CLICK HERE FOR BLOGGER TEMPLATES AND MYSPACE LAYOUTS »

Wednesday 31 December 2008

ههههههههههههههههههه




هههههههههههههههههههههه
غريبه اني بنزل بوستين ورا بعض ميفصلش بينهم يوم مش عاويدي يعني
وكمان عنوان البوست متخلف يدل علي واحد حصلتله لوسه وبيضحك علي الفاضي
هههههههههههههههههههههههه
والله م عارف اصلا بضحك ليه
الاول هابي نيو يير ليكوا وليا و لكل الناس ميلادي وهجري ويارب السنتين الميلادي والهجري
(اكيد الاتنين مع بعض مش كل واحده لوحدها بطلوا الذكاء ده) يبقوا احسن من اللي فاتوا علينا وعلي اهل غزه

بعيدا عن الاحداث اللي بتحصل في البلد ولا في العالم انا مستلماني حاله انبساط وضحك جميله قوي علي نهايه السنه دي ويارب تكمل معايا علي طول طول السنه الجايه بعيدا عن عين الحاسدين :P

انا قولتلكم والله مش عارف بضحك علي ايه ولا اصلا بكتب البوست ده ليه بس كل اللي اعرفه اني بضحك ومن قلبي وبصوت مسموع لدرجه ان اللي في البيت ساعات بيفتكروني اتجننت
(هو انت لسه م انت خلاص لسعت اصلا)
ههههههههههههههه
مش عارف ده ضحك علي حاجة فعلا تضحك وتبسط ولا تاثير البرد ولا سببه الجبنه الرومي اللي بالبسطرمه اللي طعمها عامل زي صابونه كاميه اليجانس ولا عشان سخريه علي حاجات كتير حصلت وبتحصل ولا لان الضحكه دي كانت غايبه عني بقالها كتير و كنت حزين طول السنه اللي فاتت تقريبا و ضحك السنه كله اتحوش وبيطلع دلوقت ولا عشان مرتاح البال ولا عشان ببقي مبسوط قوي وانا بهزر مع اختي الكبيره وماما وبابا ولا ولا ولا

مش لاقي سبب والله بس مبسوط جدا ونفسي كل الناس تبقي مبسوطه ومن غير سبب واللي قال الضحك من غير سبب قله ادب غلطان انا اهو مش لاقي السبب يمكن يكون موجود بس مش واخد بالي منه بس مش مهم انا بضحك ومش مجرد مبتسم لا بضحك و حاله ضحك جميله جدا سعيد بيها
ايه مستغربين ؟؟بقالي فتره مبكتبش حزين ولا بنزل بوستات كئيبه؟؟ ولا كتبت حاجة عليها القيمه تلمسنا من جوه
ههههههههههههههههههههههه مهو عشان مش في مود الحزن ويارب افضل كده علي طول

عارفين !! امبارح كده وانا في حاله الانبساط والسلطنه دي بتاعت كل يوم من اللي بتبدي من الساعه 1
كالعاده بقلب في الذكريات بقي بحلوها ولا مرها بقي وهاتك يا تذكر فلان ولا فلانه و الموقف الفلاني والعلاني و اييييييييييييه بقي
والله لقيتني عادي مش زي الاول بالعكس بضحك
روحت قايم من الغطا كده وواقف وقولت
ايه انت اتهبلت ولا ايه ؟؟
:mad:
بطل الطريقه دي لحسن تكون بتوهم نفسك
ياتري فعلا بتضحك من قلبك ولا بتداري حزنك و تعبك
ياتري فعلا مش بتتاثر لما بتفتكر ولا لسه جواك احزان وبتضحك بس علي نفسك مش عليها
لقيتني بجد ولا حاسس بحاجة وفعلا بضحك من قلبي ومن حالي كان ايه ودلوقتي ازاي
الفرق الخارجي زي م هو والمكان نفس المكان بس الشعوري اتغير كتيييييييييييييييير

كنت السنه اللي فاتت وبدايه 2008 كاتب جمله في الاستيت بتاعي علي الميل بتقول
2008 another year of sadness so there is no difference
جمله كئيبه كده و لزجه ورخمه لكن الحمد لله السنادي ان شاء الله
2009 the year of happiness for all


بصوا انا حبيت بس اسجل اللحظه دي لانها تفرق معايا كتير و في نفس الوقت بستغل فرصه ان النت كويس و بعيد عليكم كلكم
و يارب نستقبل كلنا السنه الجديده واحنا بنضحك ومبسوطين


اضحك بجد من قلبك

Monday 29 December 2008

هنرسم ابتسامه !!

ازيكم بعد طول غياب :)
هو مش طويل قوي بس كان سببه النت من ناحيه و بعدين مش لاقي حاجة جديده اكتبها من ناحيه تانيه 
المهم ندخل في الموضوع
البوست ده دعوه لاننا نرسم الابتسامه علي وجوهنا
نرسم ابتسامه ؟؟؟؟؟ انت ايه ياعم مش شايف اللي بيحصل في الدنيا ولا مسمعتش اخبار غزه واللي بيجري
لا عارف كل ده و هقولك ترسم ابتسامه ليه
من كام يوم كده بتكلم مع اختي الصغيره وهي من القراء للمدونات و لقتها بتقولي في وقت فاضي ليها لفت علي عالم المدونات وبتقولي خدت كميه احباط محترمه
البوستات اللي بتنزل في معظم المدونات كئيبه و حزينه
طيب ازاي بقي عاوزنا نرسم ابتسامه؟؟
هقولك ..شايف الاحداث اللي حصلت في غزه ؟؟شايف الاسر اللي اتدمرت ؟؟ شايف كام واحد فقد انسان عزيز عليه في لحظه ؟؟شايف وشايف وشايف
اه شايف طيب ازاي بقي ارسم ابتسامه وانا شايف كل ده ؟؟
انا بقولك ترسم ابتسامه لحالك اللي انت فيه 
دمعك ولا حزنك  ولا اكتئابك اللي بتسجله في تدوينه واللي بسببه بتفتكر ان الدنيا خلاص اسودت ميجيش حاجة في اللي حصل واللي بقولك شايفه 
حالك زي الفل جدا بالنسبه للناس دي ...احمد ربنا عليه وارسم ابتسامه علي وشك بجد بتعبر عن رضي الحال والسعاده
دموع الانسان غاليه جدا ومش اي حاجة تخليها تنزل يبقي ليه نهدرها عمال علي بطال علي مواضيع تافهه في حياتنا
تافهه؟؟ 
ايوه لو بصيت ليها وقارنتها باللي حاوليك هتلاقيها تافهه
هقولكم ليه اختي دي  قالت ان معظم التدوينات كئيبه 
معظمها يتضمنه جرح من حبيب او صدمه عاطفيه او فشل في الدراسه او او او
انا مقولتش ان ده ميزعلش ولا يحزن
بس ميكسرش بالشكل اللي بشوفه بالعكس يقوي و يخليك ترسم الابتسامه اللي بقولك عليها دي و تبص لبكره بنظره جديده مليانه امل و ثقه في نفسك وفي ربنا 
بصوا انا مش عارف اوضح قصدي بس يمكن انتوا فهمتوه
انا مبحبش اشوف حد زعلان ومبحبش اكتر اعرف انه زعلان علي حاجة تتعوض وحاجه صغيره وان كانت بالنسباله كبيره بس بالنسبه للي حواليه لو قارنه بيه صغيره
وعارف اني اخر واحد اتكلم علي كده لاني في يوم من الايام كنت كده
بس انا قولت كنت مش لسه زي م انا و عرفت ارسم الابتسامه دي علي وشي
ومبيضيعهاش غير الشديد زي اللي حصل في اليومين اللي فاتوا لاخونا في غزه
ياريت ندعي ليهم كلنا و في نفس الوقت  اللي كلنا حزاني علي الشهداء 
مننساش اننا نحمد ربنا علي كل حال 
وافتكروا بعد كده دايما

Monday 15 December 2008

منفض وافتخر


ازيكم بعد العيد ويارب يكون مر عليكم بسعاده وانبساط و خير و فرح ولحمه و فته وكله
:D
عنوان البوست غريب شويه ؟؟؟ 
عادي م انتوا اتعودتوا مني علي الغرابه 
هههههههههههههههههههههه
المهم
في ايام العيد المبارك اتقالتلي جمله وقفت عندها كتير بفكر
اه والله كتير 
وقفت عندها لحد لما رجلي وجعتني 
ههههههههههه خفه :P 
عشان عارف ناس هتقولي كده :D

المهم اتقالي

انت بقيت منفض للدنيا
انا اذبهليت بصراحه !!! يعني ايه منفض للدنيا مش فاهم
بس اللي قالهالي قالي انك يعني مبقتش زي الاول مهتم بكل حاجة حواليك و مهتم بالناس كلها اللي تعرفك زي بعضها و تخاف عليها زي الاول
برضه مش فاهم ؟ بمعني
يعني انت كنت زمان بتحب تعرف اخبار كل الناس و تحب تطمن عليهم ومهتم بيهم وبتحاول تساعدهم ومشيل نفسك زياده

دلوقتي بقيت منفض يعني تعرف اللي قريب بس
انا بقي ردي كان الاتي 
لازم طبعا بعد مرور سنه تقيله عليا سواء دراسيا ولا نفسيا ولا عصبيا بمشاكل كتييييييييير قوي مكنتش عامل حسابها ولا متوقع انها تحصل اني ابقي كده
معني اني منفض للدنيا لو تقصد بيه  الاتي:

