انا مش وحيد انا معايا وده بالنسبالي كفايه..استنوا ده مش جنان ولا لسعان تفكير..ولا تخاريف ليليه ولا خاني التعبير..انا قاصد كل كلمه في العنوان.. و هتفهموا كويس ان ده مش جنان..شعوري بالوحده مبقاش موجود.. لاني عرفت السكه وعديت الحدود..حدود اليأس والحزن والحيره... و اسوار الكأبه والحقد والغيره..لقيت اللي كنت عاوزه في صديق ..او صاحب او رفيق طريق..بس لقيته معايا زي م العنوان بيقول..وهقولكم ازاي علي طول
دورت جوايا علي الشخص المدفون ..اللي معظم الناس بتفتكره الجنون.. الشخص اللي مستني دايما علي الباب ..ومعظم الناس بتسميه اكتئاب..وقعدت معاه قدام المرايا ..نتكلم ونحكي لبعض الحكايه..حكايه ابتدت زمان ..لما لقيت نفسي لوحدي وسط عالم بالناس مليان ..وبرغم ان ليا اصحاب كتير الا ان شعوري بالوحده كان شعور كبير..وكنت ارجع في نهايه يومي.. احاول اشكي همومي ..بس اشكيها لمين ..بشكيها لرب العالمين ...اصل صوحابي مش موجودين !!.وفي يوم...قومت ووقفت قدام مرايتي..وبصيت فيها لصورتي.. و علي الشخص اللي جواها زعقت وقولت.. انت ياللي جوه اطلعلي براها حالاو دلوقت..لكن خيمت عليا حاله من السكون والصمت.. بعديها بشويه انا اتحركت .. بس مكنتش انا ده كان هو .. بيتحرك في المرايا من جوه..ونفض من علي نفسه تراب النسيان ..وقالي اهلا فينك ؟؟ ده انا مستنيك من زمان..يااااااااااااااه اخيرا افتكرت.. ده انا قولت انك علي صوحباك اقتصرت .. ونسيتني ونسيت اني معاك..وانا منك وجواك ..بصراحه انا منه اتكسفت .. و فعلا بغلطتي اعترفت ..قالي ها مالك يا سيدي عاوز ايه ؟؟..رديت مفيش مجرد شعور بالوحده مقدرش عليه ..كنت محتاج حد اتكلم معاه .. وانا اهو معاك قول علي اللي في قلبك وجواه.. وهتلاقيني دايما بسمعلك ونتكلم... ونتخانق ونجادل ونتعلم ..بس الناس هتفتكرني كده مجنون .. وايه الي في حياتنا مش جنون..بص حواليك و قولي علي اللي بتشوفه ..كدب وخداع و زيف حوالينا بيطوفوا..مشاعر كدابه وتمثيل ..وصعب تلاقي شخص اصيل .. بيني وبينكم انا اقتنعت بكلامه..اصله طول عمره حكيم و اللي في قلبه علي لسانه ..لا عمره كدب عليا ولا حتي جاملني ...ودايما بيقومني ومستحملني..مش مخادع و مصلحجي ..ولا بيفشي اسراري وعامل صاحبي..بيكشفلي عيوبي ويقولهالي ..و يفهمني حاجات مش علي بالي..يعني من الاخر انسان واضح و شفاف..مبنزعلش من بعض حتي لو كنا علي خلاف ..انسان دايما معايا صريح ..ومعظم كلامه بيطلع صحيح..كنت نسيته زمان ومصاحبتوش..لكن بعد كده احساس الوحده محستهوش..جايز يكون كلامي مجنون..وجايز جوه كل واحد منا فعلا انسان مدفون ..المهم انك تدور عليه وتلاقيه ..ولو لقيته امسك فيه ..لان هو اصدق انسان اليك..وبيقولك اللي ليك واللي عليك..
واليوم الي هتلاقي نفسك بقيت معاك ..الوحده هتتشال من جواك
:)
28 comments:
هو مش جنون خالص
لان ده الصح
صحيح بنحتاج صحاب حوالينا
بس الانسان اللي جوانا هو اللي باقي لينا
وهو اللي خايف علينا
لان مهما صاحبت ومهما اتكلمت مع ناس
بترجع برده اخراليوم بتبقي من غيرهم ومافيش غيره هو بس اللي بيسمعك وبيكلمك
ومعاه بس هتوصل للصح ومعاه بس هتتعلم
البوست جميل بصراحه
واسلووب كتابتك فيه حلو اوى
دا عمرة ما يكون جنان
بالعكس دا قمه العقل ..
صح اوى اللى بتقولوا يا ديد ..
بننسى نفسنا و بندور على ناس برا
مع ان نفسنا و اللى جوانا يمكن يكفينا و يكفى غيرنا كمان
على الاقل الواحد مش هيكدب على نفسوا ولا يضحك على نفسوا
بس برضوا ساعات بيبقى لازم نطلع برا عشان نشوف فى ايه برا ..
يعنى انت صاحبت نفسك.. للدرجة دى مش واثق فى اى حد حواليك فقررت تصاحب نفسك!!!!!!!!
