاد واماكن

بجد حلم ويارب يتحقق

الموود بتاعك ايه ؟

حاليا هاديء ثابت متوازن

قبل كده كان حزين مكتئب

وزمااااااااااااااااااااااان كان عصبي جداااااااااااااااااااا

بتعمل ايه في وقت فراغك؟

بقعد علي النت او اتفرج علي افلام وساعات بقعد اصمم حاجات بالفوتوشوب او اقرا كتاب بس مش دايما

الاكله المفضله؟

صينيه البطاطس في الفرن والمكرونه البشاميل

وطبعا طبعا طبعا المسقعه

ههههههههههههههههههه

الصفات اللي خدتها من والدك؟

التفكير بمنطقيه والعصبيه و حب مساعده الغير مدام اقدر والتواضع لله

الصفات اللي خدتها من والدتك ؟

الابتسام والهدوء ( مش دايما يعني)

والنظااااااااااااااااااااااااااام والترتيب والانتظام في المواعيد

اكتر 6 حاجات بتكرههم؟

الاستفزاز

الغباء

سوء الظن بالغير من غير اساس

الحكم علي الاشياء من الخارج

الخيانه

اسرائيل وايييييييييييييييييييييييييييييييييه

هههههههههههههههه

اكتر 6 حاجات بتحبهم؟

ربنا واهلي بس دول مش حاجات

لكن حاجات

الهدوء

والليل

واللون الاسود بعشقه جدا ومتقوليش كئيب ومش عارف ايه

الكومبيوتر بتاعي بيستحملني كتير والله وبيصعب عليا

المرح ورسم الضحكه علي الوشوش

سلسله مفاتيحي :D

شخصيتك نوعها ايه ؟؟

ممممممممممم هاديء بس عصبي وعصبيتي مبتطلعش بسهوله

مرح مبحبش الكوبب كده والرخمين

سلسل واجتماعي بحب اكسر حاجز الخوف في المعامله مع الناس وخصوصا الاصغر في السن

لكن الحاجة اللي اتقالتلي دايما اني دايما غاااااااااااااااااااااااااااااااااااااااااااااااامض

ومش عارف ليه مع اني صريح

لماذا دخلت عالم التدوين من الاساس؟

فتره جات كنت عاوز اكتب و اكتب وافرغ اللي جوايا كتير ومش هتصدقوا لو قولتلكم انا مش فاكر عرفت التدوين منين اصلا

اجمل جمله قيلت في وصف مدونتك؟

ناس قالت كلام كتير حلو واي واحد بيقول اي حاجة عن المدونه بعتبر رايه مهم عندي ولكن دايما كلهم بيتفقوا ان الميوزيك اللي فيها تحفه

ههههههههههههههههههه

اجمل بوست كتبته ثم ضع اللينك ثم اذكر لماذا؟

اجمل بوست كتبته هو

مبنلفش في دواير

وبوستات قسم جادوفرينا في المدونه

ليه بقي؟

الاول عشان كنت محتاج ابين اننا مهما بيحصل في حياتنا عمرنا م بنرجع لنقطه البدايه تاني ولو حتي معنويا مش ماديا والاغنيه دي كانت معلقه مع ناس كتير وكتبوا عنها كتير في المدونات فحبيت اتكلم عنها من ناحيه تانيه يعني نص الكوبايه المليان زي م بيقولوا

وبوستات جادوفرينا لانها بتعبر عن ناس كتير وان كنت واحد منهم

افضل مدونه قراتها؟

كتييييييييييييييييييييييييييير تقريبا كل اللي عندي في الجنب دول

افضل بوست قرأته؟

بتسالوا اسئله غريبه والزاكره مبقتش زي زمان ومش قادر افتكر والله

بس بجد والله في كل مدونه من اللي في الجنب دول بوست معين يعتبر من اجمل اللي قريته علي النت

الشغل بالنسبالك ايه؟

لسه مجربتوش بس هانت كلها كام شهر وهشوف ايه النظام بس هو بالنسبالي بدايه لتحقيق احلامي ولتحقيق ذاتي واكمالها :)

الانترنت بالنسبالك ايه؟

حرامي

هههههههههههههههههه

سرق وقت كتير قوي مني وضيع مني كتير بس فادني اكتر وعلمني حاجات كتير ونمي فيا قدرات اكتر واكتر وبجد مبعرفش استخدم الكومبيوتر من غيره دلوقتي

تمرر التاج ده لمين؟؟

للي يحب يخده عنده

تاج لذيذ وجميل ويارب اكون جاوبت اجابات صريحه و خفيفه علي قلوبكم وعنيكم

سلام مؤقت والي لقاء قريب

احتـيـــــــــــــاج

2009-04-15T19:01:00.003+03:00

ازيكم يا اجمل مدونين ؟؟
معلش علي الغيبه اللي مش طويله بس اهو بريحكم من مواضيعي وصداعي شويه
:D
اصل بغيب اغيب وبرجع ببوست ملخبط يوجع الدماغ
العنوان المرادي واضح اهو ومش معقد ولا فلسفي ولا حاجة
احتياج
البوست هيبقي متضمن مشاعر واحاسيس بنعيشها كلنا
بالاخص في فتره الشباب واللي لحظتها في ناس كتير حواليا وكانت فيا ايام م كنت شباب ههههههههههه
اه اصل الواحد عجز خلاص
اللي لاحظته اننا دايما في حاله احتياج
طيب احتياج لايه؟؟ لكل حاجة
دايما بندور وندور وندور حتي لما بنلاقي اللي كنا بندور عليه بندور علي حاجة تانيه
مش موضوع ان الانسان بطبعه طماع ولا البحر بيحب الزياده لا بس كله ان الانسان دايما في الفتره دي بيبقي في حاله احتياج لحاجات كتير شايف انها نقصاه
حاجات مش بس ماديه لا كمان معنويه
محتاج لحنان و محتاج لحب ومحتاج لصداقه ومحتاج لامان ومحتاج لاهل ومحتاج لهدوء ومحتاج لفرح و انبساط
دايما دايما بيلف ويدور حوالين نفس المعني وهو الاحتياج
والمشكله اننا دايما مش بنعرف نرضي احتياجتنا دي بنفسنا
بنبقي عاوزين صوره معينه في خيالنا عن كل حاجة و بنحاول نوصلها في حين اننا ممكن نقدر نكونها من اللي متاح حوالينا
والمشكله التانيه اننا في سننا ده مش عارفين نتعامل مع دنيتنا كويس و بتخبط فينا يمين وشمال ومنين م نروح و نحس ان الدنيا بقت غابه وان خلاص مينفعش فيها الانسان الطيب ولا الكويس ولا المشاعر وخلاص احنا ملناش مكان
و اللي يقول انا اتالمت كتير وانا اتكسرت وانا وانا وانا عشان مواقف حصلتله ومر بيها
وتبص حواليك تلاقيه لسه في العشرينات
بس هو ده سن التخبط وعدم الاتزان
ده السن اللي فيه بتتكون شخصيتك اللي هتفضل معاك
ده السن اللي فيه بتقدر تعرف هتمشي ازاي في دنيتك
فيه مننا اللي بيفهم الدنيا صح ويقدر يتعامل بدري بدري معاها وبيعرف انها مش وحشه ولا حاجة وانها متغيرتش وهي هي في كل عصر وكل زمان
وفيه اللي بيعيش في زمانه اللي في خياله زمن الحلم الجميل وبيفهم الدنيا متاخر
الفرق بين الاتنين ان الاولاني عرف ازاي يتعامل مع الوضع الحالي والتاني سايب نفسه
انا زي م قولتلكم احنا دايما في حاله احتياج لحاجات كتير قوي

بس اللي احنا محتاجينه اكتر من ده اننا نتعلم ازاي نتعامل مع الدنيا اللي احنا فيها والاوضاع اللي بنمر بيها
محتاجين نعرف نفرح من غير عكننه تنغص فرحنا ومحتاجين منتكسرش بسهوله قدام اقل مشكله ومحتاجين ندور علي نفسنا و علي اللي بيريحنا من غير م نيجي علي حد ولا يهمنا راي الناس فينا مدمنا متاكدين اننا صح بس المهم اننا نكون فعلا صح ومحتاجين نتعامل بتربيتنا واخلاقنا وطباعنا من غير م نهتم باذا كان ده ينفع في زمانا ده ولا لا
ولا ان زمانا ده محتاج الجامد اللي ميعملش حساب لحاجات كتير عشان يقدر يعيش
بالعكس انت لو انسان جميل خليك زي م انت ملكش دعوه بالزمن عاوز ايه اتصرف من منطلق اخلاقك و تربيتك و متستناش مقابل للي بتعمله وميهمكش الزمان ولا المكان
جمله بقولها لحد عزيز عليا بقوله دايما
Be yourself

ولو بتدور علي حاجة ومفتقدها دور كويس وهتلاقي انك ممكن تلاقيها في حاجات كتير حواليك
معاكم ان فيه حاجات متتعوضش من اللي حواليك بس علي الاقل بتسد جزء منها
لو محتاج حنان دور ممكن تلاقيه في مين
لو محتاج صداقه دور مين اللي يقدر يديهالك
لو محتاج حب دور هتلاقيه مش شرط في شخص واحد
والفرح دور علي اللي يسعدك واعمله
شوف ايه اللي حواليك ممكن يسد احتياجك من كل ده

وفي نفس الوقت حاول تعيش في دنيتك راضي ومبسوط باللي في ايديك واللي حواليك ايا كان قليل ولا مش اللي بتتمناه
السعاده دايما هتلاقيها لما تقول دايما الحمد لله و ترضي باي شيء حصل

يعني من الاخر احنا مش محتاجين بس اننا نعرف نتعامل مع دنيتنا

لا احنا محتاجين نكون راضين بحالنا و نعرف ازاي نتاقلم علي الاوضاع
:)

I'd rather feel pain

2009-04-08T01:45:00.003+03:00

ازيكم يا احلي مدونين غايب بقالي فتره معلش شويه لخبطه في النت ومفيش مواضيع في دماغي
بصو كده الصوره و الجمله دي

I'd rather feel pain than nothing at all

ايه رايكم فيها ؟؟
ايه رايكم في الانسان اللي بيفضل انه يشعر بالالم علي انه ميحسش بحاجة خالص
متفقين معاها ؟
اكيد ناس هتعارض و ناس جايز تتقبلها
واللي هيعارض هيقول لاني مقدرش اعيش كل حياتي في الم و تعب انا عندي اني محسش بحاجة خالص اريحلي و احسنلي
لكن عارفين انا رايي ايه ؟؟
قول يا فلفسوف عصرك واوانك
انا متفق معاها وهقولكم ليه
انا افضل فعلا اني اشعر ولو حتي بالالم علي اني محسش بحاجة خالص لان طول م انا بحس بده اعرف اني لسه حي اني لسه جوايا شعور ومشاعر ان لسه جوايا احساس يعني من الاخر اني لسه
انسان
عدم احساسي باي شيء حواليا هيحولني لمجرد جماد ..مجرد تمثال شمع او عروسه ماريونيت بتتحرك من غير مشاعر ولا احاسيس
هيمحي من وشي اي تعبير و هيبقي التعبير الدايم علي وشي هو اللا تعبير
جايز ان ده بالنسبه لناس كتير احسن من الشعور بالالام و مريح للفكر و للجسد
ولكن في ظل زحمه الحياه و عدم احساسك اللي اتولد جواك هتلاقي نفسك بتدوس علي حاجات كتير و ناس كتير جايز متستهلش
ومش هتحس بيهم لانك فقدت الاحساس بكل حاجة حتي الالم
الالم اللي هتحسه برغم صعوبته وقسوته هو نفسه اللي هيخليك تحس بغيرك لو مكانك و هيخليك دايما شايف اللي في عيون الناس
الكلام ملخبط كالعاده وجايز مش منطقي بس عشان مفيش في دماغي حاجة و جمله سمعتها و حبيت اشاركم فيها
و حبيت اني اشوف رايكم

:)

مبنلفش في دواير

2009-04-01T22:45:00.005+03:00

ملحوظه البوست ده قديم كان في مدونتي اهو اي كلام القديمه قبل لما تتحذف و حبيت بس انه يبقي موجود في المدونه دي كمان لانه حاجة بعتز بيها يعني عشان الناس اللي قريته قبل كده تبقي واخده بالها
:)

بنلف فى دواير ... والدنيا تلف بينا
ودايما ننتهى ... لمطرح ما ابتدينا
طيور الفجر تايهه
فى عتمة المدينة
بتدور

اغنيه لمروان خوري في شريطه الجديد و اتغنت في فيلم اوقات فراغ وطبعا الكلمات للشاعر الرائع الجميل
عبد الرحمن الابنودي
الاغنيه دي تقريبا اتعمل عليها بوستات من معظم المدونين ولما عملت بحث في النت عن صور باسم دواير وكمان عن الموضوع ظهرلي كميه بوستات كبيره

مش مهم وايه يعني
اصل كل واحد تناول الاغنيه ( يعني كتب عنها مش اكلها عشان الذكاء بس) بمنظوره الخاص
بس الشيء المشترك اللي بينهم انهم بيشرحوا الكلمات و بيعلقوا عليها واللي يقول جميلة و كلمات معبره واللي يقول فعلا ده حقيقي واللي يفسر الكلمات تفسير حلو جدا و واحد يقول الكلمات دي بتعبر عن حالي وغيرهم
بوستات كتير اتكتبت عنها ويمكن اللي بيقرا البويت ده كمان عمل بوست عنها