اني ابقي بفكر في راحتي زي م بفكر في راحه الاخريين بعد لما كنت بفكر في راحتهم هما بس و كنت بضيع روحي  وباجي عليها

او اني بقيت بهتم بمشاكلي و بمشاكل صحابي علي قدي
يعني بفكر معاهم لكن مبتاثرش بيها في حياتي عشان اقدر افيدهم في ايجاد الحل ولا اخفف عنهم بدل م نبكي سوا
ولا اني مبقتش اخلي اي مشكله تافهه او حتي مش تافهه تخسرني وقت ولا مجهود زي الاول وبقيت علي قد م اقدر اكبر دماغي مدام اقدر
و اني بزعل علي قد المشكله وافرح علي قد الفرح عشان مشيلش نفسي فوق طاقتها 
واني بقيت بفكر في اللي يخصني ومحرقش دمي علي البعيد و لا اني اشيل الهم بدري
واني عرفت ازاي اعيش وقتي وشبابي دلوقتي بعد لما كنت ملبسه توب ميت حزين مجروح
اني بقيت اضحك و راسم ابتسامه حقيقيه علي وشي ايا كان مصدرها سواء فرح او سخريه او سعاده بس اهي مرسومه ومش مصطنعه عشان اقدر اقابل اي حاجة بنفس مستعده
اني بقيت ماشي بتفرج واتعلم دلوقتي عشان اقدر اتعامل لما اكبر 

اني اقتنعت ان كل شيء باوانه والصبر والامل والجهد مفاتيح النجاح
اني بكل ده رجعت لزماني
اه بجد اصل هشيل هم بدري ليه بزياده ودلوقتي ؟؟؟ انا لسه يدوب 23 سنه لسه ورور وصوغير ايه يعني اكتر مشكله تشغل دماغي غير مزاكرتي و اهلي
ايه حب ؟؟ مش وقته لسه بدرس ولما اخلص وخلاص انا مش عديت 40 

صحاب؟؟ بالتفاهم وطولت البال و تكبير العقل هتتحل اصعب مشكله طول م احنا متفاهمين وبنحب بعض
اهل ؟؟ مش هغيرهم ومهما كنت مختلف معاهم في وجهات النظر هما اهلي مهما عملوا و يا اتفاهم معاهم في الاختلافات يا اتاقلم علي الحياه كده لحد لما يجي الوقت واقدر اغير ده و اهو بكره اكبر و الناس بتتغير و اللي النهارده مختلف معاك بكره انت تتفق معاه
انا منفضتش للدنيا وزهدت فيها و اعتكفت و ربيت دقني  ولا غيره مع ان نفسي ده يحصل وازهد فيها فعلا
ولا بقيت سلبي وسايبها كده 
ولا بقيت مهمل في حق نفسي وحق صحابي واهلي وناسي ومزاكرتي
.ولا قاعد في صومعتي وسايب الدنيا تولع ومليش دعوه بالناس ويكشي تخرب 
لا

بس انا عرفت اوان كل حاجة امتي بعد لما كنت مش عارف
وعرفت من اين تاكل الكتف زي م بيقولوا
و عرفت ازاي اتعامل دلوقتي و ده الفرق دلوقتي بيني وبين صحاب ليا وبين اللي قالي الجمله دي
اني مبقتش بدق علي كل حاجة زياده و مبقتش بحرق اعصابي بزياده
وعرفت كل حاجة تمشي ازاي

لو كل ده معناه اني منفض للدنيا
فانا بعلنها عامله 
انا منفض للدنيا وافتخر
:D



Tuesday 9 December 2008

اقولكم علي سر ؟؟؟

انا عمري م نسيت
:D
او بالاصح عمري م بنسي
واصلا مش مقتنع بموضوع النسيان ده ان يكون ان الانسان ميفتكرش الحاجة ولا كانها حصلت

تفتكروا فعلا احنا بننسي ؟
ولا زي م بعتقد ان حاجات بتجد في حياتنا وتفكيرنا بتاخد مكان حاجات فاتت
فكروا كده معايا تفتكروا ده صح؟؟
يعني لو جيت في يوم وسالتك فاكر الموقف الفلاني هتقولي لا محصلش ولا لا مش فاكر
بس مش مجرد موقف ومر
لا موقف اثر فيك او موقف فعلا وقفت عنه مده
انا كنت فاكر ان الموضوع سهل وان فعلا موضوع النسيان ده حقيقي
بس لقيت ان لما بيبقي ورايا موضوع ما او مشكله بفكر فيها وبنسي حاجة حصلت قبليها او بتناساها لفتره
وبمجرد لما بيزول التاثير او الموضوع او المشكله الحاليه بلاقي نفسي برجع افتكرها تاني ولو علي مثال انها بتمر علي مخيلتي بسرعه
فكره البوست ده في دماغي بقالها حوالي 5 ايام
واول امبارح يوم الوقفه نزلت خرجت مع صحابي روحنا المقطم وكان اول مره نروح والمنظر هناك كان تحفه وقعدنا نضحك ونهزر وفي دماغي فكره البوست ده اني اكتبه لما ارجع
لكن لما رجعت انشغالي بحاجات تانيه نستني اني اكتب
ودلوقتي بعد لما راح تاثير كل حاجة افتكرته وكتبته اهو
نفس الموضوع لما يكون في موضوع حصل زمان
مش بنسي بتشغل لبعض الوقت وبمجرد ما افضي واقعد لوحدي برجع افتكره حتي ولو كان من سنين
اه والله
انا بفتكر موضوع او اتنين من ايام م كنت في اولي وتانيه ثانوي
يعني من حوالي 8 سنين
ومش بتفكرهم مره ولا اتنين وخلاص لا ده كتير قوي بيجوا علي بالي
وغيرهم وغيرهم مواقف وقفت عندها في حياتي و فكرت فيها كتير
يعني مبنساش الحاجة نهائي ولا كانها حصلت في حياتي
احنا صحيح بنتناسي المواقف ونعمل نفسنا انها محصلتش عشان نقدر نكمل ومنفكرش فيها وتقلب علينا حياتنا لو كانت حزينه
او عشان منحسش بالذنب فيها لو كنا غلطانين
بس هل فعلا مبنفكرش فيها ابدا تاني وفعلا بننساها
لو اللي بيحصلي ده طبيعي يبقي اعذروني ده مطلعش سر ولا حاجة وده شيء طبيعي

لكن لو مفهوم النسيان هو اني بنسي ومبفتكرش الحاجة يبقي

انا قولتلكم علي سر

انا فعلا مبنساش ولا عمري بنسي

:)

Sunday 7 December 2008

تاج

كل سنه وانتوا طيبين يا اجمل مدونين و عيد سعيد عليكم اعاده الله عليكم بالخير واليمن والبركات وكل انسان يحقق اللي بيتمناه فيه
:)

من زمان مكتبتش تاجات في المدونات اللي كنت عاملها وفي الاخر وصلني تاج من ابو صلاح اللي كلكم عارفينه و عارفين انه صاحبي الانتيخ
هو مش انتيخ قوي هو انتوخ
ههههههههههههههههههههههههههههه
المهم يلا نبتدي التاج
بسم الله الرحمن الرحيم

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

متهيالي معظم الاجابات هتكون في عصر الرسول عليه افضل الصلاه والسلام او واحد من الخلفاء الراشيدين وخصوصا عمر بن الخطاب
السبب بقي ان الايمان كان اقوي من دلوقتي بكتير والحياه كانت بسيطه والخلفاء والرسول كفايه الواحد يبقي عايش في زمنهم عشان ياثروا في حياته اكتر من دلوقتي و خصوصا لما يكون بيشوفهم

أول أولوية فى حياتك عيلتك ولا شغلك ولا اصحابك؟
العائله ثم العائله

ايه أكتر حاجة بتحبها فى رمضان ؟
لمه الاسره حوالين السفره و الاكل سوا

اوصف أجمل فطار ممكن تفطره؟
اجمل فطار ممكن افطره ممممممممممممممممممممم
مع عيلتي كلها في بيتنا القديم علي الارض و كل خلاتي واخوالي و قرايبي متجمعين و نهزر ونضحك علي بعض و نقعد بعد الفطار نشرب الشاي سوا ده لو في رمضان
لكن فطار عادي بتاع الصبح ده مع اسرتي يوم الجمعه قدام التليفزيون قبل الصلاه و احنا بناكل الفول والبطاطس والبيض المسلوق اللي عملاهم امي ربنا يخليهالي

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
اكيد طبعا هكون عادل
ازاي بقي دي محدش يقدر يقيمها غير الناس اللي بتتعامل معاهم و انك تكون موفي اللي عليك و كل حاجة
الخليفه عمر بكي خوفا من ان تكون دابه تعثرت في الطريق فيسال عنها يوم القيامه عشان ممهدش الطريق ليها
يبقي انا اللي هتاكد اني بعمل كل حاجة بعدل
العدل ده ممكن تحسه في نظره الفريق اللي معاك والناس وحبهم ليك و تعاملهم معاك

مين أكتر اعلامى مصرى بتحترمه ؟
انا مش متابع الاعلام بقالي كتير قوي بس ممكن اقولك محمود سعد و مني الشاذلي

لو ممكن تشتغل شغلانة تانية كنت تتمنى تبقى ايه ؟؟
مهندس وخصوصا مهندس كومبيوتر ودخولي الطب ده بدعوه جدي مش بارادتي
ههههههههههههههههههههه

ايه تانى بلد تتمنى تعيش فيها بعد مصر ؟؟
كله عندي سواء لاني مجربتش غيرها

اوصف ترتيبات اجمل فرح ممكن تحضره ؟
اجمل فرح ممكن احضره فرح اختي او فرح اي حد من صوحابي
ترتيباته يكون بالليل علي مركب كبيره في وسط النيل ويبقي الدي جي مشغل اغاني هاديه طول الفرح ومعظمها سلو و مفيش الرزع اللي بنشوفه
وفي اخر الفرح الناس تروح بيوتها و لا عزاء للعزاب
هههههههههههههههههههههههه

بتراعى كلام الناس والقيل والقال ؟؟ ولو اه او لا قول ليه ؟
اه بس مش قوي
ليه عشان انا مش عايش لوحدي في الدنيا ونظره الناس مهمه لكل شخص
مش قوي ليه لان ساعات كتير بيبقي نظرات الناس غلط و كلامهم مبني علي جهل منهم بالامور وساعتها لو فضلت عليه هبقي انا كمان غلط عشان كده باخد اللي حاسس انه صح و اسيب اللي شايف انه مش صح.

صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
كله في داهيه الا الكومبيوتر لانه بقي صديقي ولو حتي من غير نت اهو بعرف افرغ فيه اللي جوايا
لو هو كمان مش موجود و رجعت لعصر الحمام الزاجل هقضيها سيجه بقي علي الرمل
هههههههههههههههههه

السعادة هى ..؟
اطمئنان النفس والروح

عندك أمل ؟ اسبابك ؟
ايون كبير جدا...اسبابي ان محدش عارف بكره فيه ايه غير ربنا و انت مدام بتتنفس يبقي تقدر تحقق اللي بتحلم بيه

لما بتحب تهرب من كل شئ بتروح فين ؟؟
بفتح الشباك بتاع اوضتي بالليل و اطفي النور واقعد علي السرير و بشغل ميوزيك معينه عندي

امتى اول مرة خدت فيها نفس طويل وقلت ياااه انا فعلا كبرت ؟؟
لما لقيت والدي بيكلمني عن عروسه وبيخطط معايا ازاي اقدر اخطبها ولا اصرف عليها
هههههههههههههههههه بس طبعا موافقتش هههههههههههههههه

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
لا الحمد لله لا انا ولا والدي
شعوري لما بشوف راجل بيشرب سجاير بشمئز من الوضع و بفكر ايه اللي خلاه يعمل كده
اما لو بنت فلا تعليق لان بقي دي قمه الاشمئزاز

بتعرف ايدك اليمين من الشمال ازاى ؟؟
ايدي اليمين علي نفس ناحيه رجلي اليمين

ايه اكتر الة موسيقية بتحبها ؟
الجيتار بس الاسبانيش والبيانو

فى رأيك ليه الذوق والنخوة اتعدموا ؟
هما مش انعدموا هما قلو وليه بقي عشان الاهل مبقوش يزرعوهم في الاطفال من الصغر والشباب بيفكر في نفسه دلوقتي وبقينا في زمن ياعم كبر ..ياسيدي سيبك.. كول يامان
فمحدش بقي يخاف علي الناس زي زمان

ايه الحاجة اللى لو حصلت لك حتبقى سعيد اوى ؟
اني اسمع خبر كويس عن حد من صوحابي وافرح فيهم واني اتخرج بالتقدير اللي عاوزه
وان والدي ووالدتي يبقوا دايما مبسوطين

تحب يبقى عندك ارض زراعية ولا اجنس عربيات ولا كام عمارة ولا فلوس فى البنك ؟
عاوز يبقي عندي عربيه و مزرعه و شويه فلوس بس مش كتير
ههههههههههههههه

البحر ولا النيل ؟
البحر وقت الغروب او الصبح بدري ومبحبش ابصله بالليل

مركب ولا طيارة ؟
مركب

مجنون ولا عاقل ؟
شبه مجنون
هههههههههههههههههههههههههه

تقرا كتاب ولا تتفرج على فيلم ؟
اتفرج علي فيلم بس يكون ليه قصه عدله مش متكرره وياريت لو تكون غامضه او اقرا كتاب بس مش سطحي

تمرر التاج ده لمين ؟
لاي حد عايزه عشان ميبقاش غصب واقتدار

ها يارب اكون جاوبته كويس و اهو حاجة خفيفه عشان العيد

كلوا لحمه بقي كويس
:D


Tuesday 2 December 2008

ياتري هتعرف؟؟؟

ازيكم يا احلي مدونين النهارده حصلت ظاهره فلكيه ان حصل مش عارف ايه في القمر والمشتري والزهره المهم انهم بقوا بالمنظر ده
النقطه اللي علي اليومين دي المشتري واللي علي الشمال دي كوكو الزهره و طبعا الهلال هو القمر


المهم كنت ببص في السما وانا مستمتع بالمنظر وبقول سبحان الله و كعاده اي شخص طبيعي لما بيبص في السما بيتراكم جواه مزيج من الافكار والاحداث والذكريات
انا بقي جه في دماغي موضوع عيش اللحظه اللي صديقي الانتيخ ابو صلاح كاتب عنه في مدونته
مشاهدات

بصراحه اول مره يا صلاح تكتب حاجة تعجبني
هههههههههههههههههههههههه بهزر معاك


المهم بقي هو بيدعو في البوست بتاعه ان كل انسان يعيش اللحظه وميفكرش في الهموم
بصراحه دعوه لراحه البال والتفاؤل ونسيان المشاكل عجباني مع اني مختلف معاه فيها
اصل الانسان مش بمزاجه يقدر يعيش اللحظه ولا لا
مش طبعي يعني اني اقعد افكر في بكره ولا في كمان ساعه ولا نص ساعه
الانسان زي م رديت عليه في البوست لما بتثقل علي الهموم والمشاكل بتتحول اللحظه في حياته لمليون لحظه بيفكر فيها في كذا حاجة
وتداخل الافكار والهموم سوا مبيخلهوش يقدر يعيش اللحظه
انا عارف ان فيه ناس بتقدر تعيش اللحظه زي م صلاح عاوز و بيقدر يفصل بين الهزار والهم وبيعرف امتي يفكر في مشاكله وامتي يستمتع بحياته
بس احنا بشر مش جهاز كومبيوتر بزار لما ندوس عليه يبطل تفكير ويهيس ويضحك ولما يجي وقت التفكير ادوس عليه تاني عشان افكر
بجد صعب الانسان المهموم اللي في دماغه مشكله بتنغص عليه يومه ولا تفكيره انه يقدر يعيش اللحظه زي م صلاح بيقول


طلعت رحله وسط صحابك عشان تفك شويه وتفرفش عارف هتيجي عليك لحظات لما تبقي لوحدك لازم هتفكر في اللي وراك
الانسان مبيقدرش يمنع نفسه من التفكير في احزانه ولا همومه بمزاجه
لازم يبقي فيه حاجة شغلاه عن التفكير
لكن اني ابقي لوحدي وافصل نفسي عن الحقيقه
صعب
انا مثلا مقدرتش في يوم اعيش اللحظه زي م صلاح بيقول طول م ورايا مشاكل او هموم لكن لما طلعت رحله راس سدر من اسبوعين قدرت اعيش اللحظه والنهارده وانا ببص للقمر قدرت اعيش اللحظه عشان مورييش حاجة ودماغي مرتاحه



اتخيل بقي واحد ولا واحده وراه مشاكل في المزاكره ولا مشكله مع خطيبته ولا خطيبها ولا متخانق في البيت وزعلان
هيبص للقمر و يفكر في المشاكل دي
هيطلع يستمتع مع صحابه ويضحك ويهزر و اول لما يبقي لوحده هتتسلل الافكار تااااااااني لراسه و يفكر فيها
وتقلب عليه اللحظه
انت فعلا بتعيش كل لحظه بلحظتها
يعني ايه؟؟


يعني وسط الفرح بتيجي عليك لحظه حزن و هموم فبتعيشها و ترجع تاني تفرح وسط صحابك
وسط الحزن حد بيضحكك بتعيشها وترجع تاني تزعل وتفكر لو راح التاثير ده

يعني انت اصلا بتعيش كل اللحظات بس المهم


هتعرف تعيش انهي لحظه فيهم
زي صلاح م بيقول ولا زي م بيحصل فعلا؟؟؟
المهم بس انك تعيشها صح


:)

Sunday 30 November 2008

ايه رايكم



الاول انا بعتذر للناس عن غلقي مدونتي اهو اي كلام بصوره مفاجأه بس حصلت ظروف كتير خلتني مقدرش اكتب فيها و لقيت الطابع اللي عملتها عشانه مبقاش موجود وعشان كده قفلتها و بعتذر تاني عن ده

دلوقتي بقي انا ريحتكم من التنطيط في المدونات بتاعتي و وجع الدماغ و رجعت المدونه تاني و قسمتها و هكتب فيها كل حاجة بقي عشان يبقي بجد اهو اي كلام
ونقلت كل التدوينات والتعليقات بتاعتكم في المدونه دي

وقفلت خواطر ميت و طابعها و سكيزوفرينا و جمعت التدوينات في مدونه واحده متقسمه في الجنب اهي

