اللي معاهوش ميلزموش

حكمة وقالوها اهلنا زمان
اللي معاهوش ميلزموش
او اللي معندوش ميلزموش
دايما الناس القدام دول بيقولوا حاجات غريبه يا جدع وفي نفس الوقت في الصميم
بصراحه بيني وبينكم عندهم حق
بس هو ياتري هما قالوها ليه ؟ وعلي ايه ؟
تقريبا معظم الافلام القديمه كانت بتتقال فيها الجمله دي او المثل ده علي مثلا موضوع بيع وشرا او جوازه وطلبات اهل العروسه للعريس المبالغه فيها او اشياء من هذا القبيل
لكن انا هنا مش هتكلم عليه من ناحيه البيع والشراء
طيب ايه اللي خلاك ياعم تفكر في المثل ده ؟؟
بصراحه مفيش هو مجرد افتكرت الجمله وقعدت افكر فيها ولاقيت انها بتنطبق علي حاجات كتير و تمام ميه الميه او يمكن عشان قعدت افكر كده انا معايا ايه وعاوز ايه
اصلها مش بس موضوع بيع وشرا لا دي طلعت بتدل ان الانسان اللي ميمتلكش المقومات والشروط اللي تؤهله للحصول علي الشيء يبقي ميستحقوش
مثلا اللي مبيزاكرش مش من حقه انه ينجح
اللي معندوش اراده و عزيمه مش من حقه انه يحقق احلامه
اللي معندوش تدين واخلاق مش من حقه انه يطالب بالجنه
اللي معندوش موهبه الرسم مش من حقه انه يبقي رسام
اللي معندوش مقومات انه يتزوج ويتجمع بالانسانه اللي اختارها علي خير مش من حقه انه يحب
(عارف فيه ناس هتدخل تضربني عشان دي ههههههههه )
وهكذا
يعني قبل لما اطالب بحاجة او احلم بيها لازم ارتب نفسي واهيئها ان يكون بداخلها المقاومات اللي تخليني اقدر احصل عليها او حققها
يعني اجتهد واعمل بجد عشان احسن المستوي اللي انا فيه بما يتناسب مع حجم الحلم او الشيء اللي انا عاوزه
والمستوي هنا مش مقصود بيه مستوي مادي ولا اجتماعي لا مش شرط ممكن يكون مستوي ثقافي او فكري او اخلاقي او ديني او او
المهم اني اعرف ايه اللي محتاج احسنه في حياتي او شخصيتي عشان اقدر احقق اللي عاوزه
صحيح الصوره في البوست المرادي مش متوافقه قوي مع الموضوع لكن عشان برضه فراغ العقل احد الاشياء اللي من ضمن الموضوع
يعني ميبقاش مخي فاضي مفيهوش اي حاجة كده و عاوز ابقي كذا وكذا واحقق كذا وكذا وقاعد اقول ان شاء الله وخلاص
صحيح كل حاجة بمشيئه الله عز وجل لكن برضه محتاج انك ترسم لنفسك حاجة عشان تمشي عليها وتسعي فيها بكل جهد وبمشيئه المولي تحققها يعني ترتب وتحدد اهدافك وتتوكل علي الله مش تتواكل
وهو ده اللي انا قصدي عليه اننا نبحث جوانا ونشوف احنا عاوزين ايه وقبل لما نطالب بيه ولا نحلم بيه ونسرح في الحلم ونلعن الظروف والايام اللي بتبعده عننا نفكر شويه كده مع نفسنا هو احنا نستحق الحلم ده ؟؟ هو احنا نستحق نفوز بيه ؟؟هل عندنا المقومات دي ؟؟ هل فعلا الظروف اللي بتبعدنا عن حلمنا ولا احنا المتخاذلين ؟
فيه ناس عارف هتدخل تعترض علي اللي بقوله وتقولي وايه يعني لما يحلم هو الحلم حرام وفيها ايه يعني يا عم لما واحد يحلم بحاجة كان نفسه فيها
زي واحد علي قد حاله بيحلم انه يبقي حاجة كبيره
ولا واحد غلبان بيحلم ان ولاده يكبروا ويطلعوا مهندسين ودكاتره ويمسكوا مراكز مرموقه في البلد
انا معاكم ان دي احلام بس حتي الحلم المفروض يبقي علي قد الامكانيات اللي معاك عشان تقدر تحققه عشان متصابش بالاحباط واليأس
الراجل اللي علي قد حاله ده وبيحلم انه يبقي حاجة كبيره م يشتغل ويعمل بجد انه يحقق لنفسه مكانه كويسه ويوم بعد يوم يحقق حلمه الكبير
الراجل الغلبان اللي بيحلم بان ولاده يكونوا دكاتره ومهندسين واصحاب مراكز مرموقه يقدر ينفذ الجانب الخاص بيه من الحلم وهو انه يربيهم علي اسس سليمه و يوفر ليهم الظروف السليمه علي قد ما يقدر والباقي عليهم
وهكذا يعني لو بصينا برضه هتلاقي انك حتي لو بتحلم حلم كبير وبتقول ان الظروف هي اللي مش مساعده في تحقيقه لازم برضه تسعي فيه بكل جهدك عشان تحققه وبعد كده يتحقق او ميتحقش المهم تبقي عملت اللي عليك
صحيح ان الظروف ساعات كتيره بتفرض عليك واقع في حياتك غير قابل للتعديل حتي لو اجتهدت فيه وانا مش هنكر ده لكن علي الاقل يكفيك شرف المحاوله وانك تبقي عرفت ان العيب مكنشي فيك والعيب فعلا في الظروف

السؤال بقي اللي كل واحد فينا محتاج يجاوب عليه بعد لما يعرف هدفه وحلمه
ياتري انا ايه اللي محتاجه يكون معايا عشان احقق حلمي ده ؟؟
وياريت لو قدر يوجده معاه ويسعي انه يكون جواه

سلام يا مدونين والي لقاء قريب :)