طيب انا بكتب انا كمان بوست ليه ؟؟ غيره مثلا منهم
لا انا بكتب البوست ده عشان الشيء اللي لاحظته بين كل المدونين وغير المدونين اللي كتبوا عنها انهم فسروها تفسيرات حزينه و محبطه
تعالوا اقروا اول كوبليه فيها كده وركزوا ......ها فهمتوه كويس
المعظم هيقولي وفيه ايه مهو كل كلمه فيه صح ومعبره
لا الكوبليه ده مش صح انا مش مقتنع بيه.... هيطلعلي واحد تاني ويقولي يعني انت عتعدل علي الابنودي يا فالح
اقوله انا مش بعدل ياعم متتحمقش قوي كده بس انا شايف ان عمرك م بتنهي لمطرح م ابتديت
بتلف اه بس عمرك م هتلاقي نفسك في نفس المكان
ولو في نفس المكان بجسمك و حياتك زي م هي هتلاقي عقلك نفسه مش في نفس المكان
اي موقف بتمر بيه لازم هيسيب جواك علامه سواء في قلبك او في عقلك وده في حد ذاته مش هيخليك في نفس المكان
اي صدمه خدتها ولا حكايه فاشلة ولا وقوع و هبوط مش هيخليك في نفس المكان
اي جري ورا شغل و تعب و عمل وفشل برضه مش هيخليك في نفس المكان لان زي م قولت بيسيب جواك علامه ولو حتي انت مش واخد بالك منها
حبيت وحبك فشل ورجعت تاني لوحدك بعد لما لقيت الانسان اللي كنت بتحلم بيه ماشي بس رجعت ودماغك فيها افكار كتير واتعلمت اكتر من اول مره
بتشتغل و بتلف وبتجري عشان تكون نفسك وتلاقي نفسك في الاخر مش قادر تعمل حاجة في ظروف المعيشة اللي بتزيد يوم بعد يوم ماشي بس علي الاقل اكتسبت خبره في التعامل مع الناس والحياه و التصرف في المواقف المختلفة
وامثلة كتير لو فكرتوا فيها هتلاقوا ان كلامي فيه شيء ولو بسيط من الصحة
انا معاكم ان فيه ناس بترجع لمطرح م ابتدت حتي بدماغها بس دي ناس خايبة من الاخر لان اللي يدخل اي موقف او اي اختبار وميتعلمش من خطأه يبقي انسان خيبان
مره واحد صاحبي بيسالني علي موقف حصلي وبيقولي انت ندمان قولتله لا ولو حتي الموقف يتطلب الندم فانا مش زعلان
لاني مهما كنت خسرت فبرضه كسبت
جملة بقولها دايما لما بيحصل اي شيء وحش لان اكيد في حكمه من ده واكيد انت بتتعلم

بنلف فى دواير ..
ندور على الأمان
ونلاقينا رجعنا تانى لنفس المكان
ندور ... ندور
نحلم .. ونحلم بالحياة المفرحة
وأتارى أحلامنا بلا أجنحة

كوبليه اللي يقراه يدخل في دور اكتئاب ويصبح شخص انطوائي متقوع الزوايا منغلق الافق والكيان دون محاوله لخروج ( كلام كبير هههههههه)

لا بجد كوبليه كئيب بطريقة وحشة ليه بس كده ياعم ابنودي
مين اللي قال ان لما بندور علي الامان مش بنلاقيه طيب بص كده كويس هتلاقيه
ها لقيته ولا برضه هقولك عليه !!!
الامان في دينك و وسط عيلتك واهلك وابويك واخواتك وصحابك
وسيبنا من الاخيره دي اللي معقده معظم الناس اليومين دول وعاوزالها بوست لوحده (الصحاب)
بس ركز في الباقي هتلاقي الامان وسطهم ...اصل عمر الامان م كان بالفلوس ولا الامكانيات ..الامان بالناس والدين
وبعدين كمان نحلم واحلامنا بلا اجنحة ازاي ...لا طبعا الاجنحة قدرتنا وارادتنا اللي معظمها راح في شبابنا ده ومحتاج يشتري اراده جديده
اه و عقلنا و اخلاقنا و تمسكنا بدينا اكيد دول حاجات مهمه بردوا ولا ايه ؟؟!!

بجد بصوا كده هتلاقوا كل ده واكتر مش بس جناح للاحلام لا ده كمان موتور و طياره ليها بس اللي يفهمهم ويستخدمهم صح

واحد هيطلع يقولي ( اه مهو ورايا في كل حته ) ايه يا استاذ دي اغنيه يا فندم يعني مش حكايه
اقوله انا كعادتي طبعا بردودي المفحمه لا مش بس اغنيه دي اغنيه اتغنت في فيلم بيحكي عن مشاكل الشباب و كمان اغنيه لقيت معظم الشباب بيتكلم عنها في مدوناته واللي حاططها في توقيعه في المنتديات او الحاله الشخصية بتاعته علي الايميل يعني معلمه في دماغه بمعني معين وانا حبيت اتكلم عنها بعيدا عن الفيلم وموضوعه لان الفيلم مع انه بيحكي واقع ملموس وفعلا النهايه اللي انتهي بيها بتحصل كتير بس عشان زي م قولت في الاول اللي زي دول يبقي شباب خايب وملوش لازمه وطبعا انت المفروض متكونش منهم ولا ايه برضوا ؟؟!!!

انا مش هعلق علي باقي الاغنيه عشان البوست ميبقاش طويل ولا تزهقوا بس انا حبيت اتكلم عن الاغنيه من زمان وكنت مشغول و لما سمعتها النهارده قولت بقي اكتب عنها لاني مقتنع جداااااا

اننا مبنلفش في دواير

و اننا عمرنا م هننتهي لمطرح م ابتدينا

:)

ساعات

2009-03-27T04:25:00.003+02:00

ساعات تمر من عمري ثواني

وساعات تمر عليا سنين

ساعات نقول ده العمر فاني

والعمر يجري ومش حاسين

ساعات بحب وساعات بخاف

وساعات فيها الدموع تتشاف

ساعات بحن لايام زمان والذكريات

وساعات نقول ايام وعدت واهو كله فات

و تمر ساعات وراها ساعات

والفكر واقف من سكات

والصمت سايد علي المكان وعلي الوجود

والدمع نازل يحفر طريقه في الخدود

يروي الالام

تكبر و تمسح الابتسام

من غير كلام

سايب اهات وسط الساعات

وتعدي ساعه وساعه تانيه

خلاص مبقاش في العمر ثانيه

خصلت ساعاته وسط الجراح

وسط الاسي

في الحزن والدمع العمر راح

والفرح اتنسي

ويفيد بايه بس الندم علي اللي فات

مدام العمر ضاع ومفضلش فيه

ولو ساعات

ايام زمان

2009-03-23T22:44:00.002+02:00

فاكر ايام زمان؟
ارجع كده بالذاكره 3 سنين
ولا اربعه
طيب اقولك خليها خمسه
ها فاكر الايام دي ولا خلاص كبرت وعجزت
لا فاكر ياعم متخافش
طيب انهي ايام احسن دلوقتي ولا ايام زمان؟
ياتري انت من جواك دلوقتي احسن ولا زمان؟
ايام زمان طبعا مكناش فيها زي دلوقتي ولا فيه مسئوليات ولا هموم و لا تفكير وكل اللي كنا بنعمله لعب وضحك وهزار و شويه مزاكره وكان الواحد بريء كده مش زي دلوقتي و لا بيشيل جواه ولا حاجة
ودلوقتي؟
لا ...قرف و مسئوليات و دماغنا مبقتش زي زمان ولا حياتنا و ضاع مننا حاجات كتير و فقدنا معاني كتير جوانا وهوايات كتير اتدفنت و تاهت مع الايام و احلام كتير اتقتلت في زحمه الحياه واللي بتفرضه علينا والنفس نفسها اتغيرت

يااااااااه بقي كده كل ده حصل دلوقتي و مكنشي موجود زمان؟
يعني مفيش اي حاجة كويسه موجوده دلوقتي عن زمان؟
لا فيه ازاي تقول كده اكيد فيه ممممممم الواحد كبر وعقل و بقي بيفكر كويس ويقيم الامور و يعرف يتصرف في مواقف كتير مكناش قدها زمان يعني فيه حاجات وحاجات
ممممممممممممممممممممممممم
طيب كمل فضفض قول عاوزك تخرج اللي جواك؟
بصراحه انا بحن لايام زمان كتير قوي و بفكر فيها واقول يااااااااااااااااااااه
ومين مبيحنش للايام دي ؟
بس انا مش قصدي عن ايام الطفوله وبس ولا ايام اللعب والتنطيت انا بحن لايام مفتش عليها كتير
زمان بالنسبالي كان راحه البال والروقان والصحاب و الفرح و الضحك جايز يكون من سنه وجايز يكون من شهر وجايز اسبوع ده بالنسبالي زمان
زمان بالنسبالي بقيمه بالمده اللي عدت عليا وانا حالي فيها مش زي م كان مش مجرد سنين من عمر عدت و فات عليها كتير
لان لو حسبتها كده ساعات كتير بتعدي شهور وايام وسنين والحال هو الحال و بيتقال عليه زمان
انا ده بالنسبالي مش زمان
زمان عندي زي م قولتلك كده تمام

مممممممممم نظريه بردوا هقول ايه م انت لازم تبقي غريب عن الناس والا متبقاش انت
هههههههههههههههههه
منكرش ان حاجات كتير لو فكرت فيها هلاقي نفسي بقيت احسن من زمان حالا و فكرا وعقلا و شخصا و شعوريا
لكن بالنسبالي الحاجات دي اتطورت و كبرت مش جدت
لكن اللي بفتقده حاجات اختفت من جوايا ومن حواليا و من قدامي
وايه اللي ضيعها منك؟
بيني وبينك ومش هنكر عليك كتير راح منها تقصير مني و كتير كان مقدرله يروح من غير م اتدخل فيه و كتير برضه راح لان اوانه راح وحاجات مكانه جت وحاجات تانيه دفنتها الايام والمشاغل و الحياه و كتير وكتير وكتير
طيب وايه اللي خلاك تحنلها؟
اكيد لان حسيت في يوم بنقصان حاجة وحسيت في يوم بتغيير مش عاجبني و افتقدت حاجات كانت مريحاني ولما قارنت بين دلوقتي وايام زمان حنيت
طيب ليه محاولتش ترجعها؟
فيه حاجات كسل مش هنكر وفيه حاجات متنفعش ترجع ولو حاولت و صدقني انا بحاول ارجع اللي ينفع يرجع وربنا يسهل

طيب واللي جاي شايفه ايه ؟
اللي جاي في علم الغيب بس جوايا امل يبقي احسن من اللي فات و ايام زمان و دلوقتي برغم اللي فيه من مسئوليات وانشغال و تجديد واحلال حاجات مكان حاجات بس جوايا عاوزه يبقي احسن
علي فكره دلوقتي مش وحش ياعم ولا حاجة الحمد لله انا بس بقولك علي حاجات كانت عندي احسن من دلوقتي وفيه اللي عنده ايام دلوقتي احسن من ايام زمان يعني متخدش كلامي مقياس ده مجرد فضفضه

وفي الاخر بكره احسن ولا دلوقتي هتفضل الايام دي مهما كانت
ايام زمان

ده حوار بيني وبين نفسي يعني مجرد فضفضه زي م قولت وجنان من ضمن جادوفرينياتي وجايز يكون دار بينكم وبين نفسكم برضوا
:D