انا مش عارف ده الاحسن ولا لا بس بجد عشان حسيت ان افكاري كلها اتفرقت و حبيت اني اجمعها في مدونه واحده والناس تشاركني فيها مش تبقي متوزعه في كذا مكان

وبالمناسبه دي بحب اهدي شكر خاص لصديقه عشان اقترحت عليا اني اسمي تدوينات سكيزوفرينا باسم
جادوفرينيا

عشان اللخبطه عند الناس والخلط بين المرض واللي بتكلم عنه وعشان اللي بيحصل فيها خاص بيا انا مش علي العموم
وكل واحد بقي بتحصله الحاجات دي يسميها باسمه
ههههههههههههههههههههههههههههههه

انا بعتذر مره تانيه و ان شاء الله هتبقي دي مدونتي الوحيده

سلام
:)

Monday 24 November 2008

لحظه تأمل


ازيكم عاملين ايه ؟؟ يارب تكونوا دايما كويسين
:)
من يومين تلاته كده كنت في رحله تبع الكليه لقريه رمادا في راس سدر
من بدايه اليوم و انا حاسس فعلا اني هكون في اليوم ده لوحدي و فعلا انا كنت مخطط اني اقضي اليوم لوحدي وده اللي حصل
المكان هناك كان جميل والميه والهوا والبحر كانوا عاملين اجمل شغل و برغم من اني فعلا كنت طول اليوم مع نفسي الا اني مكنتش لوحدي و طبعا عارفين ليه
دايما كان معايا
ههههههههههههههههههههههههههههههههههههههههههههه
ايوه انا كان معايا
المهم علي وقت الغدا كدا رحت خدت الوجبه ورحت عند المركب القديمه و قعدت اتغدي وببص للبحر و السمك الصغير اللي كان باين من تحت المركب وبسأل نفسي يااااااااااااااااااااااه علي روعه الخلق والخالق يااااااااااااااااه ليه الواحد ميبقاش زي السمكه دي كده ماشي ومش شايل هموم
وهنا انطلقت الموسيقي التصويريه في البلوج مصوحبه بظهور الشخص التاني و راح قايلي
ومين قالك ان السمكه دي مش شايله هموم يابني مفيش حاجة في الدنيا دي ماشيه كده وخلاص
قولتله هموم ايه اللي شايلاها ياعم
قالي مهي السمكه دي اللي شايفها بتعوم و ماشيه براحتها بتدور علي اكل ليها ولولادها و علي مكان تحتمي فيه من السمك اللي عاوز يفترسها
فكرك يعني ان دي مش هموم
بلاش السمكه دي شايف الطير اللي طاير فوق ده اهو ده نفسه كمان شايل نفس الهموم
عارف ان ناس كتير تقولك ياريتني كنت عصفور ولا كنت فراشه عشان يعيش بيطير و سارح من غير هموم
بس حتي دول ليهم هموم و بيحاولوا يتعايشوا معاها وبيها
قولتله بس همومهم دي مش زي همومنا ولا زي حياتنا
قالي مهو كل واحد وعلي حسب بيئته و عيشته و كمان ربنا ادالك عقل تفكر بيه عنهم و يعقل الامور ويوزنها
لكن هما تفكيرهم محدود وعشان كده همومهم دي نفسها محدوده
انا عارف انك بتفكر في سنه مرت عليك و حصلك فيها كتير بس خلاص ياعم انسي و ارجع لحياتك من تاني واحمد ربنا انها جت لحد كده
شايف الشمس دي ؟؟ شايف البحر ؟؟شايف الهو ؟؟ شايف صحابك هناك و الناس حواليك
كل ده بيدور في مدار مرسوم و اللي حصلك مرسوم و مكتوب
انسي الهموم وابتدي من تاني بس متفكرش في اللي فات واتعلم منه
بس اللي فات كان صعب عليا و كل الافكار في دماغي اختلطت و مبقتش عارف افكر
طيب كان صعب ياتري هتفضل عايش فيه ؟؟؟ وتفكر فيه ؟؟؟ لا هيصلح اللي حصل ولاهيرجع اللي فات رتب افكارك و اعرف اخطائك و اعرف ان كل حاجة حصلت ليها حكمه وليها سبب وربنا دايما بيديلك اللي تستحقه
يابني الدنيا لسه حلوه و اللي جاي صدقني احلي بس عاوز صبر و مجهود والمهم انك تكون عرفت عاوز ايه و هتمشي ازاي
ومع اخر كلامه كنت خلصت الغدا ,واختفي مصحوب بنفس الموسيقي التصويريه و رحت علي المارينا اللي في وسط الميه بفكر في كلامه
و مرسوم علي وشي ابتسامه امل و فرح
ومرسومه علي وشه ابتسامه رضي و ثقه

:)

Saturday 15 November 2008

عندما تعجز السكيزوفرينيا


ثواني قبل اي حاجة عشان انا حاسس اني هتشتم في البلوج ده ولا هتضرب من الناس لاني حاسس اني كلامي مش مفهوم عند بعض اللي بيقروا
بعض ايه يا خويا ده كله تقريبا (ايموشن رخم )
والله انا بحاول اقرب الصوره علي قد م اقدر للناس بس مش عارف الناس بتقرا و تذبهل ليه ؟؟

دلوقتي العنوان هشرحه بس بالراحه عليا عشان شايف ناس مكشره و ناس بتقول هوووووووووووف وبعدين بقي احنا اتخنقنا
حاضر حاضر هقول بالراحه ويارب البوست يعدي علي خير
:D
عندما تعجز السكيزوفرينا ياريت الناس تركز و العنوان ميوديش دماغهم لجلاكسي و اعلانتها عندما تعشق الشيكولاته عشان انا عارف
ساعه البطون تتوه العقول

ناس البوست اللي فات قالتلي احنا خدنا كتير عقبال م ربطنا العنوان بالموضوع و مش عارفين لسه العلاقه
طيب يارب اكون موفق في اختيار العنوان المرادي
طيب يعني ايه بقي العنوان
بص يا سيدي انت مش ساعات بينك وبين الشخص التاني اللي عامله جواك وبتستشيره بتبقوا قاعدين كده علي منتصف الليل و فاتح الشباك و بتبص للسما و مشغل ميوزيك هاديه و تيجي تاخد رايه في موضوع او تعرض عليه رايك في حاجة
وتلاقيه في وسط الجو ده راح صدمك بعكس رايك
ويقولك لا ويقولك عكس اللي انت فاكره ولا ناوي تعمله ولا بتفكر فيه
وتقوله ليه؟؟ يوقلك هيحصل كذا وعشان كذا و يرص ليك النتايج و السلبيات و الحاجات المتوقعه لو انت عملت اللي عاوزه ولا فكرت بطريقتك
تقتنع بس برضه عاوز تعمل الموضوع بطريقتك وتفكيرك و برغم ان رايه سليم ميه في الميه بس لازال جواك شعور بعدم الرضا لو اقتنعت برايه

ممممممممممممممممممممم اوضح اكتر ؟؟ حاضر

نفرض انك عاوز تاخد خطوه معينه ايا كانت و خايف و بتتناقش مع نفسك اللي هي الشخص التاني في الخطوه دي
و قالك لا متعملهاش عشان احتمال كبير هيحصل كذا وكذا وكذا
وبالرغم من صحه كلامه الا انك برضه عاوز تاخد الخطوه دي لعل وعسي يكون غلط مع ان الاحتمالات اللي فرضتها نفسك و النتايج نسبه حدوثها اكبر من نسبه خطائه اللي انت فرضتها

دمااااااااااااااااااااااااااااااااااااااغنا ارحمنا ايه اللي بتقوله ده (ايموشن ماسك سكينه )

استنوا طيب هقول مثال يمكن يوضح الصوره :(
نفرض انك عاوز تنزل تشتري تيشرت مثلا وعجبك لونه و لنفرض انه اسود زي البلوج ده و نهاري لو مفهمتوش البوست :(
بس التيشرت ده فيه عيب انه مثلا فيه كتابه بتلمع او اي حاجة
بس الاستايل حلو قوي وبعدين المقاس كمان
يدور بينك وبين نفسك حديث و تسالها تلاقيها تقولك لا متجبوش وشوف حاجة تانيه او خد التاني
تقول بس الاستايل حلو والمقاس واللون و هو ده اللي كان في خيالي بس لولا الكتابه اللي بتلمع دي
ترد عليك وتقولك لو جبته هتلاقي تريقه عليه من الناس و من اهلك ومن صحابك قد كده
تقول هو صح جايز بس يمكن يعجبهم هما كمان
وتمشي و جواك صراع و نفسك تتقسم بين اتنين بس المرادي عكس بعض تماما في الراي و تتمني انك تجيب التيشرت وفي نفس الوقت خايف من النتايج اللي هتحصل نتيجه الخطوه دي والمرادي نصك التاني مفادكش الافاده الكامله برغم ان رايه عكس رايك

المثال عبيط بس عشان اوضح قصدي ايه المهم
هنا عجزت السكيزوفرينيا اللي عملتها ليك كناصح وراشد انها تقنعك زي كل مره
طيب ليه المرادي بالذات؟؟
عشان انت نفسك مجربتش و مشوفتش وعرق المغامره او الفضول بينقح عليك و بيوجعك و مش بينيمك الليل ولازم تشوف بنفسك
وتروح تسال حد تالت و لنفرض صديق ولا اخ ولا اخت وتلاقي رايهم برضه من راي نصك التاني
ويمكن يهدي النقح بتاع الفضول والمغامره عندك بس برضه

