افكار كتير في دماغي مختلطه وملخبطه حزن علي شجن علي عدم توازن وندم واعاده حساباتبس تفكيري مش قادر يقولي ويحددلي حاجات
فقداني اشخاص كتير عزاز عليا في السنه دي سواء خدهم مني الموت او سواء فقدتهم كاحساس برضه ماثر فيا
بس فيه حاجة جوايا بتقولي ده مجرد فقدان
زي اي فقدان لاي شيء بتزعل عليه شوية وترجع لطبيعتك من تاني
بس ليه انا مش حاسس بده وحاسس اني اتكسرت السنادي كتير
ليه حاسس ان فقدانهم مش مجرد فقدان
ليه صورتهم قدامي في كل يوم
ودموعي عليهم هل برضه مجرد بكاء ؟؟؟
وهل الدموع دي هتجف بعد شوية
متهيالي ...جايز.. يمكن... محتمل
بس لحد دلوقتي منشفتش
هل جرحي اللي اتجرحته من اي شخص هيكون برضه زيه زي اي جرح يألمني شوية وبعد كده يخف؟؟
ويكون مجرد جرح
ولا هيسيب علامه جوايا تفضل مع الايام ؟؟؟
يمكن الايام نفسها والسنين والمشاغل تداوي الجراح وتجفف الدموع
او تنسيني احزاني وترجعني لحياتي
ويكونوا كل ده بالنسبالي ذكري واكتب بوست ساعتها ويكون عنوانه
مجرد نسيان
7 comments:
أولا السنه ديه كبيسه
و أعتقد مش إنت لوحدك إللى حاسس إن من أول السنه فيه أحداث على المستويان العام و الشخصى مؤلمه
ولكن خللى عندنا الأمل فى إن شاء الله ستفرج..والحاله تروح
الناس إللى إفتّقدتهم بسبب الموت...اقرالهم الفاتحه...ومحدش عارف إحنا حنموت إمتى يمكن دلوقتى....و انا احب لما اموت اكون مبسوطه وبضحك...مش مكتئبه وزعلانه...فعلشان كده بحاول أتغلب على الحاله اللى عندك لما تجينى زيارة
أما بالنسبه لو اتجرحت من أى شخص....بص اى جرح بيخف على مدار الايام ...إمتى بقى بيسيب اثر؟ ...لما نفضل فاكرينه و ده بالظبط زى أى تعويره لو قعدت تلعب فيها وتأشرها كل ما تكون قشرة ..اكيد حتسيب اثر..لكن لو نسيتها ...وغطتها حتخف و مش حتسيب اى اثر
وبعدين يا عمنا الصوره صراحه اللى انت حاطتها و الجو اللى انت معيش نفسك فيه ده يكئب و يخنق ..و يخليك فى حاله حزن و شجن....دور على حاجه تفرفشك...و معلش حتعدى صدقنى حتعدى ان شاء الله حتعدى بس....لو انت خليتها تعدى
تحياتى و اتمنى انك تخرج من الحاله اللى عندك بسرعه...اما بالنسبه للصوره انا حدورلك على واحد ميت احلى من كده شويه
يالهوى انا كتبت بوست ...اعذرنى سلام
عارف
جاى على الحرج و بتدووس اوى يا ديد
بتفكرنى بحاجه اتكسرت برضوا و لحد دلوقتى اهو عدى سنه الا شهر و مش عارفه الكسر اللى جواى ده هيطيب ولا هيفضل ينزف
الوقت مش بينسى .. ولاعمرة كان بينسى زى ما كنت فاكرة
هو بيخلينا بس نغير نظرتنا للجرح اللى جوانا
بنفتكرة تنزل دمعه ولا بنفتكرة نبتسم ابتسامه فيها امل ان بكرة هيبقى احسن و اتعلمنا من جرحنا
ايييييييييه
دنيااااا
...:)
مش عارفه اقول ايه :(
بس في حاجه واحده بس جت في بالي
لما قراءة البوست بتاعك
افتكرت نفسي السنادي