بمزاجك ولا غصب عنك ؟؟

2009-03-17T16:42:00.000+02:00

ممممممممم عنوان غريب كعادتي صح؟
طيب سوا كده هنفهم انا قصدي ايه
حد فيكم حس في يوم ان دماغه وقفت ؟؟؟
دماغنا وقفت ؟؟ ازاي يا ديد ايه الكلام الغريب ده م انت عارف ان الدماغ لما بتقف يبقي الانسان مات
ايوه انا مش قاصد المعني الطبي و ان كان برضه الانسان بيموت معنويا لو دماغه فعلا وقفت ولو حتي عن التفكير لكن تعالوا الاول نشوف انا قصدي ايه
ها حد حس في يوم ان دماغه وقفت عن كل حاجة
عن التفكير وعن الاحساس و عن الفرح و عن الحزن؟؟
و سيطر عليها احساس ضيق بسيط مصحوب باحساس لامبالاه و انك مش عاوز تعمل حاجة؟
و لما يجي حد يسالك عن الاسباب تقوله مش عارف
يابني مالك فيك ايه ؟؟ مش عارف
يا حبيبي ايه اللي جرالك ؟؟ والله م اعرف انا حاسس كده وخلاص و مش عارف السبب
طيب م تدور شوف ايه اللي وصلك للحاله دي او خلاك تحس بده؟؟ مش عارف والله وبدور مفيش هو بس تحس كده الواحد مخنوق و مش في المود اليومين دول و ملوش نفس يعمل حاجة ولا حتي يفكر
حصل الحوار ده قبل كده لحد ؟؟ مش بينه وبين نفسه.. حتي بينه وبين حد من صحابه ؟
يمكن حصل ويمكن محصلش لحد منكم ولكنه حصل ليا و لبعض اصدقائي مؤخرا
ولما قعدت مع نفسي كده و كنت بكتب البوست الجديد وبفكر في الموضوع ده لقيتني بغير فكره البوست للحكايه دي و حطيت كذا سؤال وقدامهم علامات استفهام
ايه اللي ممكن يحصل في يوم يوصلنا للحاله دي؟
وياتري ده بمزاجك ولا غصب عنك؟
قعدت ادور علي الاسباب اللي في يوم وصلتني للصوره دي بصراحه لقيتها مش واضحه المعالم
ولما سالت روحي السؤال التاني ده
يارتي بمزاجي ولا غصب عني؟
برضه ملقتش جواب واضح
ياعم ارحمنا ايه اللي بتقوله ده
استنوا صبرا هفهمكم انا بقول ايه
انا دورت ايه اللي ممكن يوصلني لحاله يقف فيها مخي و عقلي عن التفكير و يبقي مصاحب باحساس اني مش عاوز اعمل حاجة
ياتري ده سببه ايه
ضعف واستسلام - سلبيه وتكبير دماغ- ولا هروب
؟؟
شوفتوا الاحتمالات اللي جات في دماغي
فرضنا ان حصل اشكال او وقعت في مشكله ما وتوالي وراها احداث كتيره صعبه و مقرفه
و بعديها بمده كبيره حتي ولو كانت المشكله اتحلت والاحداث انتهت لقيت نفسك بتدخل في الحاله اللي بنتكلم عليها دي ويمكن شوفت حاجة فكرت باللي فات ويمكن تراكم احداث وكلنا عارفين انها ساعات بتبقي حاله و بتعدي وساعات تانيه بتستمر
طيب هل بقي سبب دخولك فيها ده
ضعف واستلام : انك خلاص مش قادر تواجه مواقف زي دي تاني و قرفان من اللي حصل كله و ده وقف تفكيرك خوف وضعف من تكرار الموقف
سلبيه وتكبير دماغ: من كل حاجة واي حاجة سواء مشاكل او مش مشاكل و سايبها زي م تيجي تيجي
ولا هروب : من جو عيشت نفسك فيه و بقي جزء منك ودلوقتي بتخرج منه و بتهرب عشان خلاص تعبت
لو بصينا وفكرنا في الاحتمالات دي علي طول هينط السؤال التاني في دماغنا

يعني بمزاجك ولا غصب عنك ؟؟
يعني انت اللي دخلت نفسك في الحاله دي بمزاجك ولا الظروف والمحيط اللي حواليك فرض عليك ده و جايز يكون هو اللي خلاك تضطر تعمل كده
ولما تدور علي الاجابه تلاقيها
مش عارف
طيب الاجابه برضه دي ياتري فعلا مش عارف ودي مرحله عدم اتزان ولخبطه ولا برضه هروب من انك تدور علي الاسباب ولا اصلا اصلا انت عارف الاسباب و بتهرب من انك تقولها او تتكلم فيها

بوست ملخبط؟؟ مش مشكله عشان بس عندي امتحان بكره :D
بس حبيت اسجل اللحظه دي لواحد اعرفه
واسيب السؤال ده ليكم تردوا عليه لو حصلتلكم الحاله دي
ياتري بمزاجكم ولا غصب عنكم ؟؟
واوعي حد يقولي مش عارف
:)

الف مليون ملياار مبروووووووووووك

2009-03-13T01:42:00.000+02:00

معلش بوست استثنائي عشان لسه منزل بوست امبارح و مش بنزل بوستين ورا بعض كده بس زي م قولت ده بوست خاص واستثنائي

انا لسه راجع من اجمل حدث حصل في اخر خمس او ست سنين

حدث بجد كانه حصل ليا

النهارده كانت خطوبه واحد من اغلي واعز اصحابي عندي

كانت خطوبه صلاح او ابو صلاح زي م بيكتب في مدونته

مشاهدات

علي الدكتوره آيه صاحبه مدونه

يوميات فتاه محتاره

الف مليون مليار مبروك لييكم انتوا الاتنين وربنا يتمم بخير و يجمعكم علي حبه و طاعته ورضاه

بجد اليوم كان جامد جدا قوي موت خالص طحن هبد رزع كسر فحت ردم هدم

ههههههههههههههههههههه

والله فرحة الشله كلها بصلاح كان كل واحد فينا هو اللي يوم خطوبته النهارده

مش عشان بس صاحبنا لا عشان شخصيه جميله تتحب مرحه وربنا كرمه بالانسانه اللي يستحقها زي م كرمها بيه

انا استاذنت منه وقولتله هعمل بوست ليك افضحك فيه

ههههههههههههههههههههههه

ومقدرتش انام الا لما اعمل البوست ده لان بجد ده احلي خبر سمعته و احلي حدث حضرته من سنين

لا نجاح بقي ولا نتيجه ولا غيره احلي من الخبر ده النهارده

وعقبالكم كلكم ولا عزاء للعزاب

انا مبعرفش اعمل بوستات تهنئه معلش يا صلاح اعذرني و كمان الفرحه مش مخلياني اقول حاجة غير اللي قولتهولك و اللي كتبته ده

مليون مبروك يا صلاح وربنا يرزقكم بالذريه الصالحه ان شاء الله

اللي قبلينا قالوا ايه ؟؟؟

2009-03-11T23:54:00.001+02:00

اللي قبلينا قالوا ايه ؟؟
اعرف صاحبك وعلم عليه
اعلم عليه؟؟ ازاي مش فاهم
ايوه تعلم عليه مش تطلع مطوه وتعلم علامه في وشه يعني ..لا انك يعني تحطه في خانه كده لوحده
طيب اعلم علامه ايه صح ولا غلط؟؟
اكيد صح لانك لو علمت غلط يبقي مش صاحبك ومش محتاج انك اصلا تعلم عليه لانه ولا يفرق معاك
والصاحب مواقف مش مجرد واحد معايا في الكليه ولا المدرسه ولا الشغل
ولا واحد بنروح سوا ولا بنحضر مع بعض ولا حتي بنكلم بعض يوميا
الصاحب مواقف
مواقف ؟؟ ازاي
يعني صاحبك هو الانسان اللي تلاقيه جنبك وقت شدتك ووقت فرحك او حزنك ووقت انكسارك او نجاحك وهو برضه الانسان اللي يقدر يقدرك ويقدر مشاعرك و مبيزعلش منك علي التفاهات
اللي مهما اتخاصمتوا ولا اختلفتوا بترجعوا لبعض بمجرد لما تتقابلوا تاني يوم
اللي ميهمكش مين فيكوا الغلطان لكن يهمك انكم تفضلوا مع بعض
اللي يقدر يسامحك علي حاجة عملتها فيه و ينساها مش يشيلها جواه
الله وانت قولت ايه جديد م كل ده عارفينه؟
وانا مش بكتب عشان اقول جديد انا بس بفكركم بمعني صاحب لان ناس كتيره نسيته و ابتدت تفقده ومش تعرفه
وكتير منا عايش وحيد وكتير فقد الثقه في اللي حواليه
عشان كده انا حبيت افكركم بمعني صاحب
يمكن الصاحب بالمعني المثالي قل في الايام دي او ان مشاغل الحياه والاهتمامات الشخصيه طغت علي نقاط كتيره جوانا وخلتنا مجرد زمايل شغل او مكان
بس لسه برضه فيه الصاحب اللي بتكلم عليه
اللي بيخاف علي صاحبه ويفرح لفرحه ويحزن لحزنه
اللي ميعرفش يبات وهو زعلان مع صاحبه ويجري يرفع سماعه التليفون يصالحه
انا مبقولش ان اللي مبيعملش كده مش صاحب لا كل واحد وعلي حسب شخصيته وكل واحد و زي م اتعود من صوحابه
بس الصاحب لازم يكون كده واكتر
ومش مكالمه تليفون ولا رنه موبايل و لا خروجه وضحكه و نكته و بسمه خلاص بقينا صحاب ولا هي دي الي هتبين قد ايه احنا صحاب

االصاحب بيبان في الوقت الجد والمطلوب

ونرجع تاني ونقول
اللي قبلينا قالوا اييييييييييه ؟

اعرف صاحبك وعلم عليه
:)

No talking any more

2009-03-05T01:11:00.000+02:00

No talking any more ,now it is the time to end the discussion

ساعات بيجي وقت بيبقي الكلام ملوش لزوم او فقد معناه او حتي محتواه وجوهره
وبيبقي جه الوقت اللي انت تسكت فيه و تنهي النقاش لان خلاص مبقاش ليه لازمه الا مضيعه وقت ومجهود و تعب اعصاب
وساعات تانيه بنحتاج الصمت عشان نشوف ونتابع اللي حوالينا من غير تدخل مننا ونتعلم من اخطاهم ومن اخطائنا
وساعات الصمت بيريح
وساعات برضه بيبقي اعتراض
وساعات بيكون ضعف وساعات بيكون قوه
المهم انك امتي بالظبط تعرف تلتزم السكوت وامتي بالظبط يكون ليه فايده
واديني بلتزم السكوت دلوقتي وبنهي النقاش في اي موضوع بس مش معاكم انتوا طبعا لان مدونتي هي احسن حاجة السنادي والسنه اللي فاتت عملتها
انا بنهيه مع اي حد الكلام معاه بيروح في طريق مسدود ومع اي حد النقاش بياخد اتجاه اللي يروح ميرجعش
لان فعلا مبيجيش غير التعب والحيره لما يكون اللي قدامك مش مستعد للنقاش او الكلام معاه بيتفهم غلط او زي م قولت بيروح في طريق تاني
وقتها لازم ترفع رايه السكوت وتقوله انتهي النقاش
وانا دلوقتي برفعها وبلتزم الصمت وبكتفي بالمشاهده وبقولها بصوت عالي

End of discussion

10 %

2009-03-03T01:24:00.001+02:00

سؤال غريب اتسالته من شخص في الكليه
بتمثلك ايه نسبه ال 10 في الميه
بصراحه انا معرفتش اتكلم ..ووقفت قدام السؤال متنح كده ومبلم ..وقعدت فكرت شويه كده ايه اللي ممكن تمثلهولي .. فرح ..حزن.. نجاح..ثقه.. رضي.. ايه بالظبط مش عارف
انا اصلا مش عارف السؤال اتسال ليه بس بيني وبينكم سؤال غريب معرفتش ارد عليه
اصل عمري م حسبت حاجة في حياتي بنسبه معينه دايما كده بعمل او بفكر من غير نسب ودرجات يا اه يا لا مش بين البينين وفي النص ولا شويه وحبه .. لكن السؤال فعلا خلاني افكر ايه اللي في حياتي ممكن يكون بنسبه 10 % اصل 10 % نسبه صغيره قوي في حاجات وبرضه في حاجات تانيه بتبقي كبيره برغم صغرها
لكن ياتري ايه اللي بتمثله نسبه ال 10 % في حياتي

لسه مش عارف ولما هعرف هقولكم

ياتري انتوا عارفين ؟؟؟
حد عارف ايه اللي بتمثله نسبه ال 10 % عنده ؟؟

:)

انا مش لوحدي انا معايا

2009-02-19T23:10:00.000+02:00

انا مش وحيد انا معايا وده بالنسبالي كفايه..استنوا ده مش جنان ولا لسعان تفكير..ولا تخاريف ليليه ولا خاني التعبير..انا قاصد كل كلمه في العنوان.. و هتفهموا كويس ان ده مش جنان..شعوري بالوحده مبقاش موجود.. لاني عرفت السكه وعديت الحدود..حدود اليأس والحزن والحيره... و اسوار الكأبه والحقد والغيره..لقيت اللي كنت عاوزه في صديق ..او صاحب او رفيق طريق..بس لقيته معايا زي م العنوان بيقول..وهقولكم ازاي علي طول
دورت جوايا علي الشخص المدفون ..اللي معظم الناس بتفتكره الجنون.. الشخص اللي مستني دايما علي الباب ..ومعظم الناس بتسميه اكتئاب..وقعدت معاه قدام المرايا ..نتكلم ونحكي لبعض الحكايه..حكايه ابتدت زمان ..لما لقيت نفسي لوحدي وسط عالم بالناس مليان ..وبرغم ان ليا اصحاب كتير الا ان شعوري بالوحده كان شعور كبير..وكنت ارجع في نهايه يومي.. احاول اشكي همومي ..بس اشكيها لمين ..بشكيها لرب العالمين ...اصل صوحابي مش موجودين !!.وفي يوم...قومت ووقفت قدام مرايتي..وبصيت فيها لصورتي.. و علي الشخص اللي جواها زعقت وقولت.. انت ياللي جوه اطلعلي براها حالاو دلوقت..لكن خيمت عليا حاله من السكون والصمت.. بعديها بشويه انا اتحركت .. بس مكنتش انا ده كان هو .. بيتحرك في المرايا من جوه..ونفض من علي نفسه تراب النسيان ..وقالي اهلا فينك ؟؟ ده انا مستنيك من زمان..يااااااااااااااه اخيرا افتكرت.. ده انا قولت انك علي صوحباك اقتصرت .. ونسيتني ونسيت اني معاك..وانا منك وجواك ..بصراحه انا منه اتكسفت .. و فعلا بغلطتي اعترفت ..قالي ها مالك يا سيدي عاوز ايه ؟؟..رديت مفيش مجرد شعور بالوحده مقدرش عليه ..كنت محتاج حد اتكلم معاه .. وانا اهو معاك قول علي اللي في قلبك وجواه.. وهتلاقيني دايما بسمعلك ونتكلم... ونتخانق ونجادل ونتعلم ..بس الناس هتفتكرني كده مجنون .. وايه الي في حياتنا مش جنون..بص حواليك و قولي علي اللي بتشوفه ..كدب وخداع و زيف حوالينا بيطوفوا..مشاعر كدابه وتمثيل ..وصعب تلاقي شخص اصيل .. بيني وبينكم انا اقتنعت بكلامه..اصله طول عمره حكيم و اللي في قلبه علي لسانه ..لا عمره كدب عليا ولا حتي جاملني ...ودايما بيقومني ومستحملني..مش مخادع و مصلحجي ..ولا بيفشي اسراري وعامل صاحبي..بيكشفلي عيوبي ويقولهالي ..و يفهمني حاجات مش علي بالي..يعني من الاخر انسان واضح و شفاف..مبنزعلش من بعض حتي لو كنا علي خلاف ..انسان دايما معايا صريح ..ومعظم كلامه بيطلع صحيح..كنت نسيته زمان ومصاحبتوش..لكن بعد كده احساس الوحده محستهوش..جايز يكون كلامي مجنون..وجايز جوه كل واحد منا فعلا انسان مدفون ..المهم انك تدور عليه وتلاقيه ..ولو لقيته امسك فيه ..لان هو اصدق انسان اليك..وبيقولك اللي ليك واللي عليك..