هنا انت مقتنع بكلامهم جدا لكنك برضه عاوز تجرب
وفيه فرق هنا انك مقتنع بكلامهم وبرغم كل ده عاوز تعمل اللي في دماغك وانك اصلا مش مقتنع بالكلام
طيب والحل ايه ؟؟
من وجهه نظري انك تعمل اللي انت عاوزه برغم كل اللي حواليك حتي لو كانت النتايج اللي توقعوهالك حصلت بس تبقي انت كمان متوقع النتايج دي مش يبقي مسيطر عليك فكره انهم ممكن يكونوا غلط وتتحمل نتيجه قرارك في النهايه

طيب ليه في اعتقادك يا كابتن؟؟؟
هقولك
لان لما اعمل الشيء وانا متوقع كل النتايج سواء الوحش والحلو لما يحصل ده او ده مش هيفرق معايا قوي
لكن لو توقعت ان صحابي و اخواتي و اهلي يعجبوا بالتيشرت وفجاه لقيتهم كلهم بيقولولي ايه القرف ده لا لا وحش
هتصدم و اقول ياريتني كنت سمعت و ياريتني كنت عملت
لكن من الاول لو متوقع هقول ايه يا سيدي انا كنت متوقع حاجة زي كده و كنت بس عاوز اتاكد و قولت جايز يحصل النقيض وهتبقي صدمتك اخف شويه

ولاني لو معملتوش هيفضل عرق الفضول والمغامره بينقح عليك كتييييييييييير ويعملك صداع

ها فهمتوا حاجة ؟؟؟؟؟
طيب لو فهمتوا حد عنده وجه نظر تانيه ؟؟؟
:)

Monday 10 November 2008

سكيزوفرينيا الموقف


اتفقنا من الاول خالص اننا مش بنتكلم علي السكيزوفرينا من الناحيه الطبيه ولا من ناحيه علم النفس لان السكيزوفرينيا اللي هنا
مش اللي في كتب الطب و لا حاجة لا دي السكيزوفرينيا اللي موجوده جوه كتير مننا وعشان محدش يقول ايه الكلام العبيط ده ولا اللي ملوش اساس من الصحه
انا بتكلم عن نفسي وعن فكرتي اللي بحاول اوصلها في المدونه مش بشرح حاجة موجوده و اعظم علماء النفس بهدلوها تفسير ودراسه
اوك؟؟
انا المرادي عاوز اتكلم عن سكيزوفرينيا الموقف
واحد هيطلع يسألني يعني ايه ؟؟
اقولك انا يعني ايه
سكيزوفرينيا الموقف انا بوصف بيها المواقف اللي بتحصل تستلزم انك تخرج من جواك الشخص التاني اللي اتكلمنا عنه
وتخليه يتناقش معاك في الموقف اللي حصل بس ساعه الموقف نفسه مش بعد كده
هيرجع نفس الشخص يسألني يعني ايه برضه ؟
هحاول اوضحلك
مش ساعات انت بتبقي مع صحابك ولا ماشي في الشارع ويحصل موقف معين يستلزم انك تقف عنده شويه ولو ثواني و تنح وتفكر و تكمل مشي وانت بتسال نفسك اسئله و بتحاول تلاقيلها اجابه؟؟

اه بيحصل
عليك نور اهو هو ده اللي انا اقصده بس بدل م بتمشي و تفكر وتسأل روحك اسئله عاوز تلاقيلها اجابه
بتسأل حبيبك و نصك التاني اللي دايما معاك منين متروح و تاخد وتدي معاه و الناس تفتكرك مجنون وانت ماشي بتكلم روحك
و تلاقي واحد بيبصلك كده و يحرك ايديه جنب ودنه في اتجاه عقارب الساعه و يقولك اصحاب العقول في راحه

برضه لسه مش فاهم ؟؟
ان شاء الله اعدمك لو فهمت حاجة !

طيب بص يا عم هديلك مثال صوغير يمكن يوضح الصوره برغم انه ممكن يكون عبيط بس لعل وعسي الصوره تقربلك يا سيدي

اتفضل قول
افرض انك ماشي في الشارع ولقيت قطه صغيره وصعبت عليك و عاوز تخدها عشان شكلها صعبان عليك وهي في عز البرد وجعانه
و تروح عشان تمد ايديك وتمسكها

تلاقي حبيبك اللي بنتكلم عنه طلعلك قدامك كده مع الموسيقي التصويريه اللي في البلوج ويقولك
انت بتعمل ايه ها ؟؟ انت اتجننت
ترد وتقوله ايه هاخد القطه اربيها واشوفلها مكان تنام فيه
يقولك: ت ــايه؟؟!! تربيها انت قادر تهتم باوضتك ولا بهدومك وترتيبها عشان تربي قطه
وبعدين مامتك ولا باباك هيرضي انك تدخل القطه دي البيت و انت جايبها من الشارع انت مش عامل حساب الموضوع ده
تروح انت متراجع عن فكرتك و موطي راسك وتقوله عندك حق و تسيب القطه وتبعد وبترميها بنظره حزن وشفقه

ويختفي الشخص اللي ظهر تاني مصحوب بنفس الموسيقي التصويريه اللي في البلوج
و تكمل طريقك و انت جواك مقتنع ان اللي عملته ده صح لان فعلا لا اهلك هيرضوا انك تاخد القطه ولا انت اصلا هتقدر ترعاها لانك مش عارف تهتم بحاجاتك بس بالرغم من ده زعلان علي حال القطه

ها فهمت كده انا عاوز اوصل ايه ؟؟؟

ممممممممممم يعني شويه

اللي عاوز اوصله ان مواقف كتير بنتعرضلها بيبقي جوانا مشاعر مكبوته وكلام كتير واحاسيس اكتر و كل اللي غالب علينا الوقت ده هو التساؤل والسكوت
بنسأل روحنا اسئله و بندور علي اجابات ليها و بناقش روحنا في احداث او بنفكر نتصرف ازاي لكن ساكتين مش قادرين نبوح بده الا مع نفسنا ..وساعات بنبقي عاوزين ناخد قرار في وقت سريع مجرد دقايق و بنتكلم مع نفسنا و نفكر عشان ناخد القرار ده
ففي وقت صغير جدا ثواني او دقايق بيخرج الشخص التاني اللي جوانا و يحاورنا و يناقشنا في القرار او الموضوع
و هنا ده اللي بقصده بسكيزوفرينا الموقف

ياتري اللي ماسكني تساؤل من اول البوست فهم ولا لسه ؟؟؟

و ياتري بقي حصلت معاكم سكيزوفرينا الموقف دي قبل كده ولا لسه ؟؟

Sunday 2 November 2008

بدايه السكيزوفرينيا


غيرت البوست اللي كان مكان ده و كتبت بوست جديد
اصل حسيت ان الكلام بصيغه واحد تاني هيبقي متعب و اني اعمله مواقف او األف احداث واظهر فيها الشخصيه
مش هبتبقي محسوسه
وفي نفس الوقت مش عاوز الطابع الكوميدي يطغي عن اللي عاوز اوصله للي بيقرأ
وبرضه مش عاوز الجد يكون اساس المدونه
فقررت اكتب بلساني
ناس كتير قالتلي خليها كوميدي و مواقف مضحكه بين الاتنين
بس محستهاش حسيت هتبقي مصطنعه و محبتش المدونه تبقي قصه بتتقري
انا هكتب عني وعنه والتساؤلات اللي دايما بتدور بينا و علي مواقف حصلت بجد ومواقف هتحصل
وعاوز برضه اشوف رأيكم في اللي اتقال بينا
انا وهو
بدايه الموضوع خالص ابتدي تقريبا من اول لما ابتديت افكر
طول عمري دايما بتكلم مع نفسي وباخد رايها ومش مجرد تفكير بصوت عالي زي م بيحصل عند ناس كتير
يعني تلاقي ابراهيم بيقول انا بكره هروح الجامعه و هروح عن منير و اه هلبس القميص الكحلي و انزل اشتري طلبات البيت و بعدين احود علي مدحت اخد منه الكتاب وارجع
حاجة زي كده و كلنا بنعمل كده في سرنا او بصوت عالي
انا بقي لا بكلم نفسي واتناقش معاها و انا مش فريد من نوعي في كده لا زي م قولت كتير منا بيعمل كده
دايما نفسي دي بحس فيها بالعقل ودايما بتشوف الموضوع من زاويه زي زاويه المعلق بتبقي شايفه كل الاستاد واللاعيبه
و بتعرف تعلق علي كل لعيب
لكن انا ببقي وسط الماتش و بشوف اللي قدامي بس و اللي جنبي لكن اللي ورايا لا
بجد انا ببقي سعيد وانا بتكلم معاها و حتي لو في الاخر طلعت غلط و وبختني وهزقتني
بس بحس بجد ان فيه حاجة بترجعك عن اللي فيه
الصحاب الحمد لله موجودين يعني مش قلتهم ولا عدم وجودهم اللي صنع الموضوع ده
لا الموضوع ده من ساعه م ابتديت افكر بجديه
يعني تقدروا تقولوا مولود بيه
هههههههههههههههههههههههههههههه
متخافوش الموضوع مش جنون
الموضوع حيره في تضارب وعدم توازن
عارفين انا بلجأ للموضوع ده امتي
لما ابقي خلاص زهقان ومش عارف اتكلم مع حد سواء صاحب ولا اخ ولا اخت ولا اهل
مش عشان مش هيفهموني لا
عشان مش قادر اتكلم
وفجاه الاقي نفسي بتكلم مع نفسي و تنزل موسيقي تصويريه زي اللي في المدونه دي
هههههههههههههههههههههه
ويظهرلي الشخص التاني
بس مش قدام عنيا لا جوايا
و اشوفه لو وقفت قدام مرايا
الحاله صعبه صح
هههههههههههههههههههههه
بس مش مهم انا حابب السكيزوفرينا
عشان زي م قولت مش بتاعتهم هما
لا السكيزوفرينيا بتاعتي انا
:))



