ازيكم بعد طول غياب :)
هو مش طويل قوي بس كان سببه النت من ناحيه و بعدين مش لاقي حاجة جديده اكتبها من ناحيه تانيه
المهم ندخل في الموضوع
البوست ده دعوه لاننا نرسم الابتسامه علي وجوهنا
نرسم ابتسامه ؟؟؟؟؟ انت ايه ياعم مش شايف اللي بيحصل في الدنيا ولا مسمعتش اخبار غزه واللي بيجري
لا عارف كل ده و هقولك ترسم ابتسامه ليه
من كام يوم كده بتكلم مع اختي الصغيره وهي من القراء للمدونات و لقتها بتقولي في وقت فاضي ليها لفت علي عالم المدونات وبتقولي خدت كميه احباط محترمه
البوستات اللي بتنزل في معظم المدونات كئيبه و حزينه
طيب ازاي بقي عاوزنا نرسم ابتسامه؟؟
هقولك ..شايف الاحداث اللي حصلت في غزه ؟؟شايف الاسر اللي اتدمرت ؟؟ شايف كام واحد فقد انسان عزيز عليه في لحظه ؟؟شايف وشايف وشايف
اه شايف طيب ازاي بقي ارسم ابتسامه وانا شايف كل ده ؟؟
انا بقولك ترسم ابتسامه لحالك اللي انت فيه
دمعك ولا حزنك ولا اكتئابك اللي بتسجله في تدوينه واللي بسببه بتفتكر ان الدنيا خلاص اسودت ميجيش حاجة في اللي حصل واللي بقولك شايفه
حالك زي الفل جدا بالنسبه للناس دي ...احمد ربنا عليه وارسم ابتسامه علي وشك بجد بتعبر عن رضي الحال والسعاده
دموع الانسان غاليه جدا ومش اي حاجة تخليها تنزل يبقي ليه نهدرها عمال علي بطال علي مواضيع تافهه في حياتنا
تافهه؟؟
ايوه لو بصيت ليها وقارنتها باللي حاوليك هتلاقيها تافهه
هقولكم ليه اختي دي قالت ان معظم التدوينات كئيبه
معظمها يتضمنه جرح من حبيب او صدمه عاطفيه او فشل في الدراسه او او او
انا مقولتش ان ده ميزعلش ولا يحزن
بس ميكسرش بالشكل اللي بشوفه بالعكس يقوي و يخليك ترسم الابتسامه اللي بقولك عليها دي و تبص لبكره بنظره جديده مليانه امل و ثقه في نفسك وفي ربنا
بصوا انا مش عارف اوضح قصدي بس يمكن انتوا فهمتوه
انا مبحبش اشوف حد زعلان ومبحبش اكتر اعرف انه زعلان علي حاجة تتعوض وحاجه صغيره وان كانت بالنسباله كبيره بس بالنسبه للي حواليه لو قارنه بيه صغيره
وعارف اني اخر واحد اتكلم علي كده لاني في يوم من الايام كنت كده
بس انا قولت كنت مش لسه زي م انا و عرفت ارسم الابتسامه دي علي وشي
ومبيضيعهاش غير الشديد زي اللي حصل في اليومين اللي فاتوا لاخونا في غزه
ياريت ندعي ليهم كلنا و في نفس الوقت اللي كلنا حزاني علي الشهداء
مننساش اننا نحمد ربنا علي كل حال
وافتكروا بعد كده دايما
14 comments:
انا متفق معاك
:)
عين العقل
والحمد لله علي اللي احنا فيه الف مره
وياااااااااااااارب انصرهم وفرج عنهم
كربتهم وفرج عنهم كل اللي همه فيه ياااارب
جاد ... مبسوطة ان فيه حد بيتعمله احلال وتجديد
زي حالاتي الفترة دي بشكل عام ..
اتفق معاك في الرأي
الناس دلوقتي بقت ما بتصدق تمسك ورقة وقلم ... وتنشر سلبياتها كأنها سبراي ولازم كل الناس تجربه ...
اما عن غزة ... ليهم ربنا ... وربنا يقدرنا نعمل حاجة تخدم بجد بدل الحاجات اللي مش بتقدم ولا تأخر
على فكرة في حملة تبرع بالدم في كذا مكان وهتيجي العباسية يوم 3 -1 ان شاء الله
احمد 1316
ههههه طيب كويس
سمسه
:)
ريهام
امين يارب العالمين
optimestic
عارفه انا زهقت من البانرات اللي بلاقيها والمواضيع اللي بتقول غزه و و و
عشان كل واحد عارف ان مفيش في ايديه حاجة غير الدعاء ليهم لكن لا هيروح يمسك سلاح ويحارب ولا غيره يبقي نكتفي بالدعاء وبلاش نعمل جلبه علي الفاضي
لا يا ديد
في مشاركة مادية وتبرع بالدم
احنا فعلا مش في ايدنا حاجة
بس التعاطف مش بيخلي القلب يموت
في ناس بتبقى منفضة خاااااااااااااااالص
بس لما بتشوف بانر او بوستر مؤثر شوية بيدعوا
انا مبقولش منروحش نتبرع ولا نقدم تبرعات ماديه سواء فلوس او دم او غيره
بس منتكلمش وخلاص
و ندعوا للناس فعلا لكن مش كلام وبس
فيه ناس مبتصدق تتكلم وتعمل فيها وطنيه وبتفهم في السياسه وتشجب وتدين
وناس تانيه بتدعي بمجرد م بتعرف الحدث زي م بتقولي
ربنا يتولاهم برحمته و يصبرهم
بوست جميل جدا وفعلا الناس محتاجة للابتسامة والامل فى الوقت ده
ممكن تكون بردوا وجهة نظر جديدة .. الحمد لله على نعكة الامان اللى احنا هايشينه بجد الحمد لله
انسانه عاديه
شكرا علي المرور ورايك الجميل
باربي جيرل
الحمد لله :)
Post a Comment