واليوم الي هتلاقي نفسك بقيت معاك ..الوحده هتتشال من جواك

بكلمة منك

2009-02-11T22:23:00.000+02:00

ازيكم يا احلي مدونين معلش بقالي فتره مكتبتش حاجة جديده وكله بسبب العسكريه اللي بخدها وخلاص فاضل فيها يوم وربنا يعديها علي خير
كنت طبعا متوقف عن التدوين عشان مش بس بسبب العسكريه لا لان كمان مفيش حاجة بصراحه في دماغي او حاجة تشدني عشان اكتب عنها
لكن النهارده حصلت مفارقه هحكيلكم عليها كمان شويه
البوست عنوانه مبهم حبتين تلاته ؟؟ عادي اتعودتوا مني علي كده
علي فكره هو مش علي اغنيه شيرين عشان فكركم ميروحش بعيد
انا قصدي بكلمه منك ممكن تعمل كتير
بكمله منك ممكن تبني وممكن تهد
ممكن تفتح طرق وممكن تسد
بكلمه منك تدي امل وشعاع نور
او تزرع يأس وتسيب انسان مكسور
معلش البوست هياخد شويه رتم حزن او كأبه بس مش ده مضمونه او جايز عشان عاوز اوصل فكره فيه
كل يوم في حياتنا بنتكلم كلام كتييييييييير كلام مهم ومش مهم هزار جد تهييس وغيره وغيره وغيره وساعات كتير مبنبقاش واخدين بالنا بنقول ايه بالظبط او بتخرج منا كلمه مش في مكانها او مش قاصدينها و بتبقي نابعه من عفويه او من تربيه وثقافه فرضت علينا الاسلوب والكلام او بتبقي خارجه كده وخلاص زي البتاعه مش عارفه رايحه فين وتروح لابسه في وشك
عادي جدا بتحصل كتير ايه المشكله؟؟
المشكله انك وانت كده بتتكلم احيانا مبتبقاش واخد بالك من الانطباع اللي ممكن كلمه من كلامك تسيبه في اللي قدامك
ممكن في وسط الحوار كلمه منك تحل مشكله عند انسان او تديله امل او تفاؤل او تكسره و تسد في وشه طرق كتير
معاكم ان الانسان لازم يعتمد علي نفسه وعزيمته وميسبش نفسه للاحاديث الجانبيه و قعده القهاوي ولا كلام الناس ياثر فيه
صح جدا رايكم ده بس لما يكون الكلام من حد تحس فيه بالخبره و ممكن كنت مستني منه كلمه ترفع من روحك وتشد علي نفسك ويحصل العكس بتنهار
مش بتحصل ؟؟ اكيد اه
هقولكم علي المفارقه اللي حصلت عشان تفهموا قصدي كويس
النهارده روحت مع والدي المستشفي كنا بنغير علي الجرح و هناك قابلت الدكتور اللي عمله العمليه وبعدين بتعرف عليه و بعدين بيقولي انت سنه كام فبقوله النهائي بكالريوس خلاص بيقولي طيب ترتيبك؟؟
بقوله متاخر شويه يعني 400 وشويه لقيته بيقولي
يا ستار يارب ليه كده ؟؟؟ انا حسيت اني مثلا بلغته خبر وفاه حد يعرفه
قولتله يلا النصيب يا دكتور
رد عليا وقالي طيب دخلت طب ليه مدام مش هتطلع من الاوائل او مش ناوي علي نيابه في الكليه اصل كده خلاص ملهاش لازمه
خلاص ؟؟؟ مع تعبير تتنيح فظيع
ليه بس؟
بيقولي اصل هما بياخدوا في النيابات 100
قولتله م انا لو كنت مرتب يا دكتور ممكن متجليش النيابه اللي عاوزها و خاصه اني عاوز جراحه زي حضرتك
رد عليا وقالي وليه م انا كنت 7 علي الدفعه و كان قدامي تخصصات كتير وانا اخترت
يعني مش بس عاوزني ارتب في ال100 لا كمان عاوزني ارتب في 10 الاوائل عشان اختار التخصص اللي عاوزه
بصراحه كلمته وجعت شويه وخصوصا انه استاذ عندي في الكليه
و لاني عاوز تخصص جراحه زيه
بس م اثنتنيش عن حلمي ولا سدت في وشي طريق
طول الطريق وانا راجع مش بفكر في كلامه ولا ان خلاص كده الطريق اتسد وبتاع و لا غيره لا انا خدت كلامه من ودن وخرج من ودن التانيه
مش كل اللي اتعين في الجامعه بقي كويس ومش كل الدكاتره المشهورين اساتذه ولا كانوا مرتبين والمهم الخبره والشطاره
بس كنت بفكر في ان لو حد مكاني وسمع كده منه
هيتحطم ويكتئب
صح ولا لا ؟؟
بعد لما كان راسم لنفسه طريق وهيمشي عليه و يعمل ويجتهد و يجي دكتور استاذ كبير و في نفس التخصص اللي انت عاوزه ويقولك انت دخلت ليه طب مدام مش ناوي ترتب من ال100 الاوائل
طيب و 1600 التانيين دول ايه هيصيعوا ؟ فشله ؟
بجد قولت الحمد لله انها جات فيا مش حد تاني
لاني الحمد لله مبسمعش للكلام واللي في دماغي في دماغي بس افتكر واحد صاحبي لو سمع كلمه زي دي ممكن يحصله حاجة
مش متخيلين كلمه في وسط الكلام ممكن تعمل ايه في انسان يكون عنده حلم وعزيمه يحققه و بيسال اهل خبره عشان يساعدوه يلاقيهم بيقولوا لا خلاص
خلاص؟؟ يعني ايه ؟؟ امتي نقول خلاص ومين اللي بيحدد ؟؟ انت ولا انا ؟؟ لا طول م جوايا عزيمه واراده وفيا نفس مش خلاص
خلاص دي لما اقولها ابقي بقيت انسان ياس محبط محطم
عارفين لما تلاقي انسان زعلان وحزين ممكن بكلمه منك تزيح حزنه ده وممكن بكلمه تانيه تزوده
بكلمه ممكن بدل م تزرع في نفس انسان ياس وترسم طريق نهايه
تزرع امل و تمهد طريق البدايه

انا بجد مش عارف قصدي وصل ولا لا بس ياريت ناخد بالنا من كلامنا مع الناس ونشوف رايح ازاي
مش هيكلفك حاجة لما تقول لانسان كلمه كويسه ولو حتي مش صحيحه بس اهو بتديله امل و تشيل عنه كتير وجايز يتحقق اللي عاوزه

لكن حرام لما تقول كلمه احباط لبني ادم ممكن يكون جواه انه يعمل كتير و تيجي انت بكلمه تهدم كل ده

في الاول والاخر عزيمتك وعقلك سلاحك ومتسمعش للكلام وخلي طريقك قدام عنيك وسيبك من غربان ولا وحوش الليل اللي بتظهر عشان تبعدك عنه
مدام شايف نور ولو حتي بسيط يبقي فيه قمر ومدام القمر منور يبقي الامل موجود

:D

حركات مستفزه

2009-02-02T23:14:00.001+02:00

ازيكم يا مدوانين ؟

اول تدوينه بعد دخولي التربيه العسكريه وكان لازم افضي بقي الاحساس ده دلوقتي عشان من الصبح اللي حصل النهارده حارق دمي بشكل وحش

المهم

صاحي الساعه 5 ونص الصبح عشان اروح العسكريه و بعدين اتوضيت وصليت الفجر و كويت اللبس الغريب اللي بنلبسه القميص اللبني و البنطلون الجينز ولبست ونزلت من البيت علي الساعه 6 وشويه والمفروض اني اكون هناك علي 7 ونص عشان ناخد التمام

نازل في امان الله و بعدين ابص الاقي واحد من سكان العماره واقف بره البوابه و بيقولي ده استاذ فلان كسر مفتاحه في بوابه الشارع بعد لما قفلها و سلم عليا ومشي!!!

حركه قمه الاستفزاز بصراحه

يعني ايه قفل الباب و كسر المفتاح ومشي و ساب الناس بقي تولع و تتاخر عن مواعيدها

وبعدين مش عارف يقفل الباب والكالون معلق خلاص فيه ترباس اقفله و امشي لكن اللي يغيظك اكتر ان المفتاح مكسور عشان كان عاوز يقفل التكه التانيه في اللسان يعني مش تكه واحده يعني دمك يتحرق اكتر واكتر كل لما تعرف ده

طبعا طلعت في الاسانسير جررررررررررري علي الشقه و جبت كماشه وادتها للراجل بره

وعمال يحاول ويحاول و انا احاول و مش راضي المفتاح المكسور يخرج اصل الاستاذ كسره و هو مش علي عدله لا وهو معوج كمان و ترس الكالون

قعدت حوالي نص ساعه في الموضوع ده والساعه بقت حوالي 7 الا 10 و بعدين سكان العماره نزلوا واحد واحد عشان يروحوا الشغل

و طبعا كلنا متعطلين عشان البوابه المقفوله و اللي مينفعش فيها لا تكسير ولا اي حاجة عشان حديد

واللي غايظني اكتر ان كل العماره عرفت دلوقتي اني عندي عسكريه واتفرجت عليا الصبح

عااااااااااااااااااااااااااااااااااااااااااااااااااا :(

فين وفين لحد لما عرفنا نخرج المفتاح و قدرنا نفتح البوابه كانت الساعه بقت 7 وخمسه

و جري علي محطه المترو و ركبت المترو

ويجي المترو ماشي بسلام لحد محطه كوبري القبه و هوب يقف حبه و يقعد يفتح في الباب ويقفل

طيب انا عاوز انزل منشيه الصدر يعني مش عارف يقف في المحطه دي براحته دي محطه واحده يا جدعااااااااااااااااااااااااااااااان ولو اتاخرت اليوم هيروح عليا و يمكن العسكريه كلها

وبعدين في الاخر اتحرك و نزلت المحطه المنشوده وهناك الاقي كل الاتوبيسات رايحه في حته الا عبده باشا وكليه الهندسه

قولت اخد تاكسي في السريع

لقيت تاكسي واقف بقوله عبده باشا يا اسطي قالي لا

طيب انت واقف ليه هنا اصلا ؟؟ وبعدين لا ليه انت نازل من بيتكوا تتفسح في العربيه يعني ؟؟ عالم مستفزه

قولت امري لله اقف استني وخلاص فاضل بتاع 5 دقايق علي طابور الجمع بتاع العسكريه

لحد م لقيت واحد جاي بيقولي رايح عبده باشا قولتله اه قالي اركب التاكسي اللي قدام ده بتاعي

اتاريه سواق كان واقف وسمع انا بقول للسواق الاولاني رايح فين و ربنا يكرمه راح تعطف عليا وركبني

وبيقولي انا مش عارف بيقولك لا ليه مش ده رزق وجايله المفروض ياخده ميرفضوش دي ساعه استفتاح

وسالني هو يا باشمهندس مش هندسه اجازه ؟؟قولتله اه بس طب بياخدوا العسكريه هناك

كتر خيره الراجل وده يمكن الحاجة الكويسه اللي حصلت الصبح وصلني في المعاد بالظبط وقضينا اليوم في محاضرات عن ازاي نعرف الشمال و تعريف الهضبه والتبه و مساحه مصر و منخفض القطاره و بحيره ناصر وحاجات كده بتاعت الدراساات الاجتماعيه في ابتدائي

وعدي اليوم علي خير وسلام

اللي مستفز في كل ده ان فيه ناس مبتراعيش شعور اللي حواليها ولا بتاخد بالها وهمها نفسها بس مش مهم الناس اللي وراها دي في ضيق ولا شده

زي اللي كسر المفتاح و مشي و نسي ان فيه ناس ممكن تكون متعطله

و زي سواق التاكسي اللي مش هامه الناس المتاخره دي وواقف مستني مشوار قريب لحد الجامعه مش عبده باشا عشان يرجع يحمل تاني و تالت ورابع