Wednesday 29 October 2008

سكيزوفرينيا بس مش سكيزوفرينيا


بسم الله الرحمن الرحيم
اول تدوينه في مدونتي الجديده سكيزوفرينيا
و اختياري للاسم غريب بس في نفس الوقت مش غريب
(سامع واحد بيقول اه ده الجنان هيبتدي اهو)
هههههههههههه
لا هقولكم ليه
السكيزوفرينيا في الطب النفسي هي مرض مش فصام الشخصيه وبس لا مرض كبير و ليه اعراض كتير وانواع كتير
و اتعمل عليه افلام كتير من اول فيلم عزت العلايلي و محمود ياسين و سعاد حسني لحد فيلم احمد حلمي الجديد
و اللي انا حاطط الميوزيك بتاعته هنا :D
المهم
الاعراض بتختلف من واحد للتاني وعلي حسب نوع كل حاله يعني ابتداء من الشعور بالاضطهاد و الاحساس بانه انسان مهم او جنون العظمه زي م بيطلق عليه لحد الهلوسه وانه بيسمع ويشوف ناس قدامه عملهم من نسج خياله او يتخيل شخصيات ماتت او يتقمص شخصيه من الشخصيات المشهوره
و مش هدخل في تفاصيل طبيه كتير عشان متزهقوش من اولها
طيب برضه مفهمناش يعني ايه الاسم غريب ومش غريب
الاسم غريب عشان مش بيعبر عن المرض في المدونه ومش غريب لان هتلاقي سبب اختياري للاسم موجود في كتير مننا
انا اخترت سكيزوفرينيا عشان كتير مننا جواه شخص تاني بيتكلم معاه
شخص بياخد رايه في المواقف الصعبه
شخص بيبقي دايما اللي بيعاتب ويوبخ و يفهم ويشرح
و لما بنغلب وتضيق بينا الطرق بنقعد معاه و نخرجه و نتكلم معاه
في ورقه و قلم و لا في مرايه ولا في سرك ولا حتي في الحمام
هههههههههههههههه
(سامع نفس الشخص تاني بيقول ده هيطلعنا كلنا مجانين اهو )
لا يا سيدي متخافش محدش مجنون
هههههههههههههههههههه
طيب هيطلعلي واحد من الدكاتره يقولي ده اسمه في الطب النفسي ازدواج الشخصيه او
double personality
هقوله لا في فرق الازدواج هو ان الشخصيه بتبقي دايما علي النقيض في بعض الاوقات
يعني واحد بيحب يهزر ويضحك فجأه تلاقيه جد و ملوش في الهزار و دايما غضبان
والشخص بيعملها عشان يقدر ينفذ بيها حاجات مش قادره شخصيته الحقيقه علي تنفيذها في الواقع و وقتها بيتلغي الشخصيه الاساسيه
لكن هنا الشخصيه اللي صنعناها من نسج تفكيرنا شخصيه هي هي طبق الاصل بس زي صاحب او صديق بيتكلم ويتناقش لكن فيه نفس الصفات و نفس الطباع و دايما معاه و مصاحباه
و عشان كده اخترت سكيزوفرينيا
بس مش سكيزوفرينيا بتاعتهم هما لا سكيزوفرينيا بتاعتي انا و بتاعتنا كلنا
المدونه زي م وصفتها مواقف من واقع الحياه العصريه ساعات جد ساعات هزار ساعت فرح ساعات انكسار وعلي شكل حلقات ممكن تكون حصلت بجد و ممكن تكون في الخيال
بس الي دايما بيميزها انها دايما بين اتنين
وهما في الاصل واحد
وهي دي السكيزوفرينيا بتاعتي انا
:))


Monday 27 October 2008

ابتدي منين ؟؟

لما تلاقي نفسك فجاه بتحصلك احداث غير منطقيه متتابعه
لما تحس انك لوحدك في دنيا واسعه وبالرغم من ان الناس كتير
لما تحس ان وحدتك دي مش بس في احساسك بعدم وجود اشخاص جنبك لا كمان وحدتك في تفكيرك و مخيلتك
وحتي الانسان اللي صنعته بينك وبين نفسك دلوقتي مش لاقيه
لما تحس ان حاجات كتير قوي قوي حصلت كانت غلط وطيش شباب وبالرغم من ان قراراتك كلها كانت ناتجه عن تفكير عميق
و من كذا ناحيه الا انها غلط
لما تلاقي نفسك بتخسر وبتخسر وبتخسر و مش عارف انت لسه بتخسر ليه
ولما تلاقي ان كل حاجة في حياتك متاجله ومرهونه بوقت
لما تلاقي في النهايه انك كنت بتفكر غلط و تكتشف ان انت مش انت

لازم تقف و تسكت و تعيد حسباتك وتفكر وتغير كل ده

بس قبل كل ده بتسكت وتسال نفسك سؤال

ابتدي منين ؟؟؟؟

ويجيلك رد من جواك ويظهر الشخص اللي صنعته ويرد عليك
بص جواك وهتعرف نافصك ايه
بص جواك
تبص لنقسك تاني و تلاقي الشخص ابتدي يختقي وتقوله استني قولي طيب ايه الغلط ايه الصح ايه اللي المفروض اعمله
ويرد عليك وهو بيبعد بص جواك و هتعرف
ولما تعرف تبقي فهمت
ولما تفهم تبقي ابتديت

:)

Thursday 23 October 2008

م كفايه بقي


كل لما ادخل مدونه حد الاقي خنقه وضيق و قرف وزهق
لما حسيت ان خلاص مبقاش في خير في الدنيا و الافراح انتهت
ايه فيه ايه
فلانه مخنوقه عشان فلانه زعلتها
و فلان مخنوق ان حبيبته سابته
و علان عشان مش عارف ايه
و علانه عشان قرف البيت
ايه الدنيا خلاص مفيهاش غير هم وحزن
وبتتريقوا اني مسمي نفسي ديد مان و عمالين تقولولي اخرج من الحزن اخرج منه ياديد
اخرج ازاي وانا كل اللي حواليا شايفهم بالمنظر ده
اسيب النت والتدوين وانزل الجامعه الاقي الناس بتضحك من غير نفس و كان وراها هم جبال
طيب انا واحد مرت عليا اصعب سنه و ابتديت اخرج منها
صحيح ليها ديول و لسه م خلصتهاش بس بقيت احسن من الاول بكتير و جففت دموعي علي اللي راح وقولت هبتدي من جديد
بس كل لما اعوز ابتدي الاقي اللي حواليا ميشعجش
قولت دماغك يا سيدي انت كده بتضيع عيش حياتك زي م المفروض تتعاش و انت لسه صغير و ابتدي لوحدك حتي لو معاكش حد
الحياه احسن من اللي احنا فيه بكتير و اكبر من ان موقف يكسرنا ولا فر اق يالمنا
دي دنيا فانيه و لو زعلنا فيها بالمنظر ده علي كل حاجة تروح عمرنا م هنمشي خطوه فيها
ولو مشيناها هنمشي خطوه ونستني كتير
خلاص اللي حصل حصل و ارمي اللي فات ورا ضهرك وابتدي يومك جديد
قررت تبتدي يبقي اقطع كل ديل باللي فات و حتي لو لقيت اللي يرجعك ليه مترجعش
يا جماعه احنا لسه في العشرينات و بالمنظر ده
الدنيا مش حب و فراق وخيانه و صحوبيه و بس
الدنيا اكبر من كده بكتيييييييييييييييير
الدنيا انسان و شخصيه و دين و تعليم و بر و طاعه و حب و رضي
فقوا بقي من اللي انتوا فيه و كفياكم بقي بكي
لا عمر البكي رجع اللي راح ولا عمره صلح اللي اتكسر
البكي بيدبل زهره العمر و بيعيشك في الاحزان
خد بايد غيرك وخرجه من اللي هو فيه و لو انت كمان في ضيق دور علي اللي يخرجك منها و متسبش نفسك للحزن والدموع
ولو مفيش اخرج منها لوحدك وهتقدر صدقني بس هتتعب شويه لكن متعش فيها وانت لسه صغير كده
انا مش عارف اقول ايه بس بجد
اقعدوا وفكروا هتلاقوا ان كل ده ولا حاجة
كل ده ملوش لازمه و ان لسه الحياه قدام جايبه و هتبعتلكم اكتر واكتر
ولو فضلنا كده يبقي مش هنعيش لبكره
وهنبقي كلنا اموات

