امبارح كان واحد من اجمل الايام اللي قضيتها في حياتي و واحد من اجمل الايام القليله جدا اللي عدت عليا في الست سنين في الكليه اللي تعلق في الذاكره وتفتكرها وتبقي سعيدامبارح كنا في افطار مع الاطفال المرضي في مستشفي االاطفال بالدمرداش
يوم كان تحفه بكل ما تحمله الكلمه من معني
يوم فعلا كل اللي حضروه وحسوه هيبقي بالنسبالهم يوم من حياتهم
احكيلكم اليوم باختصار
افطار متنظم تبع رابطه اصدقاء الاطفال المرضي اننا هنقعد في اليوم من الضهر لحد الفطار مع الاطفال في الغرف نلاعبهم ونعلمهم حاجات و نفطر معاهم وبعد كده حفله ليهم
وكان فيه اجتماع الصبح عشان توزيع المهام ...بس لما حضرته حسيت اني مش ميال اني اقعد مع الاطفال في الغرف فقولت هشارك في التنظيم والتجهيزات واننا نجيب الحاجات الناقصه وكده لحد لما الوقت يعدي
بس تحس بجد من بدايه اليوم ان ربنا مبارك في العمل الصالح اللي الانسان بيعمله
من ساعه لما خدت المهمه اللي مكلف بيها وخلصتها مكنتش تحس باي عقبات وبعد كده رجعت قولت هطلع اشوف النظام ايه في الغرف مع الاطفال والعنابر وقد كان
طلعت ولفيت علي كام عنبر كده ودخلت اكتشف الجو ايه ونظامه
صحيح اني علي وشك اني اصبح طبيب وصحيح اني دخلت المستشفيات كتير واتعاملت مع ناس كتيروشاركت في نشاطات طلابيه كتير بس عمري م اتيح ليا اني اتعامل مع الاطفال المرضي عن قرب للدرجه دي اكتر معامله ليا معاهم كان وقت الامتحانات والراوندات وانا بكشف عليهم
فعلا حاجة مختلفه تماما
انا مش هحكي تفاصيل عشان عارف ناس بتزهق وناس هتقول واحنا مالنا انا هقولكم انا بكتب البوست ده ليه بعد غيبه
-اليوم فعلا كان رائع للناس قبل الاطفال
وفيه الواحد اكتشف حاجات اكتر جواه ...يعني انا مكنتش حاسس اني هعرف اقعد مع طفل واتكلم معاه واقوله علي حاجات ونصائح واهزر واضحك ونلعب ونرسم لاني زي م قولتلكم تعاملي معاهم كان من بعيد وتعاملي دايما مع الكبار
لكن فجأه لقيت ان الموضوع غير م كنت متخيل بالعكس سهل جدا انك تقعد تعمل كل ده
انك ترسم بسمه علي وجه طفل مريض دي حاجة مش متخيلين قد ايه فظيعه بالنسبه للانسان لما تدخل عنبر اطفاله كلهم مرضي بامراض سرطانيه او امراض الدم وتشوفهم في حاله هزال وبرغم ده بيضحك ويلعب وعنده احلام انه يطلع دكتور ومدرس ومهندس حاجة رائعه
تخليك تفكر مليون مره في حياتك وتقف عليها من بعيد
وتحمد ربنا علي اللي انت فيه واللي عفاك منه وتعرف ان الدنيا اقل كتير كتييييييييييييييييييييييييييير من ان يتبكي عليها البكي اللي بنشوفه في المدونات واللي كانت مدونتي واحده منهم
انا مبقولش اننا خلاص نمشي بمشاعر سلبيه والحزن من حياتنا ننهيه لكن مش علي اي حاجة نزعل زي م بشوف لان فعلا اللي شوفته امبارح حسسني ان معظمنا عايش جوه صندوق مقفول عليه بمشاكله واحزانه وافراحه مشغول فيها مبيفكرش في اللي حواليه
حسسني قد ايه فيه ناس محتاجه فعلا الرعايه و لو بس بالكلمه