يلا ربنا يهدي الجميع ومعلش صدعتكم بس عشان دمي كان محروق الصبح و كنت عاوز ارجع والع في العماره بحالها بسبب الموقف ده

يلا سلام واشوفكم بعد العسكريه :D

عذراااا

2009-01-31T20:42:00.001+02:00

متوقف مؤقتا عن التدوين لحين الانتهاء من اداء التربيه العسكريه

ادعولنا بقي عشان الواحد شكله هيخلص منها وعنده تخولف تدويني

:((

حتي البحر ظلمتوه معاكم

2009-01-12T02:34:00.000+02:00

الصوره اللي في البوست دي انا اللي مصورها من رحله رمادا اللي طلعتها من حوالي شهر و نص ها انفع ؟؟
ههههههههههه
المهم
نتكلم بقي عن العنوان
ايوه ظلمتوا البحر
مقوله دايما بسمعها ومؤخرا بقيت اشوفها كتير ان البحر غدار
بقي البحر غدار؟؟
بذمتكم البحر ده غدار
اكيد يا جاد انت لازم تعترض علي كل حاجة والا متبقاش انت
لاو الله مش بعترض علي اي حاجة بس
انا مش موافق معلش
الناس بتقول صحيح البحر جميل و شكله تحفه وقت الغروب ويا سلام وقت الصبح و لا تتمشي علي بالليل يبقي ايه تعمل دماغ تمام
لكن لو دخلت جواه واتعمقت فيه ساعات بيغدر بيك
ملوش امان
قال الكلام ده صحيح؟؟ طيب ليه؟؟
ايه اللي يخلي البحر يغدر بيك ؟هو اصلا من طبعه الغدر؟ولا اصلا يعرف الغدر ازاي
البحر عمره م بيغدر
طيب والمراكب اللي بتغرق دي ياعم جاد والسفن والناس دي ايه مش دي بتقول ان البحر بيغدر بينا
لا برضوا
لو بصيت وركزت هتلاقي ان ورا كل حداثه كانت سبب في ان البحر يتقال عليه غدار سبب
البحر لما بيهيج و يثور مبيبقاش بمزاجه
فيه رياح وعواصف وعاومل جويه كتير بتاثر عليه
ولما مركب بتغرق برضوا دور علي الاسباب هتلاقي شرخ فيها ولا عطل ولا عاصفه ولا ولا ولا
والشخص اللي بيغرق مبيبقاش بيعرف يعوم واللي بيغرق وهو بيعوم بيغرق من التعب و لا من اصابة لكن البحر مبيغرقهوش
لو كل اللي قولناه ده تغاضينا عنه هل هتغرق السفينه ولا الشخص ولا البحر هيثور
ما اعتقدتش ولكن كل حاجة بايد ربنا في الاول والاخر
بس هو قال وجعلنا لكل شيء سببا
اللي عاوز اوصله من البوست فكره ورا الكلام والعنوان
انك متخدتش بالشكل ولا بالسمع والتمس الاعذار علي قد م تقدر وفكر كويس ليه حصل اللي سمعته ده ولا اللي شوفته وبعد ده كله قرر
ويكون قرارك من تفكيرك مش من ودانك ولا من عينيك بس
الفكره مبهمه وسط الكلام الناس يارب تكون فاهماني و انا بجيب امثله عبيطه و يمكن متنطبقش قوي بس عشان اقرب الصوره
فخمتوا؟؟؟
ها لسه مقتنعين ان البحر غدار؟؟ ولا لسه هتفكروا

طيب يلا اسيبكم تفكروا
:D

انا وذاتي الاخري

2009-01-06T01:09:00.000+02:00

ازيكم يا معشر المدونين
كل سنه وانتوا طيبين و كل سنه والاخوه المسيحيين طيبين
باقي فتره كبيره مكتبتش بوست مجانيني كده من بتوع سكيزوفرينا او (جادوفرينيا ) نسبه ليا عشان الناس متفتكرش اني بتكلم علمي طبي
يلا ولا تزعلوا هنكتب بوست اهو عنها
هههههههههه
مستعدين ؟؟ عاوز كل واحد يركز معايا كده ويقوم يعمل نسكافيه ويعملي معاه :D
بقالي فتره عاوز انزل البوست ده تعليقا علي جمله قرتها في مدونه جميله وجديده هي مدونه
درج المكتب
لصاحبتها دكتوره مروه
الجمله اللي فيها واللي كتبتها اول لما عملت المدونه في الجنب هي ايه

يدفن الانسان منا ذاته في ذاته..
يدفن الأضعف .. لينبعث منه الأقوى ..
أو يدفن الأقوى ..لينبعث منه الأضعف ..
وليس هناك ما يربط الأول بالثاني ..
سوى التذّكر ...

ومن يومين في حوار مع واحد اعرفه لقيته بيقولي
جاد ليه كده تحس ناس عايشه دور مش دورها و انها بتمثل عليك وده مش طبعها

سبونا من جمله زميلي ده وتعالوا للجمله الي في المدونه
فعلا ساعات كتير قوي تلاقي الانسان فينا بيدفن جواه شخصيه تانيه جوه نفسه ايا كان شكلها ونوعها كتير قوي بيدفن الشخص اللي مش بيحتاجه سواء الضعيف او القوي
ندفن الضعيف ماشي لكن القوي ليه يا جاد ؟؟
هقولك انت لما بتدفن الضعيف لانه مسببلك المشاكل و مضيع حقك و موديك في الرجلين او مخلي صورتك ضعيفه في نظر الناس و بتظهر القوي او الاقوي عشان محتاج انك تبان اقوي من الصوره الحقيقيه بتاعتك عشان تسترد حقك ومركزك وعشان تتغلب علي كتير من اللي بيواجهك ده شيء عادي و بيحصل كتير

بس ساعات الشخصيه القويه دي بتيجي علي حاجات كتير جواك جميله و ساعات قوتها دي بتدفن مشاعر جواك وساعات اكتر بتبقي خلاص شبه دايمه بالنسبالك ووقتها بتفتقد الضعف
اللي بيبان فيه انت بجد
طيبتك و سماحتك و مشاعرك الجميله
ساعات كتير بيحصل مزج بين الشخصيتين و تلاقي الشخصيتين سوا طول الوقت وده بقي مش تبع الجادوفرينيا بتاعتنا
ههههههههه

مش لازم دايما الشخصيه الاضعف فعلا تكون مشكله وهي اللي تدفن بالعكس ممكن قوي تكون الشخصيه الاقوي هي اللي محتاجه تتدفن
اقوي من انهي ناحيه بقي؟؟
اي حاجة سواء قوه جسمانيه ولا قوه تفكير ولا قوه شعوريه ولا قوه ملاحظه
بس مش قوه دينيه
مش ساعات القوه الجسمانيه بتحتاج انك تدفنها عشان متدخلكش في مشاكل ؟؟
متجيش تقولي الله بس المفروض اني عاقل واعرف اتحكم في تصرفاتي ده مش موضوعنا وفيه كتير بيفقد اعصابه بسهوله فبيكبح جماح قوته بانه ميظهرهاش خالص حتي لو محتاجها في شيء غير الخناق وده بيحصل فعلا وبيدعي الضعف
وساعات تفكيرك و شعورك القوي بيخليك تتعب من مشاكل وحوارات ليك ولصحابك وتفكر وتفكر وتفكر لحد لما تكتئب؟؟
هنا بنحتاج اننا ندفن الشخصيه دي لفتره عشان تقدر تكمل و بتظهر بدالها الشخصيه الجامده اللا مبلاه بس مش دايما بتعرف

اللي بيربط بين الاتنين فعلا هو التذكر وهو انك بتفتكر الفرق بين الاتنين ومواقف ظهورهم و لكن كل شخصيه مستقله بذاتها عن التانيه ولو جمعتهم يبقي دي مش الجادوفرينيا بتاعتنا
بالنسبه بقي لجمله زميلي ان ليه حاسس ان ناس كتير عايشه دور مش دورها او بتمثل
فدي بقي ليها طريقين
الاول زي م قولنا ناس كتير مفتقده شخصيه معينه في حياتها و بيلاقي الفرصه انه يظهرها من داخل نفسه لبره في الكليه ولا الشارع ولا غيره
لان في الحقيقه هو نفسه يكون كده وده مش منظره ولا ادعاء ولا غيره لا ده تنفيس عن شيء جواه و انت في لحظات بتلمس وتحس ان الدور والطريقه دي مش هي حقيقته وحقيقته انسان تاني خالص بس هو محتاج يعمل ده

الطريق التاني ان بقي ناس بتدعي ده عشان تظهر بصوره ملفته للنظر في وسط ناس تانيه او انها تكون شخص كده سبيشيال لغرض جذب الانظار ليه
وده بقي هو اللي بيعيش الدور وبيمثل
لكن التاني مش تمثيل ولا عايش دور مش دوره زي ما مفهوم الجمله متداول عند البعض لا ده بيحسن من صفته وبيدفن شخصيته اللي مضيقاه عشان يقدر يتعامل حواليه و يقدر يكمل لكن مش مهم بالنسباله لفت انظار الناس ولا انه يكون محط اعجاب اللي حواليه

في النهايه كتير مننا لو بص دلوقتي جواه هيلاقي انه في مواقف كتير دفن شخصيه وظهر التانيه عشان يقدر يتعامل ويكمل

البوست ملخبط حبه ؟؟ مش مشكله اعذروني انا مبكتبش المواضيع دي بقالي فتره و كمان مش ده الجادوفرينيا اللي اتعودتوا عليها مني

واتمني اني اكون فهمت الجمله صح و اتكلمت عنها صح ومتشكر لصاحبه المدونه عشان اقتباسي الجمله من عندها

يلا هابي نيو يير تاني و يارب متكونوش فصلتوا مني

:D

ههههههههههههههههههه

2008-12-31T00:52:00.000+02:00

هههههههههههههههههههههه
غريبه اني بنزل بوستين ورا بعض ميفصلش بينهم يوم مش عاويدي يعني
وكمان عنوان البوست متخلف يدل علي واحد حصلتله لوسه وبيضحك علي الفاضي
هههههههههههههههههههههههه
والله م عارف اصلا بضحك ليه
الاول هابي نيو يير ليكوا وليا و لكل الناس ميلادي وهجري ويارب السنتين الميلادي والهجري (اكيد الاتنين مع بعض مش كل واحده لوحدها بطلوا الذكاء ده) يبقوا احسن من اللي فاتوا علينا وعلي اهل غزه

بعيدا عن الاحداث اللي بتحصل في البلد ولا في العالم انا مستلماني حاله انبساط وضحك جميله قوي علي نهايه السنه دي ويارب تكمل معايا علي طول طول السنه الجايه بعيدا عن عين الحاسدين :P

انا قولتلكم والله مش عارف بضحك علي ايه ولا اصلا بكتب البوست ده ليه بس كل اللي اعرفه اني بضحك ومن قلبي وبصوت مسموع لدرجه ان اللي في البيت ساعات بيفتكروني اتجننت (هو انت لسه م انت خلاص لسعت اصلا)
ههههههههههههههه
مش عارف ده ضحك علي حاجة فعلا تضحك وتبسط ولا تاثير البرد ولا سببه الجبنه الرومي اللي بالبسطرمه اللي طعمها عامل زي صابونه كاميه اليجانس ولا عشان سخريه علي حاجات كتير حصلت وبتحصل ولا لان الضحكه دي كانت غايبه عني بقالها كتير و كنت حزين طول السنه اللي فاتت تقريبا و ضحك السنه كله اتحوش وبيطلع دلوقت ولا عشان مرتاح البال ولا عشان ببقي مبسوط قوي وانا بهزر مع اختي الكبيره وماما وبابا ولا ولا ولا

مش لاقي سبب والله بس مبسوط جدا ونفسي كل الناس تبقي مبسوطه ومن غير سبب واللي قال الضحك من غير سبب قله ادب غلطان انا اهو مش لاقي السبب يمكن يكون موجود بس مش واخد بالي منه بس مش مهم انا بضحك ومش مجرد مبتسم لا بضحك و حاله ضحك جميله جدا سعيد بيها
ايه مستغربين ؟؟بقالي فتره مبكتبش حزين ولا بنزل بوستات كئيبه؟؟ ولا كتبت حاجة عليها القيمه تلمسنا من جوه
ههههههههههههههههههههههه مهو عشان مش في مود الحزن ويارب افضل كده علي طول

عارفين !! امبارح كده وانا في حاله الانبساط والسلطنه دي بتاعت كل يوم من اللي بتبدي من الساعه 1
كالعاده بقلب في الذكريات بقي بحلوها ولا مرها بقي وهاتك يا تذكر فلان ولا فلانه و الموقف الفلاني والعلاني و اييييييييييييه بقي
والله لقيتني عادي مش زي الاول بالعكس بضحك
روحت قايم من الغطا كده وواقف وقولت
ايه انت اتهبلت ولا ايه ؟؟
:mad: بطل الطريقه دي لحسن تكون بتوهم نفسك
ياتري فعلا بتضحك من قلبك ولا بتداري حزنك و تعبك
ياتري فعلا مش بتتاثر لما بتفتكر ولا لسه جواك احزان وبتضحك بس علي نفسك مش عليها
لقيتني بجد ولا حاسس بحاجة وفعلا بضحك من قلبي ومن حالي كان ايه ودلوقتي ازاي
الفرق الخارجي زي م هو والمكان نفس المكان بس الشعوري اتغير كتيييييييييييييييير

كنت السنه اللي فاتت وبدايه 2008 كاتب جمله في الاستيت بتاعي علي الميل بتقول
2008 another year of sadness so there is no difference
جمله كئيبه كده و لزجه ورخمه لكن الحمد لله السنادي ان شاء الله
2009 the year of happiness for all

بصوا انا حبيت بس اسجل اللحظه دي لانها تفرق معايا كتير و في نفس الوقت بستغل فرصه ان النت كويس و بعيد عليكم كلكم
و يارب نستقبل كلنا السنه الجديده واحنا بنضحك ومبسوطين

اضحك بجد من قلبك

هنرسم ابتسامه !!