:(

Thursday 16 October 2008

تضارب في توهان


فاضل ساعتين علي الامتحان
و عندي تضارب احاسيس و توهان
لا حاسس اني رايح امتحان ولا حاجة !!
و حاسس اني المفروض ابقي جد عن كده شويه و امسك اي حاجة اقراها مدام فيه وقت
بس مش عارف انا مش عاوز اعمل حاجة
كل اللي عاوزه اني اروح امتحن واخلص من الامتحان بقي والسنه دي
اخر امتحان نظري السنادي و ان شاء الله ربنا يعديه علي خير
بتصل باتنين من صحابي امبارح
واحد بيقولي انا زهقت بقي من المزاكره السنادي وتعبت
والتاني بيقولي كفايه بقي كده ايه ده
ههههههههههههههههههههههههههه
العيال مبقتش مستحمله
انا بقي غيرهم خالص بالرغم اني فعلا زهقت بس عادي عندي
بزاكر وايه يعني
جايز لاني بحاول ان المزاكره متخنقنيش و بقعد علي نت و بهزر مع اهلي و بتفرج علي تليفزيون وكده
بس بجد من بعد امتحان الباطنه االاول معشتش مود الامتحانات بتاعت اخر السنه اللي عامله رعب للناس
وفي لجنه الامتحان مبحاولش افكر في السؤال واعصر دماغي اللي بيجي فيها بكتبه
وممكن اكون عارف السؤال و الاجابه بس مش قادر استعيد المعلومات وبكتب اللي في دماغي و خلاص
عشان اخلص و اخلص
بجد شعور مع انه بيضيع رهبه الامتحانات بس بيطغي علي المزاكره وبيضيع مجهود السنه كله
لما تحل سؤال كده وخلاص و لا تقعد تفتكر ولا حاجة في اللي فات ولو مجاش علي دماغك اللي تكتبه تسيبه
ربنا يستر و افتكر كل الاسئله بقي
ولا مفتكرتش عادي انا عملت اللي عليا و ربنا هيعمل اللي عاوزه يكون
وعلي راي صاحبي اللي قال الدنيا اكبر من سنه 5 و دراسه و تقدير
الدنيا حاجات كتير اهم
نفس و شخصيه ودين وعيله و فكر وناس
و ان شاء الله اظبطهم كلهم

سلام واروح اكوي و البس وانزل للامتحان

ادعولي :)

Wednesday 8 October 2008

صدمه


اتفاجأت من الكلام
و كنت في حاله ذهول مصحوبه بتوهان
صدمه بجد
فجأه اكتشفت انا وصلت لحد فين
و صورتي كانت هتهتز في نظر ناس وتوصل لايه
و مكانتي عندهم كانت هتنزل في يوم
بجد صدمه
بس مش منهم لا صدمه خدتها من نفسي
ايه اللي انا وصلتله ده و ازاي
ايه اللي حصلي وايه اللي خلي حياتي كده
مش معقول اللي راح و لا اللي مشي
مش معقول اني اكون بالشكل ده وحياتي يوصل فيها اللخبطه للدرجادي
لا بقي كفايه قوي كده ده انا كنت نايم
ايه اللي انا عملته واللي حصلي كل السنادي ده
ايه القرف ده ؟؟
حاسس اني كنت ماشي من غير عقل ومن غير تفكير
ايه كنت شارب حاجة ولا دماغي كانت فين
منساق ورا مشاعر و اوهام و تخيلات في عقلي
و نسيت حاجات كتير في النص
و لما ادركتها كان متاخر و مش ضيعت مني شخص ولا اتنين لا كتير و معاهم تفكير و احترام ذات
بجد قرفان من اللي حصل في حياتي السنادي
كان صعب قوي اني اسمع كلام زي اللي اتقال ده بس مجرد انه اتقال او انه يتفكر فيه عرفني انا وصلت لفين
لا بجد بجد مش هكرر اللي حصل تاني
هرجع زي الاول
زي زمان ....زي قبل سنتين
قبل خواطر ميت وقبل ديد مان
ايام م كنت انا
هرجع لفكري القديم و حياتي القديمه
بجد كل اللي حصل مفدنيش قد لما خسرني و بجد مكسبتش منه غير جراح والآم
استعجلت امور كتيييييييييييير و فكرت فيها غلط غلط
و برضه بوظت امور كتير
وضيعت ناس كتير
بس خلاص كل ده كان غلطه و انتهي بصدمه
وبصلح كل ده

:)

Friday 3 October 2008

حدش عنده حل


الاقيش عند حد فيكم حل للي انا فيه
انا مش حالتي وحشه قوي يعني بس المشكله ان جوايا بقي فيه كتله من الحزن مش بتروح ولا بتتغسل ولا بتدفن
بضحك مع صحابي ..مع امي ..مع ابويا ..ومع اخواتي
بس مجرد م ابقي لوحدي الاقي شبح الذكريات و الاحزان نط في خيالي
ساعات في عز الضحك و الهزار والتهييس الاقي نفسي من جوه بتسرح و بتروح في بحر الاحزان من جديد
اوعي تكونوا فاكرين اني عاجبني حالي ولا خلاص ان الحزن بقي جزء مني
ولا حتي عاجبني اسم المدونه ولا اللقب بتاعي
بس برغم انهم مش عاجبني عشان دلالتهم علي الحزن بس انا بحبهمم مش عارف ليه
بس نرجع لموضوعنا
زي م بقولكم كده جوايا كتله من الحزن مش عاوزه تروح
احاول اهرب منها في مزاكره في فيلم في قعده مع اهلي تختفي حبه و ترجع تظهر لما ارجع لوحدي
حتي لو مظهرتش فجاه تاني برضه تلاقي تفكيري بيروح ليها
جايز عودت نفسي علي كده و جايز عشان كان كله ورا بعضه والاحزان متتابعه و انا عيشت فيها فتره
بس انا عاوز اخرج منها ومش عارف
تفتكروا عشان لسه بمتحن يكون ده سبب؟؟؟
تفتكروا بمجرد انتهاء السنه والامتحانات و دخولي سنه دراسيه جديده و زوال ضغط الاعصاب وكله ان الكتله دي هتروح؟؟؟
مش عارف
بس انا مش حابب نفسيي كده
ناس كتير ربنا كرمهم وقدروا يتغيروا ويكلموا و يبقوا احسن من الاول برغم اللي حصلهم السنادي
بس انا السنه لسه م انتهت
مستني تخلص و تروح معاها كل الافكار و كل الاحزان
سنه بجد متعبه من كل حاجة
مشاعر... دراسه ...امتحانات.... صداقه ...حب ....كره ...كله
كتير منا بيقول يا ريت الواحد يرجع صغير تاني و يلعب ويجري وميشلش مسئوليه ولا هم زي دلوقتي
بس انا بقي بقول ياريت ارجع سنه لورا
سنه واحده بس
حاجات كتير كانت اتغيرت
بس طبعا اللي راح مبيرجعش
ولازم ارضي بالواقع بالرغم انه اليم و مر وعمري م كنت افكر انه يوصل لكده
بس لازم ارضي بيه عشان اقدر اكمل
ودايما بقول مهما خسرت برضه كسبت

معلش كبت امتحانات بقي وبخرجه هنا وفيكم استحملوني :D

يلا اشوفكم علي خير


Wednesday 1 October 2008

عاوز اكتب وعاوز اتكلم


ساكت بقالي كتير و مش لاقي اللي اتكلم معاه ..عدي عليا رمضان والعيد دخل و محستش بحاجة فيهم
ساكت و برغم سكوتي بدور علي اي حد اتكلم معاه و مبصدق حد من صحابي يتصل بيا و يكلمني في حاجة غير المزاكره
بضحك مع والدي ووالدتي في محاوله لاني انسي كل اللي انا فيه
بس برضه نفسي اكتب و اكتب واكتب
بس القلم واقف عن الكتابه واللسان عاجز عن الكلام ومش عارف هيتكلم في ايه
هيعيد سرد احزانه من تاني كل شويه اللي زهق الورق منها واللي زهقت الناس بيها
انا نفسي اكتب واتكلم في اي حاجة وفي كل حاجة
نفسي اقعد مع صحابي نتكلم كتيييييير
ظروف امتحاناتي و دراستي مقيداني كتير
ناس كتير محتاجلهم دلوقتي جنبي ومحتاج افضفض معاهم
بس مقدرش اكلمهم ولا اقولهم كل واحد فيه اللي مكفيه
مش هتصل بيه واقعد ارغي و اعطله
بكتفي اني بشغل ميوزيك عايده الايوبي لو كنت غالي و اسمعها كتير وكتير
بتقلب عليا الذكريات و كل اللي فات بس بحس وقتها اني بتكلم مع حد
بقيت عامل زي الاخرس
اللي نفسه يتكلم ويقول علي اللي جواه بس فقدانه النطق مانعه من الكلام
انا نفسي اكتب واتكلم بس السكوت محاصرني
جوه مني كلام كتير بس مش عارف يخرج
مبقتش عارف حاجة بجد
وبقيت ماشي وخلاص
و كل اللي باينلي ان النهايه هتكون انسان جديد عن اللي فات متغير ومفيهوش غير رتوش من القديم
و خايف الجديد يمسح كل اللي معاه دلوقتي و يبقي جديد في كله
لبست توب حزن كتير بعد لما كانت الضحكه والقفشات والهزار مبتفارقنيش
بقيت بتكلم بلغه المحبط المستسلم للايام
عادي ...ماشي ...يلا ...مش فارقه...يا سيدي
بقيت مش متزن فكريا ولا نفسيا
حتي كتباتي في المدونه بعد لما اقراها تاني احس اني بدخل مليون حاجة في بعض و مش مترابطه
حتي البوست ده
بس كل اللي عارفه فعلا اني عاوز اتكلم واكتب واكتب بس مش لاقي اللي اتكلم معاه
ولما بلاقيه بسكت