متتخيلوش سعاده كل اللي كانوا منظمين الحفل امبارح قد ايه وهما شايفين الاطفال المرضي دول بيلعبوا ويضحكوا وسعاده اهاليهم وكميه الدعاء اللي دعوها ليهم
وفرحتهم بان اولادهم فرحانين ومبسوطين
حتي الاولاد نفسهم كانوا زي العسل وبيضحكوا معاك برغم االالام اللي هي كانت فيها
المفارقه في اليوم اني بعد لما كنت شغال في التنظيم لليوم سواء من وجبات او تنظيم للحفل وغيره اصبحت مسئول عن عنبر كامل من الاطفال
يعني شوفوا من بدايه اليوم كنت حاسس اني مش هعرف اتعامل واذ فجأه بقيت مسئول عن عنبر كامل فيه حوالي 6 اطفال بالمتطوعيين اللي قاعدين معاهم
بجد انا راجع امبارح بسعاده فظيعه وراحه نفسيه رهيبه
وكل اللي كانوا معايا راجعين كده
يوم بجد بجد رائع
اشتغلت في حاجة غريبه عليا لاول مره
اتعرفت علي ناس قمه في الجمال وسباقين لعمل الخير
اشتغلت مع اخواتي و اكتر ناس بحبهم في الكليه وقضينا يوم فعلا مش هننساه وربنا يكرره دايما
ورسمنا بسمه علي وجوه الاطفال واهاليهم
باختصار ميتقالش علي اليوم ده الا انه
يوم من حياتي
:)
12 comments:
:)
و الله اسعدتنى...
ربنا يكرمك بالذكرى دى وتفضل خالدة معاك ان شاء الله...
و شكرا انك تحملت اى مسئولية اخدتها
:D
فعلا يوم من حياتى انا كمان كان يوم لذيذ بجد وتحفففففة وعمرى ما هنساه فعلا
والاطفال كانو عساسيل خالص
دة غير اللى كان مسئول عننا كان راجل جنتل مان والله وجدع ههههههههههههههه
ربنا يتقبل مننا ويجعله فى ميزان حسانتنا جميعا ان شاء الله
:)
VERY Nice post :)
بجد كان يوم مميز الحمد لله
يا رب نفضل نحضر الفطار ده الى الأبد...سواء كنا احنا الي منظمينه ...او غيرنا من الأجيال اقادمة .... عشان كدة احب الأعمال الى ادومها ...بحس انهم مستنينا من السنة للسنة :)
الحمد لله
انا متأكد انى كتبت كومنت وقت ما البوست ده نزل :huh:
دكتوره رغده:
شكرا انكم اتاحتولي فرصه زي دي واني اشارك فيها وربنا يجازيكم كل خير علي ده ويجعله في ميزان حسناتكم
دينا:
هههههههههههه
برغم صدمتي لما فجاه بقيت مسئول عنكم الا والله دي من اجمل الايام اللي جمعتني معاكم في الكليه واشتغلنا فيها سوا وربنا يخليكم ويطرح البركه وحب الخير في قلوبكم
دكتوره ياسمين:
امين يارب العالمين
ربنا يجعله شفيع ليكي ولينا يوم القيامه بجد ادخال البسمه علي الاطفال شيء فعلا رائع
سفاح:
لا يابني والله ده اول كومنت اشوفه ليك في البوست ده :huh:
بجد ربنا يكرمكم .. الواحد مش عارف ليه مقصر في الزيارات اللي من النوع ده
كل سنه وانت طيب يا دكتور
عيد سعيد ان شاء الله
احمد1316
ربنا يكرمك لو حابب في اي وقت اتصل بيا وابلغك بالنشاطات وفي المنتدي عندنا الرابطه بتاعت المرضي ليها موضوع
بندقه
يااااااااااااااااه فينك يابنتي ايه سنه سادسه ودتك فين
كل سنه وانتي بالصحه والسلامه وربنا يجعله عيد سعيد عليكي :)
Post a Comment