2008-12-29T13:48:00.000+02:00

ازيكم بعد طول غياب :)

هو مش طويل قوي بس كان سببه النت من ناحيه و بعدين مش لاقي حاجة جديده اكتبها من ناحيه تانيه

المهم ندخل في الموضوع

البوست ده دعوه لاننا نرسم الابتسامه علي وجوهنا

نرسم ابتسامه ؟؟؟؟؟ انت ايه ياعم مش شايف اللي بيحصل في الدنيا ولا مسمعتش اخبار غزه واللي بيجري

لا عارف كل ده و هقولك ترسم ابتسامه ليه

من كام يوم كده بتكلم مع اختي الصغيره وهي من القراء للمدونات و لقتها بتقولي في وقت فاضي ليها لفت علي عالم المدونات وبتقولي خدت كميه احباط محترمه

البوستات اللي بتنزل في معظم المدونات كئيبه و حزينه

طيب ازاي بقي عاوزنا نرسم ابتسامه؟؟

هقولك ..شايف الاحداث اللي حصلت في غزه ؟؟شايف الاسر اللي اتدمرت ؟؟ شايف كام واحد فقد انسان عزيز عليه في لحظه ؟؟شايف وشايف وشايف

اه شايف طيب ازاي بقي ارسم ابتسامه وانا شايف كل ده ؟؟

انا بقولك ترسم ابتسامه لحالك اللي انت فيه

دمعك ولا حزنك ولا اكتئابك اللي بتسجله في تدوينه واللي بسببه بتفتكر ان الدنيا خلاص اسودت ميجيش حاجة في اللي حصل واللي بقولك شايفه

حالك زي الفل جدا بالنسبه للناس دي ...احمد ربنا عليه وارسم ابتسامه علي وشك بجد بتعبر عن رضي الحال والسعاده

دموع الانسان غاليه جدا ومش اي حاجة تخليها تنزل يبقي ليه نهدرها عمال علي بطال علي مواضيع تافهه في حياتنا

تافهه؟؟

ايوه لو بصيت ليها وقارنتها باللي حاوليك هتلاقيها تافهه

هقولكم ليه اختي دي قالت ان معظم التدوينات كئيبه

معظمها يتضمنه جرح من حبيب او صدمه عاطفيه او فشل في الدراسه او او او

انا مقولتش ان ده ميزعلش ولا يحزن

بس ميكسرش بالشكل اللي بشوفه بالعكس يقوي و يخليك ترسم الابتسامه اللي بقولك عليها دي و تبص لبكره بنظره جديده مليانه امل و ثقه في نفسك وفي ربنا

بصوا انا مش عارف اوضح قصدي بس يمكن انتوا فهمتوه

انا مبحبش اشوف حد زعلان ومبحبش اكتر اعرف انه زعلان علي حاجة تتعوض وحاجه صغيره وان كانت بالنسباله كبيره بس بالنسبه للي حواليه لو قارنه بيه صغيره

وعارف اني اخر واحد اتكلم علي كده لاني في يوم من الايام كنت كده

بس انا قولت كنت مش لسه زي م انا و عرفت ارسم الابتسامه دي علي وشي

ومبيضيعهاش غير الشديد زي اللي حصل في اليومين اللي فاتوا لاخونا في غزه

ياريت ندعي ليهم كلنا و في نفس الوقت اللي كلنا حزاني علي الشهداء

مننساش اننا نحمد ربنا علي كل حال

وافتكروا بعد كده دايما

منفض وافتخر

2008-12-15T05:21:00.000+02:00

ازيكم بعد العيد ويارب يكون مر عليكم بسعاده وانبساط و خير و فرح ولحمه و فته وكله
:D
عنوان البوست غريب شويه ؟؟؟
عادي م انتوا اتعودتوا مني علي الغرابه
هههههههههههههههههههههه
المهم
في ايام العيد المبارك اتقالتلي جمله وقفت عندها كتير بفكر
اه والله كتير
وقفت عندها لحد لما رجلي وجعتني
ههههههههههه خفه :P
عشان عارف ناس هتقولي كده :D

المهم اتقالي

انت بقيت منفض للدنيا

انا اذبهليت بصراحه !!! يعني ايه منفض للدنيا مش فاهم
بس اللي قالهالي قالي انك يعني مبقتش زي الاول مهتم بكل حاجة حواليك و مهتم بالناس كلها اللي تعرفك زي بعضها و تخاف عليها زي الاول
برضه مش فاهم ؟ بمعني
يعني انت كنت زمان بتحب تعرف اخبار كل الناس و تحب تطمن عليهم ومهتم بيهم وبتحاول تساعدهم ومشيل نفسك زياده

دلوقتي بقيت منفض يعني تعرف اللي قريب بس
انا بقي ردي كان الاتي
لازم طبعا بعد مرور سنه تقيله عليا سواء دراسيا ولا نفسيا ولا عصبيا بمشاكل كتييييييييير قوي مكنتش عامل حسابها ولا متوقع انها تحصل اني ابقي كده
معني اني منفض للدنيا لو تقصد بيه الاتي:

اني ابقي بفكر في راحتي زي م بفكر في راحه الاخريين بعد لما كنت بفكر في راحتهم هما بس و كنت بضيع روحي وباجي عليها

او اني بقيت بهتم بمشاكلي و بمشاكل صحابي علي قدي
يعني بفكر معاهم لكن مبتاثرش بيها في حياتي عشان اقدر افيدهم في ايجاد الحل ولا اخفف عنهم بدل م نبكي سوا
ولا اني مبقتش اخلي اي مشكله تافهه او حتي مش تافهه تخسرني وقت ولا مجهود زي الاول وبقيت علي قد م اقدر اكبر دماغي مدام اقدر
و اني بزعل علي قد المشكله وافرح علي قد الفرح عشان مشيلش نفسي فوق طاقتها
واني بقيت بفكر في اللي يخصني ومحرقش دمي علي البعيد و لا اني اشيل الهم بدري
واني عرفت ازاي اعيش وقتي وشبابي دلوقتي بعد لما كنت ملبسه توب ميت حزين مجروح
اني بقيت اضحك و راسم ابتسامه حقيقيه علي وشي ايا كان مصدرها سواء فرح او سخريه او سعاده بس اهي مرسومه ومش مصطنعه عشان اقدر اقابل اي حاجة بنفس مستعده
اني بقيت ماشي بتفرج واتعلم دلوقتي عشان اقدر اتعامل لما اكبر

اني اقتنعت ان كل شيء باوانه والصبر والامل والجهد مفاتيح النجاح
اني بكل ده رجعت لزماني
اه بجد اصل هشيل هم بدري ليه بزياده ودلوقتي ؟؟؟ انا لسه يدوب 23 سنه لسه ورور وصوغير ايه يعني اكتر مشكله تشغل دماغي غير مزاكرتي و اهلي
ايه حب ؟؟ مش وقته لسه بدرس ولما اخلص وخلاص انا مش عديت 40

صحاب؟؟ بالتفاهم وطولت البال و تكبير العقل هتتحل اصعب مشكله طول م احنا متفاهمين وبنحب بعض
اهل ؟؟ مش هغيرهم ومهما كنت مختلف معاهم في وجهات النظر هما اهلي مهما عملوا و يا اتفاهم معاهم في الاختلافات يا اتاقلم علي الحياه كده لحد لما يجي الوقت واقدر اغير ده و اهو بكره اكبر و الناس بتتغير و اللي النهارده مختلف معاك بكره انت تتفق معاه
انا منفضتش للدنيا وزهدت فيها و اعتكفت و ربيت دقني ولا غيره مع ان نفسي ده يحصل وازهد فيها فعلا
ولا بقيت سلبي وسايبها كده
ولا بقيت مهمل في حق نفسي وحق صحابي واهلي وناسي ومزاكرتي
.ولا قاعد في صومعتي وسايب الدنيا تولع ومليش دعوه بالناس ويكشي تخرب
لا

بس انا عرفت اوان كل حاجة امتي بعد لما كنت مش عارف
وعرفت من اين تاكل الكتف زي م بيقولوا
و عرفت ازاي اتعامل دلوقتي و ده الفرق دلوقتي بيني وبين صحاب ليا وبين اللي قالي الجمله دي
اني مبقتش بدق علي كل حاجة زياده و مبقتش بحرق اعصابي بزياده
وعرفت كل حاجة تمشي ازاي

لو كل ده معناه اني منفض للدنيا
فانا بعلنها عامله

انا منفض للدنيا وافتخر

اقولكم علي سر ؟؟؟

2008-12-09T01:45:00.001+02:00

انا عمري م نسيت
:D
او بالاصح عمري م بنسي
واصلا مش مقتنع بموضوع النسيان ده ان يكون ان الانسان ميفتكرش الحاجة ولا كانها حصلت

تفتكروا فعلا احنا بننسي ؟
ولا زي م بعتقد ان حاجات بتجد في حياتنا وتفكيرنا بتاخد مكان حاجات فاتت
فكروا كده معايا تفتكروا ده صح؟؟
يعني لو جيت في يوم وسالتك فاكر الموقف الفلاني هتقولي لا محصلش ولا لا مش فاكر
بس مش مجرد موقف ومر
لا موقف اثر فيك او موقف فعلا وقفت عنه مده
انا كنت فاكر ان الموضوع سهل وان فعلا موضوع النسيان ده حقيقي
بس لقيت ان لما بيبقي ورايا موضوع ما او مشكله بفكر فيها وبنسي حاجة حصلت قبليها او بتناساها لفتره
وبمجرد لما بيزول التاثير او الموضوع او المشكله الحاليه بلاقي نفسي برجع افتكرها تاني ولو علي مثال انها بتمر علي مخيلتي بسرعه
فكره البوست ده في دماغي بقالها حوالي 5 ايام
واول امبارح يوم الوقفه نزلت خرجت مع صحابي روحنا المقطم وكان اول مره نروح والمنظر هناك كان تحفه وقعدنا نضحك ونهزر وفي دماغي فكره البوست ده اني اكتبه لما ارجع
لكن لما رجعت انشغالي بحاجات تانيه نستني اني اكتب
ودلوقتي بعد لما راح تاثير كل حاجة افتكرته وكتبته اهو
نفس الموضوع لما يكون في موضوع حصل زمان
مش بنسي بتشغل لبعض الوقت وبمجرد ما افضي واقعد لوحدي برجع افتكره حتي ولو كان من سنين
اه والله
انا بفتكر موضوع او اتنين من ايام م كنت في اولي وتانيه ثانوي
يعني من حوالي 8 سنين
ومش بتفكرهم مره ولا اتنين وخلاص لا ده كتير قوي بيجوا علي بالي
وغيرهم وغيرهم مواقف وقفت عندها في حياتي و فكرت فيها كتير
يعني مبنساش الحاجة نهائي ولا كانها حصلت في حياتي
احنا صحيح بنتناسي المواقف ونعمل نفسنا انها محصلتش عشان نقدر نكمل ومنفكرش فيها وتقلب علينا حياتنا لو كانت حزينه
او عشان منحسش بالذنب فيها لو كنا غلطانين
بس هل فعلا مبنفكرش فيها ابدا تاني وفعلا بننساها
لو اللي بيحصلي ده طبيعي يبقي اعذروني ده مطلعش سر ولا حاجة وده شيء طبيعي

لكن لو مفهوم النسيان هو اني بنسي ومبفتكرش الحاجة يبقي

انا قولتلكم علي سر

انا فعلا مبنساش ولا عمري بنسي

:)

تاج

2008-12-07T06:02:00.000+02:00

كل سنه وانتوا طيبين يا اجمل مدونين و عيد سعيد عليكم اعاده الله عليكم بالخير واليمن والبركات وكل انسان يحقق اللي بيتمناه فيه
:)

من زمان مكتبتش تاجات في المدونات اللي كنت عاملها وفي الاخر وصلني تاج من ابو صلاح اللي كلكم عارفينه و عارفين انه صاحبي الانتيخ
هو مش انتيخ قوي هو انتوخ
ههههههههههههههههههههههههههههه
المهم يلا نبتدي التاج
بسم الله الرحمن الرحيم

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

متهيالي معظم الاجابات هتكون في عصر الرسول عليه افضل الصلاه والسلام او واحد من الخلفاء الراشيدين وخصوصا عمر بن الخطاب
السبب بقي ان الايمان كان اقوي من دلوقتي بكتير والحياه كانت بسيطه والخلفاء والرسول كفايه الواحد يبقي عايش في زمنهم عشان ياثروا في حياته اكتر من دلوقتي و خصوصا لما يكون بيشوفهم