يلا كل سنه وانتوا طيبين و ربنا يعود عليكم العيد بالخير يارب
:)

Friday 26 September 2008

ومحدش حاسس بيك


محدش حاسس بيا بجد
محدش عارف انا بفكر في ايه
واللي بفكر فيه مينفعش حد يعرفه غيري
محتاج اغير كتير قوي قوي قوي
مينفعش اعيش حياتي قبل لما التغيير ده يحصل
لانه لو محصلش يبقي حياتي ملهاش اي معني
والمشكله ان الكل عليك وفاكر انك بكده بتدوس علي ناس و انك بتدفن نفسك و بتظلم ناس
لكن انا لوحدي اللي عارف انا فيا ايه و محتاج ايه وبحاول اعمل عليه و علي تصحيح وضع كنت عايش فيه
فتره كبيره
بحاول ارجع انسان بحق وحقيقي
كل اللي حصل السنادي بقي بيمر قدامي في شريط ذكريات من الماضي وانتهي
بحاول ابدا من جديد واحده واحده
صحيح بخسر لسه بس في سبيل ان الاقي نفسي بكره
بحاول فعلا الاقي نفسي
بجد
نفسي اللي حاوليا يفهموا ده انا عمري م اتخليت عن صديق ولا قصرت في حقه
عمري م جرحت و قسمت وكسرت
بس الظروف دلوقتي بتفرض عليا ااني الحق نفسي
لازم الحق نفسي واقف وقفه مع نفسي
بخسر تقديري و تعب السنه كلها والمزاكره عشان كل اللي حصل علي مدار السنه دي ولسه ماثر
بحاول ابص لشيء ابعد من مجرد تقدير في سنه من سنين الدراسه
بحاول احقق حاجة
نفسي تتحقق و ساعتها فعلا هتبقي عزائي عن التقدير اللي راح ده
نفسي اللي حاوليا يفهموا ده
انا في مرحله عدم توازن هتستمر كتييييييييييييييييييييييييييييييييييييييييييييير
و مش بطلب من اي حد حاجة
بس محتاج امشي في طريقي لوحدي لحد لما الاقي نفسي


رجعت تاني

بقالي زمن مكتبتش في المدونه دي و بعد لما كانت حاجة كبيره عندي بقت مجرد صفحه علي النت زيها زي مواقع كتير
فكرت كتير اني اقفلها او امسحها و افضل اكتب في المدونه التانيه اهو اي كلام
بس كل مره ارجع في القرار واقول مهي زي م هي اهي سيبها عادي
بس في الاخر لما لقيت ان مدونتي التانيه ابتدت تتحول لخواطر ميت و تاخد نفس طبعها

قفلتها ومسحتها
ورجعت اكتب هنا
مش مهم احزان ولاافراح و لا اكتئاب ولا سعاده
بس المهم اني ابقي مرتاح وانا بكتب ايه
وبجد خواطر ميت كانت اكتر مكان بيريحني وفعلا كويس اني ممسحتهاش
دلوقتي صحيح جو المدونه نفسه هيتغير من بعد لما بقي يتكتب فيها نصوص ادبيه او نثر او مقامات او شعر وغيره
هتبقي مدونه عاديه زيها زي اي مدونه بس هتفضل محتفظه باسمها اكتر من احتفاظها بطابعها الحزين
لان فعلا كل اللي بيتكب فيها خواطر ميت ومتسالونيش عن الاسباب

يلا اشوفكم علي خير واسيبكم في رعايه الله وحفظه
:)

Wednesday 23 July 2008

عدت سنه


النهارده بتم مدونتي سنه
وعدي علي اول بوست ليا فيها سنه
سنه مرت بس مش مجرد سنه
ولا زي اي سنه
سنه فيها تقل الكلام علي الالسنه
سنه فيها انا اتدفنت
وبدموع الحزن اتكفنت
صحيح انا منها اتالمت
بس من احزانها استفدت
و دلوقتي رجعت وفكرت
اني اطوي صفحاتها
وانسي احزانها
بس افتكرت
ان الاحزان مبتنتهيش
احنا بناخد اجازه منها
وهتفضل معانا مدام هنعيش
كتبت فيها احزاني وانكسارتي
وسمعت معايا شكوتي واهاتي
وقت لما كنت في زماني وحيد
مستني اني الاقي الامل من جديد
واديني لقيته من تاني
و راحت ونسيتني احزاني
بس مدونتي هتفضل معايا في فرحي
زي م حضرت معايا جرحي
وكل سنه ومدونتي سعيده
مش زي م كانت دايما
كئيبه
:)

Tuesday 10 June 2008

لحظات



مازلت انتظر تلك اللحظات
لحظات ياتي فيها شعاع امل يجمع ما بي من فتات
يغير حقائق الامور ووقائع المجريات
يخرجني من عالم الاموات
ولكن لا يهرب سريعا بل يبقي
ولو بضع ساعات
ولكن هل سياتي قبل التهام قطار العمر ما تبقي من سنوات
فمازلت اختلس من زماني تلك اللحظات
لحظات فرح ولعب و تنهيدات
واترك احزاني و ندمي علي مافات
و اقف في طريقي وحيدا منتظرا
تلك اللحظات



Friday 16 May 2008

بدون عنوان

افكار كتير في دماغي مختلطه وملخبطه حزن علي شجن علي عدم توازن وندم واعاده حسابات
بس تفكيري مش قادر يقولي ويحددلي حاجات
فقداني اشخاص كتير عزاز عليا في السنه دي سواء خدهم مني الموت او سواء فقدتهم كاحساس برضه ماثر فيا
بس فيه حاجة جوايا بتقولي ده مجرد فقدان
زي اي فقدان لاي شيء بتزعل عليه شوية وترجع لطبيعتك من تاني
بس ليه انا مش حاسس بده وحاسس اني اتكسرت السنادي كتير
ليه حاسس ان فقدانهم مش مجرد فقدان
ليه صورتهم قدامي في كل يوم
ودموعي عليهم هل برضه مجرد بكاء ؟؟؟
وهل الدموع دي هتجف بعد شوية
متهيالي ...جايز.. يمكن... محتمل
بس لحد دلوقتي منشفتش
هل جرحي اللي اتجرحته من اي شخص هيكون برضه زيه زي اي جرح يألمني شوية وبعد كده يخف؟؟
ويكون مجرد جرح
ولا هيسيب علامه جوايا تفضل مع الايام ؟؟؟
يمكن الايام نفسها والسنين والمشاغل تداوي الجراح وتجفف الدموع
او تنسيني احزاني وترجعني لحياتي
ويكونوا كل ده بالنسبالي ذكري واكتب بوست ساعتها ويكون عنوانه


مجرد نسيان



Thursday 17 January 2008

حكاية قلب


من غير كان يا مكان ...ولا لف ودوران..
انا هحكي حكاية ..بس لو قرتوها كملوها للنهاية..
الحكاية حكاية قلب حب ...ويوم م حب اتدهول وطب...
وفضل يسهر الليالي كتير ...و من حبه كان هيجننه التفكير..
مش عارف يقول ويتكلم... ولا يكتم حبه جواه ويفضل يتالم
ازاي يصارحها بحبه الدفين ...وهو لسه مش عارف رايح علي فين

قصر الكلام

القلب قرر ياخد خطوة ...وقال لما اشوفها هكلمها واقولها بكره
حرام افضل كده عايش في عذاب ...واندم في يوم عليها ولاادخل في اكتئاب
وفعلا راح القلب تاني يوم مرعوب...خايف ..متشتت ....مخضوض
وقف قدامها وصارحها باللي فيه....باصص في عنيها والامل مليه
انها تكون هي كمان عاوزاه...زي م هي غايته و كل مناه
لكن الرد جاله وقتها بالانتظار...وساعتها القلب احتار
وسال نفسه الانتظار ليه...وليه برد صريح مرديتش عليه
حس ان في انسان تاني ...بس كدب نفسه وقال لا دي هواجس وشياطين اوهامي
اكيد هي بس اتفاجات من الكلام ...وردها هيجيلي يوم او يومين قدام
لكن عدت الايام والقلب مستني الجواب ....وكالعاده قايم جواه نار وعذاب
لغاية م فيوم ظهرت اوهامه تاني بين ايديه...لكن المرادي كانت بجد وحقيقة قدام عنيه
وعرف ان جوابها بالانتظار ...كان مجرد خوف عليه من جرح او انهيار
ونزلت دموعه بتالم فيه...بس خلاص عرف انها مش ليه
عرف انها لانسان تاني...وحرام يقف في طريقهم ويبقي اناني
و بعد عنهم ودعالهم بالسعاده..ودفن مشاعره جواه كالعاده
ورجع القلب تاني وحيد...بس مش مكتئب لا سعيد
مبسوط و فرحان من جواه ..عشان حبيبته سعيده مع اللي بتتمناه

ودي نهاية الحكايه...ها ...قرتوها للنهاية... ولا اكتفيتوا بس بالبداية
مش هتفرق خلاص اصل البداية زي النهاية

:)