انا كان جوايا جروح كتيره قوي
وكانت بتوجعني كل يوم لا كانت
احيانا بتزيد بسبب الناس اللي
اتعرفت عليهم السنادي كانو
بيزيدوها بس
ألمها كان بيخف من شهر لشهر
صحيح النسبه مش كبيره بس كانت بتخف
كل حاجه الايام بتخففها.. بتشيل منها
وبردو الايام بتشيل من عمرك
يا جاد خلي الجروح تعلمك
مش تهدمك
انا بعد تفكير اكتشفت ان الحياه
متسواش كل ده ولما فكرت اكتر لقيت
ان احزاني وألامي نقطه في بحر جمب
اللي ناس كتير عايشينو ف حمدت ربنا
ورميت توكالي عليه
صدقني استريحت كتير صحيح مبقاليش
كتير وبتيجي علي لحظات لا ايام كتير
بنام ودمعتي علي خدي بس ده احسن
من الايام اللي عشتها قبل شهر
او اقل
والناس اللي فقدتهم السنادي اللي
مات منهم ادعيلو افتكرو في صلاتك
لو قدرت تتصدق عليه ولو بإزازه
ميه لان افضل الصدقات الماء
واللي لسه عايشين ادعيليهم بالتوفيق
محدش عارف بكره مخبي ايه
اكيد بكرا احسن حط في بالك كده
تعرف الدكتوره مره قالت ليا ان الانسان لما بيقعد يقول انا حزين انا قرفان انا مش طايق انا مش هنجح انا فاشل وغيرو من الكلام السلبي بتقول انو بيجذب ليه الطاقه السلبيه وفي عقله الاوعي بيخليه ينفذ اللي بيقولو
ووالله كلمها اثبتلي اكتر من مره
انو صح
الدنيا والله متسواش ارمي توكالك
علي ربنا ؛)
يا خراشي
تقريبا اللي انا كتبتو
هياخود صفحتين
(اموشن مكسوف من نفسو )
كفاايه كده يلا بااي
ازيك يامحمد
يارلاب تكون بخير
انا مع الاخت الي علقت في الجملة دي
:
أولا السنه ديه كبيسه
و أعتقد مش إنت لوحدك إللى حاسس إن من أول السنه فيه أحداث على المستويان العام و الشخصى مؤلمه
..
انا بقتنع دايما بجملة بتقول :الماضي لا يموت
دايما مهما بعدت عن الذكري الوحشة تلاقيها بتطاردك
الا لو كنت اقوي من الذكري اكيد هتقدر تنساها او علي الاقل تأمن نفسك من اوجاعها
عارف اي حد بيموت تقدر تكون فرحان عشان مات
لو فكرت لحظات بسي هو راح فين وساب ايه
انا اي حد بيموت بطلت احزن عليه بالعكس بحسده لو كان كويس وواثقة انه في الجنة طيب ليه هزعل وهو ساب الدنيا دي
اكيد احساس مر اوي انك تفقد حد بس اقنع نفسك انه هو في امان
بإذن الله ربنا يصبرك
..
ربنا يفك كربك وكربنا بإذن الرحمن
اسفة طولت ومش وقت اطالة خالص متتخنقش من كلامي ارجوك
ربنا يحفظك
علينا أن نسعى للتغير والنسيان لا يمكن أن يطبق إلا إذا غيرنا من حالنا الراهن والنسيان يأتي بعد نشغل أنفسنا بالجديد
حلوة قوى يا ديد مان
انا بندقة
سلام عليكم
الأول إزيك ؟؟
أنا بقالي فترة كبيرة مدخلتش عشان امتحاناتي ... معلش بقى
على فكرة أنا نفس النظااااااااااااام
أنا كل سنة لازم أفقد حد عزيز عليا
مش على طول بالموت
في حاجات كتييييير
المشكلة اني مش بنسى حد الجرح بيفضل معلم فيا بس خلاص جتتي نحست
يلا ربنا يساويها
Post a Comment