أول أولوية فى حياتك عيلتك ولا شغلك ولا اصحابك؟
العائله ثم العائله

ايه أكتر حاجة بتحبها فى رمضان ؟
لمه الاسره حوالين السفره و الاكل سوا

اوصف أجمل فطار ممكن تفطره؟
اجمل فطار ممكن افطره ممممممممممممممممممممم
مع عيلتي كلها في بيتنا القديم علي الارض و كل خلاتي واخوالي و قرايبي متجمعين و نهزر ونضحك علي بعض و نقعد بعد الفطار نشرب الشاي سوا ده لو في رمضان
لكن فطار عادي بتاع الصبح ده مع اسرتي يوم الجمعه قدام التليفزيون قبل الصلاه و احنا بناكل الفول والبطاطس والبيض المسلوق اللي عملاهم امي ربنا يخليهالي

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
اكيد طبعا هكون عادل
ازاي بقي دي محدش يقدر يقيمها غير الناس اللي بتتعامل معاهم و انك تكون موفي اللي عليك و كل حاجة
الخليفه عمر بكي خوفا من ان تكون دابه تعثرت في الطريق فيسال عنها يوم القيامه عشان ممهدش الطريق ليها
يبقي انا اللي هتاكد اني بعمل كل حاجة بعدل
العدل ده ممكن تحسه في نظره الفريق اللي معاك والناس وحبهم ليك و تعاملهم معاك

مين أكتر اعلامى مصرى بتحترمه ؟
انا مش متابع الاعلام بقالي كتير قوي بس ممكن اقولك محمود سعد و مني الشاذلي

لو ممكن تشتغل شغلانة تانية كنت تتمنى تبقى ايه ؟؟
مهندس وخصوصا مهندس كومبيوتر ودخولي الطب ده بدعوه جدي مش بارادتي
ههههههههههههههههههههه

ايه تانى بلد تتمنى تعيش فيها بعد مصر ؟؟
كله عندي سواء لاني مجربتش غيرها

اوصف ترتيبات اجمل فرح ممكن تحضره ؟
اجمل فرح ممكن احضره فرح اختي او فرح اي حد من صوحابي
ترتيباته يكون بالليل علي مركب كبيره في وسط النيل ويبقي الدي جي مشغل اغاني هاديه طول الفرح ومعظمها سلو و مفيش الرزع اللي بنشوفه
وفي اخر الفرح الناس تروح بيوتها و لا عزاء للعزاب
هههههههههههههههههههههههه

بتراعى كلام الناس والقيل والقال ؟؟ ولو اه او لا قول ليه ؟
اه بس مش قوي
ليه عشان انا مش عايش لوحدي في الدنيا ونظره الناس مهمه لكل شخص
مش قوي ليه لان ساعات كتير بيبقي نظرات الناس غلط و كلامهم مبني علي جهل منهم بالامور وساعتها لو فضلت عليه هبقي انا كمان غلط عشان كده باخد اللي حاسس انه صح و اسيب اللي شايف انه مش صح.

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
كله في داهيه الا الكومبيوتر لانه بقي صديقي ولو حتي من غير نت اهو بعرف افرغ فيه اللي جوايا
لو هو كمان مش موجود و رجعت لعصر الحمام الزاجل هقضيها سيجه بقي علي الرمل
هههههههههههههههههه

السعادة هى ..؟
اطمئنان النفس والروح

عندك أمل ؟ اسبابك ؟
ايون كبير جدا...اسبابي ان محدش عارف بكره فيه ايه غير ربنا و انت مدام بتتنفس يبقي تقدر تحقق اللي بتحلم بيه

لما بتحب تهرب من كل شئ بتروح فين ؟؟
بفتح الشباك بتاع اوضتي بالليل و اطفي النور واقعد علي السرير و بشغل ميوزيك معينه عندي

امتى اول مرة خدت فيها نفس طويل وقلت ياااه انا فعلا كبرت ؟؟
لما لقيت والدي بيكلمني عن عروسه وبيخطط معايا ازاي اقدر اخطبها ولا اصرف عليها
هههههههههههههههههه بس طبعا موافقتش هههههههههههههههه

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
لا الحمد لله لا انا ولا والدي
شعوري لما بشوف راجل بيشرب سجاير بشمئز من الوضع و بفكر ايه اللي خلاه يعمل كده
اما لو بنت فلا تعليق لان بقي دي قمه الاشمئزاز

بتعرف ايدك اليمين من الشمال ازاى ؟؟
ايدي اليمين علي نفس ناحيه رجلي اليمين

ايه اكتر الة موسيقية بتحبها ؟
الجيتار بس الاسبانيش والبيانو

فى رأيك ليه الذوق والنخوة اتعدموا ؟
هما مش انعدموا هما قلو وليه بقي عشان الاهل مبقوش يزرعوهم في الاطفال من الصغر والشباب بيفكر في نفسه دلوقتي وبقينا في زمن ياعم كبر ..ياسيدي سيبك.. كول يامان
فمحدش بقي يخاف علي الناس زي زمان

ايه الحاجة اللى لو حصلت لك حتبقى سعيد اوى ؟
اني اسمع خبر كويس عن حد من صوحابي وافرح فيهم واني اتخرج بالتقدير اللي عاوزه
وان والدي ووالدتي يبقوا دايما مبسوطين

تحب يبقى عندك ارض زراعية ولا اجنس عربيات ولا كام عمارة ولا فلوس فى البنك ؟
عاوز يبقي عندي عربيه و مزرعه و شويه فلوس بس مش كتير
ههههههههههههههه

البحر ولا النيل ؟
البحر وقت الغروب او الصبح بدري ومبحبش ابصله بالليل

مركب ولا طيارة ؟
مركب

مجنون ولا عاقل ؟
شبه مجنون
هههههههههههههههههههههههههه

تقرا كتاب ولا تتفرج على فيلم ؟
اتفرج علي فيلم بس يكون ليه قصه عدله مش متكرره وياريت لو تكون غامضه او اقرا كتاب بس مش سطحي

تمرر التاج ده لمين ؟
لاي حد عايزه عشان ميبقاش غصب واقتدار

ها يارب اكون جاوبته كويس و اهو حاجة خفيفه عشان العيد

كلوا لحمه بقي كويس
:D

ياتري هتعرف؟؟؟

2008-12-02T04:00:00.000+02:00

ازيكم يا احلي مدونين النهارده حصلت ظاهره فلكيه ان حصل مش عارف ايه في القمر والمشتري والزهره المهم انهم بقوا بالمنظر ده
النقطه اللي علي اليومين دي المشتري واللي علي الشمال دي كوكو الزهره و طبعا الهلال هو القمر

المهم كنت ببص في السما وانا مستمتع بالمنظر وبقول سبحان الله و كعاده اي شخص طبيعي لما بيبص في السما بيتراكم جواه مزيج من الافكار والاحداث والذكريات
انا بقي جه في دماغي موضوع عيش اللحظه اللي صديقي الانتيخ ابو صلاح كاتب عنه في مدونته
مشاهدات

بصراحه اول مره يا صلاح تكتب حاجة تعجبني
هههههههههههههههههههههههه بهزر معاك

المهم بقي هو بيدعو في البوست بتاعه ان كل انسان يعيش اللحظه وميفكرش في الهموم
بصراحه دعوه لراحه البال والتفاؤل ونسيان المشاكل عجباني مع اني مختلف معاه فيها
اصل الانسان مش بمزاجه يقدر يعيش اللحظه ولا لا
مش طبعي يعني اني اقعد افكر في بكره ولا في كمان ساعه ولا نص ساعه
الانسان زي م رديت عليه في البوست لما بتثقل علي الهموم والمشاكل بتتحول اللحظه في حياته لمليون لحظه بيفكر فيها في كذا حاجة
وتداخل الافكار والهموم سوا مبيخلهوش يقدر يعيش اللحظه
انا عارف ان فيه ناس بتقدر تعيش اللحظه زي م صلاح عاوز و بيقدر يفصل بين الهزار والهم وبيعرف امتي يفكر في مشاكله وامتي يستمتع بحياته
بس احنا بشر مش جهاز كومبيوتر بزار لما ندوس عليه يبطل تفكير ويهيس ويضحك ولما يجي وقت التفكير ادوس عليه تاني عشان افكر
بجد صعب الانسان المهموم اللي في دماغه مشكله بتنغص عليه يومه ولا تفكيره انه يقدر يعيش اللحظه زي م صلاح بيقول

طلعت رحله وسط صحابك عشان تفك شويه وتفرفش عارف هتيجي عليك لحظات لما تبقي لوحدك لازم هتفكر في اللي وراك
الانسان مبيقدرش يمنع نفسه من التفكير في احزانه ولا همومه بمزاجه
لازم يبقي فيه حاجة شغلاه عن التفكير
لكن اني ابقي لوحدي وافصل نفسي عن الحقيقه
صعب
انا مثلا مقدرتش في يوم اعيش اللحظه زي م صلاح بيقول طول م ورايا مشاكل او هموم لكن لما طلعت رحله راس سدر من اسبوعين قدرت اعيش اللحظه والنهارده وانا ببص للقمر قدرت اعيش اللحظه عشان مورييش حاجة ودماغي مرتاحه

اتخيل بقي واحد ولا واحده وراه مشاكل في المزاكره ولا مشكله مع خطيبته ولا خطيبها ولا متخانق في البيت وزعلان
هيبص للقمر و يفكر في المشاكل دي
هيطلع يستمتع مع صحابه ويضحك ويهزر و اول لما يبقي لوحده هتتسلل الافكار تااااااااني لراسه و يفكر فيها
وتقلب عليه اللحظه
انت فعلا بتعيش كل لحظه بلحظتها
يعني ايه؟؟

يعني وسط الفرح بتيجي عليك لحظه حزن و هموم فبتعيشها و ترجع تاني تفرح وسط صحابك
وسط الحزن حد بيضحكك بتعيشها وترجع تاني تزعل وتفكر لو راح التاثير ده

يعني انت اصلا بتعيش كل اللحظات بس المهم

هتعرف تعيش انهي لحظه فيهم
زي صلاح م بيقول ولا زي م بيحصل فعلا؟؟؟
المهم بس انك تعيشها صح

:)

ايه رايكم

2008-11-30T00:21:00.001+02:00

الاول انا بعتذر للناس عن غلقي مدونتي اهو اي كلام بصوره مفاجأه بس حصلت ظروف كتير خلتني مقدرش اكتب فيها و لقيت الطابع اللي عملتها عشانه مبقاش موجود وعشان كده قفلتها و بعتذر تاني عن ده

دلوقتي بقي انا ريحتكم من التنطيط في المدونات بتاعتي و وجع الدماغ و رجعت المدونه تاني و قسمتها و هكتب فيها كل حاجة بقي عشان يبقي بجد اهو اي كلام
ونقلت كل التدوينات والتعليقات بتاعتكم في المدونه دي

وقفلت خواطر ميت و طابعها و سكيزوفرينا و جمعت التدوينات في مدونه واحده متقسمه في الجنب اهي

انا مش عارف ده الاحسن ولا لا بس بجد عشان حسيت ان افكاري كلها اتفرقت و حبيت اني اجمعها في مدونه واحده والناس تشاركني فيها مش تبقي متوزعه في كذا مكان

وبالمناسبه دي بحب اهدي شكر خاص لصديقه عشان اقترحت عليا اني اسمي تدوينات سكيزوفرينا باسم
جادوفرينيا
عشان اللخبطه عند الناس والخلط بين المرض واللي بتكلم عنه وعشان اللي بيحصل فيها خاص بيا انا مش علي العموم
وكل واحد بقي بتحصله الحاجات دي يسميها باسمه
ههههههههههههههههههههههههههههههه

انا بعتذر مره تانيه و ان شاء الله هتبقي دي مدونتي الوحيده

سلام
:)

لحظه تأمل

2008-11-24T05:08:00.001+02:00

ازيكم عاملين ايه ؟؟ يارب تكونوا دايما كويسين
:)
من يومين تلاته كده كنت في رحله تبع الكليه لقريه رمادا في راس سدر
من بدايه اليوم و انا حاسس فعلا اني هكون في اليوم ده لوحدي و فعلا انا كنت مخطط اني اقضي اليوم لوحدي وده اللي حصل
المكان هناك كان جميل والميه والهوا والبحر كانوا عاملين اجمل شغل و برغم من اني فعلا كنت طول اليوم مع نفسي الا اني مكنتش لوحدي و طبعا عارفين ليه
دايما كان معايا
ههههههههههههههههههههههههههههههههههههههههههههه
ايوه انا كان معايا
المهم علي وقت الغدا كدا رحت خدت الوجبه ورحت عند المركب القديمه و قعدت اتغدي وببص للبحر و السمك الصغير اللي كان باين من تحت المركب وبسأل نفسي يااااااااااااااااااااااه علي روعه الخلق والخالق يااااااااااااااااه ليه الواحد ميبقاش زي السمكه دي كده ماشي ومش شايل هموم
وهنا انطلقت الموسيقي التصويريه في البلوج مصوحبه بظهور الشخص التاني و راح قايلي
ومين قالك ان السمكه دي مش شايله هموم يابني مفيش حاجة في الدنيا دي ماشيه كده وخلاص
قولتله هموم ايه اللي شايلاها ياعم
قالي مهي السمكه دي اللي شايفها بتعوم و ماشيه براحتها بتدور علي اكل ليها ولولادها و علي مكان تحتمي فيه من السمك اللي عاوز يفترسها
فكرك يعني ان دي مش هموم
بلاش السمكه دي شايف الطير اللي طاير فوق ده اهو ده نفسه كمان شايل نفس الهموم
عارف ان ناس كتير تقولك ياريتني كنت عصفور ولا كنت فراشه عشان يعيش بيطير و سارح من غير هموم
بس حتي دول ليهم هموم و بيحاولوا يتعايشوا معاها وبيها
قولتله بس همومهم دي مش زي همومنا ولا زي حياتنا
قالي مهو كل واحد وعلي حسب بيئته و عيشته و كمان ربنا ادالك عقل تفكر بيه عنهم و يعقل الامور ويوزنها
لكن هما تفكيرهم محدود وعشان كده همومهم دي نفسها محدوده
انا عارف انك بتفكر في سنه مرت عليك و حصلك فيها كتير بس خلاص ياعم انسي و ارجع لحياتك من تاني واحمد ربنا انها جت لحد كده
شايف الشمس دي ؟؟ شايف البحر ؟؟شايف الهو ؟؟ شايف صحابك هناك و الناس حواليك
كل ده بيدور في مدار مرسوم و اللي حصلك مرسوم و مكتوب
انسي الهموم وابتدي من تاني بس متفكرش في اللي فات واتعلم منه
بس اللي فات كان صعب عليا و كل الافكار في دماغي اختلطت و مبقتش عارف افكر
طيب كان صعب ياتري هتفضل عايش فيه ؟؟؟ وتفكر فيه ؟؟؟ لا هيصلح اللي حصل ولاهيرجع اللي فات رتب افكارك و اعرف اخطائك و اعرف ان كل حاجة حصلت ليها حكمه وليها سبب وربنا دايما بيديلك اللي تستحقه
يابني الدنيا لسه حلوه و اللي جاي صدقني احلي بس عاوز صبر و مجهود والمهم انك تكون عرفت عاوز ايه و هتمشي ازاي
ومع اخر كلامه كنت خلصت الغدا ,واختفي مصحوب بنفس الموسيقي التصويريه و رحت علي المارينا اللي في وسط الميه بفكر في كلامه
و مرسوم علي وشي ابتسامه امل و فرح
ومرسومه علي وشه ابتسامه رضي و ثقه

:)

عندما تعجز السكيزوفرينيا

2008-11-15T02:27:00.001+02:00

ثواني قبل اي حاجة عشان انا حاسس اني هتشتم في البلوج ده ولا هتضرب من الناس لاني حاسس اني كلامي مش مفهوم عند بعض اللي بيقروا
بعض ايه يا خويا ده كله تقريبا (ايموشن رخم )
والله انا بحاول اقرب الصوره علي قد م اقدر للناس بس مش عارف الناس بتقرا و تذبهل ليه ؟؟

دلوقتي العنوان هشرحه بس بالراحه عليا عشان شايف ناس مكشره و ناس بتقول هوووووووووووف وبعدين بقي احنا اتخنقنا
حاضر حاضر هقول بالراحه ويارب البوست يعدي علي خير
:D
عندما تعجز السكيزوفرينا ياريت الناس تركز و العنوان ميوديش دماغهم لجلاكسي و اعلانتها عندما تعشق الشيكولاته عشان انا عارف
ساعه البطون تتوه العقول

ناس البوست اللي فات قالتلي احنا خدنا كتير عقبال م ربطنا العنوان بالموضوع و مش عارفين لسه العلاقه
طيب يارب اكون موفق في اختيار العنوان المرادي
طيب يعني ايه بقي العنوان
بص يا سيدي انت مش ساعات بينك وبين الشخص التاني اللي عامله جواك وبتستشيره بتبقوا قاعدين كده علي منتصف الليل و فاتح الشباك و بتبص للسما و مشغل ميوزيك هاديه و تيجي تاخد رايه في موضوع او تعرض عليه رايك في حاجة
وتلاقيه في وسط الجو ده راح صدمك بعكس رايك
ويقولك لا ويقولك عكس اللي انت فاكره ولا ناوي تعمله ولا بتفكر فيه
وتقوله ليه؟؟ يوقلك هيحصل كذا وعشان كذا و يرص ليك النتايج و السلبيات و الحاجات المتوقعه لو انت عملت اللي عاوزه ولا فكرت بطريقتك
تقتنع بس برضه عاوز تعمل الموضوع بطريقتك وتفكيرك و برغم ان رايه سليم ميه في الميه بس لازال جواك شعور بعدم الرضا لو اقتنعت برايه

ممممممممممممممممممممم اوضح اكتر ؟؟ حاضر

نفرض انك عاوز تاخد خطوه معينه ايا كانت و خايف و بتتناقش مع نفسك اللي هي الشخص التاني في الخطوه دي
و قالك لا متعملهاش عشان احتمال كبير هيحصل كذا وكذا وكذا
وبالرغم من صحه كلامه الا انك برضه عاوز تاخد الخطوه دي لعل وعسي يكون غلط مع ان الاحتمالات اللي فرضتها نفسك و النتايج نسبه حدوثها اكبر من نسبه خطائه اللي انت فرضتها

دمااااااااااااااااااااااااااااااااااااااغنا ارحمنا ايه اللي بتقوله ده (ايموشن ماسك سكينه )

استنوا طيب هقول مثال يمكن يوضح الصوره :(
نفرض انك عاوز تنزل تشتري تيشرت مثلا وعجبك لونه و لنفرض انه اسود زي البلوج ده و نهاري لو مفهمتوش البوست :(
بس التيشرت ده فيه عيب انه مثلا فيه كتابه بتلمع او اي حاجة
بس الاستايل حلو قوي وبعدين المقاس كمان
يدور بينك وبين نفسك حديث و تسالها تلاقيها تقولك لا متجبوش وشوف حاجة تانيه او خد التاني
تقول بس الاستايل حلو والمقاس واللون و هو ده اللي كان في خيالي بس لولا الكتابه اللي بتلمع دي
ترد عليك وتقولك لو جبته هتلاقي تريقه عليه من الناس و من اهلك ومن صحابك قد كده
تقول هو صح جايز بس يمكن يعجبهم هما كمان
وتمشي و جواك صراع و نفسك تتقسم بين اتنين بس المرادي عكس بعض تماما في الراي و تتمني انك تجيب التيشرت وفي نفس الوقت خايف من النتايج اللي هتحصل نتيجه الخطوه دي والمرادي نصك التاني مفادكش الافاده الكامله برغم ان رايه عكس رايك

المثال عبيط بس عشان اوضح قصدي ايه المهم
هنا عجزت السكيزوفرينيا اللي عملتها ليك كناصح وراشد انها تقنعك زي كل مره
طيب ليه المرادي بالذات؟؟
عشان انت نفسك مجربتش و مشوفتش وعرق المغامره او الفضول بينقح عليك و بيوجعك و مش بينيمك الليل ولازم تشوف بنفسك
وتروح تسال حد تالت و لنفرض صديق ولا اخ ولا اخت وتلاقي رايهم برضه من راي نصك التاني
ويمكن يهدي النقح بتاع الفضول والمغامره عندك بس برضه

هنا انت مقتنع بكلامهم جدا لكنك برضه عاوز تجرب
وفيه فرق هنا انك مقتنع بكلامهم وبرغم كل ده عاوز تعمل اللي في دماغك وانك اصلا مش مقتنع بالكلام
طيب والحل ايه ؟؟
من وجهه نظري انك تعمل اللي انت عاوزه برغم كل اللي حواليك حتي لو كانت النتايج اللي توقعوهالك حصلت بس تبقي انت كمان متوقع النتايج دي مش يبقي مسيطر عليك فكره انهم ممكن يكونوا غلط وتتحمل نتيجه قرارك في النهايه

طيب ليه في اعتقادك يا كابتن؟؟؟
هقولك
لان لما اعمل الشيء وانا متوقع كل النتايج سواء الوحش والحلو لما يحصل ده او ده مش هيفرق معايا قوي
لكن لو توقعت ان صحابي و اخواتي و اهلي يعجبوا بالتيشرت وفجاه لقيتهم كلهم بيقولولي ايه القرف ده لا لا وحش
هتصدم و اقول ياريتني كنت سمعت و ياريتني كنت عملت
لكن من الاول لو متوقع هقول ايه يا سيدي انا كنت متوقع حاجة زي كده و كنت بس عاوز اتاكد و قولت جايز يحصل النقيض وهتبقي صدمتك اخف شويه

ولاني لو معملتوش هيفضل عرق الفضول والمغامره بينقح عليك كتييييييييييير ويعملك صداع

ها فهمتوا حاجة ؟؟؟؟؟
طيب لو فهمتوا حد عنده وجه نظر تانيه ؟؟؟
:)

سكيزوفرينيا الموقف

2008-11-10T01:22:00.001+02:00

اتفقنا من الاول خالص اننا مش بنتكلم علي السكيزوفرينا من الناحيه الطبيه ولا من ناحيه علم النفس لان السكيزوفرينيا اللي هنا
مش اللي في كتب الطب و لا حاجة لا دي السكيزوفرينيا اللي موجوده جوه كتير مننا وعشان محدش يقول ايه الكلام العبيط ده ولا اللي ملوش اساس من الصحه
انا بتكلم عن نفسي وعن فكرتي اللي بحاول اوصلها في المدونه مش بشرح حاجة موجوده و اعظم علماء النفس بهدلوها تفسير ودراسه
اوك؟؟
انا المرادي عاوز اتكلم عن سكيزوفرينيا الموقف
واحد هيطلع يسألني يعني ايه ؟؟
اقولك انا يعني ايه
سكيزوفرينيا الموقف انا بوصف بيها المواقف اللي بتحصل تستلزم انك تخرج من جواك الشخص التاني اللي اتكلمنا عنه
وتخليه يتناقش معاك في الموقف اللي حصل بس ساعه الموقف نفسه مش بعد كده
هيرجع نفس الشخص يسألني يعني ايه برضه ؟
هحاول اوضحلك
مش ساعات انت بتبقي مع صحابك ولا ماشي في الشارع ويحصل موقف معين يستلزم انك تقف عنده شويه ولو ثواني و تنح وتفكر و تكمل مشي وانت بتسال نفسك اسئله و بتحاول تلاقيلها اجابه؟؟

اه بيحصل
عليك نور اهو هو ده اللي انا اقصده بس بدل م بتمشي و تفكر وتسأل روحك اسئله عاوز تلاقيلها اجابه
بتسأل حبيبك و نصك التاني اللي دايما معاك منين متروح و تاخد وتدي معاه و الناس تفتكرك مجنون وانت ماشي بتكلم روحك
و تلاقي واحد بيبصلك كده و يحرك ايديه جنب ودنه في اتجاه عقارب الساعه و يقولك اصحاب العقول في راحه

برضه لسه مش فاهم ؟؟
ان شاء الله اعدمك لو فهمت حاجة !

طيب بص يا عم هديلك مثال صوغير يمكن يوضح الصوره برغم انه ممكن يكون عبيط بس لعل وعسي الصوره تقربلك يا سيدي

اتفضل قول
افرض انك ماشي في الشارع ولقيت قطه صغيره وصعبت عليك و عاوز تخدها عشان شكلها صعبان عليك وهي في عز البرد وجعانه
و تروح عشان تمد ايديك وتمسكها

تلاقي حبيبك اللي بنتكلم عنه طلعلك قدامك كده مع الموسيقي التصويريه اللي في البلوج ويقولك
انت بتعمل ايه ها ؟؟ انت اتجننت
ترد وتقوله ايه هاخد القطه اربيها واشوفلها مكان تنام فيه
يقولك: ت ــايه؟؟!! تربيها انت قادر تهتم باوضتك ولا بهدومك وترتيبها عشان تربي قطه
وبعدين مامتك ولا باباك هيرضي انك تدخل القطه دي البيت و انت جايبها من الشارع انت مش عامل حساب الموضوع ده
تروح انت متراجع عن فكرتك و موطي راسك وتقوله عندك حق و تسيب القطه وتبعد وبترميها بنظره حزن وشفقه

ويختفي الشخص اللي ظهر تاني مصحوب بنفس الموسيقي التصويريه اللي في البلوج
و تكمل طريقك و انت جواك مقتنع ان اللي عملته ده صح لان فعلا لا اهلك هيرضوا انك تاخد القطه ولا انت اصلا هتقدر ترعاها لانك مش عارف تهتم بحاجاتك بس بالرغم من ده زعلان علي حال القطه

ها فهمت كده انا عاوز اوصل ايه ؟؟؟

ممممممممممم يعني شويه

اللي عاوز اوصله ان مواقف كتير بنتعرضلها بيبقي جوانا مشاعر مكبوته وكلام كتير واحاسيس اكتر و كل اللي غالب علينا الوقت ده هو التساؤل والسكوت
بنسأل روحنا اسئله و بندور علي اجابات ليها و بناقش روحنا في احداث او بنفكر نتصرف ازاي لكن ساكتين مش قادرين نبوح بده الا مع نفسنا ..وساعات بنبقي عاوزين ناخد قرار في وقت سريع مجرد دقايق و بنتكلم مع نفسنا و نفكر عشان ناخد القرار ده
ففي وقت صغير جدا ثواني او دقايق بيخرج الشخص التاني اللي جوانا و يحاورنا و يناقشنا في القرار او الموضوع
و هنا ده اللي بقصده بسكيزوفرينا الموقف

ياتري اللي ماسكني تساؤل من اول البوست فهم ولا لسه ؟؟؟

و ياتري بقي حصلت معاكم سكيزوفرينا الموقف دي قبل كده ولا لسه ؟؟