سمسمه
فعلا اصدق انسان ليك هو انت
ومهما لفيت وطوفت هترجعله برضه
:)
روز
اكيد انا مقولتش نسيب الصحاب بس برضه نلاقي نفسنا ونحكيلها وقت شدتنا ووحدتنا
باربي جيرل
لا انا مش فقدت الثقه
والبوست مش لازم يكون عليا انا بتكلم ان الناس بتحس بالوحده برغم ان ممكن جواها تلاقي الانسان اللي يصاحبها زي م روز قالت وانا قولت
لكن طبعا انا مفقدتش الثقه في حد والثقه موجوده ولكني فقط قدرت اتغلب علي وحدتي في الايام
جميله اوى يا ديد
وفعلا بتعبر عن احساس كتير بحسه ان اقرب واحده ليا هى انا
واكتر واحده فاهمانى هى انا
واكتر واحده مريحانى انا برضه
:D
بس ده مش غرور والله ........ دى راحه من البشر ووجع دماغهم
مظبوط كلامك دة جدا
الانسان لو متكلمش مع نفسة هيتوة جدا وميعرفش طريقة
جمييييييل اوووووى الموضوع
فعلا لازم كل انسان يصاحب نفسه و الاول يدى ثقته فى نفسه و يحب نفسه عشان يقدر يثق فى الناس و يحبهم
لأ جايز ف يوم تقابل حد يخاف عليك ويحبك وترتاحله اكتر من نفسك
تحفة جدا جدا البوست دا مش عارفة حسيت انا الي بتكلم انا مش لوحدي انا معايا و ربنا كمان معايا هما دول الي بيستحملوني و مش بيفرقوني ولا بيغشوني ..
رغم اني عشرية اوي اوي بس قد ما بيبقى اصحابك حواليك بيجي وقت تبقى انت بس و ربنا الي معاك انا لما ابقى زعلانة من نفسي و اقول حنان دي انا زعلانة منها الناس بتقول بطلو جنان بس زي ما انت قلت دا مش جنان بس احد الطرق الي بتودي الية ..
عندك حق انا من زمان اوى لما كانت الدنيا بضيق بيا ومش لاقية حد يفهمنى وافكر معاه كنت بكلم نفسى كتييييييير كنت بعملها لدرجة انى افتكرت نفسى اتجننت وبطلتها
تحياتى للجدال النفسى الرائع
امممم معاك حق رغم ان الامر ميستغناش عن الاصحاب لان مفيش احلي من رفقه صديق تحبه وترتحله
كاعادة ... جزء من جادوفرينياتك بتعبر عن جزء من الأخرين
تصدق يا جاد بقالي فترة حاسه ان الناس بقت شبه بعضها !!!
في جزء من كلامك ... حسيت انك لقيت نفسك
في جزء تاني ... اتهيألي انك بقيت غني بالنفس دي
بس في الجزء التالت بقى حسيت انك متقوقع جواها ... ومحبوس لما وصفتها انها زي الاكتئاب و الجنون ....
على كل حال ... انت قلت انك كدة صحتك احسن ... ودي محصّلة كويسة :)
الشخص اللي انت لقيته في المراية ... من وجهة نزري الفكيرة للغاية ... بالرغم من وفاؤه ... عنده نظرة سوداوية الى حد ما ... حاول تعملله بارادايم شيفت ... الدنيا ممكن تكون غامقة ... بس مش سودا كحل كدة
اسلوب كتابتك بيفكرني بأسلوب المقامات الحلمنتيشي بتاعة ياسر قطامش ...
ودة في حد ذاته رائع ... عشان انت بتعمل كدة بشكل حلو اوي ...
:)
فكرتني بالصوت الداخلي بتاع رغدة ... الله يمسيها بالخير :)
والله انت عندك حق في كل كلمة
فتافيت صحبتها اللي بجد وبتحكي لها على كل حاجة هي فتافيت برضو وبسسسسسسسس
بوست حلو اوووووووووي
احييييييك عليه بجد رائع
بندقه
مش عارف انا فعلا حسيت ان كل واحد جواه الشعور ده ومحتاجه عشان كده كتبت عنه
Anonymous
مع اني شاكك فيك الا ان فعلا الواحد محتاج الاول يلاقي نفسه و طريقه عشان ميتوهش
شمس وقمر
متشكر علي التعليق والمرور ويارب ميكونش الاخير
زي الهوا
جايز فعلا بس انا مش بدور ولا محتاج لان فعلا مش عندي الاحساس ده دلوقتي
حنان
هههههههههههههه
انتي هتقوليلي ما انا عارف الموضوع اللي عملتيه و قعدتي تكلمي روحك فيه
ههههههههههههههه
زوجه عنيده
تحياتي للتعليق الجميل
وكويس انها طلعت عند كل الناس :)
ريهام
طول عمري عندي حق :P
اوبتمستك
لا خالص مفيش نظره سوداويه ولا حتي حزن في البوست بالعكس ده امل وبدايه من جديد و التخلص من شعور غبي ممكن يسيطر عليك
بس عجبني قوي موضوع الشعر الحلامنتيشي ده ههههههههههههه
فتافيت
كتير قالولي ان البوست بيعبر عنهم مش عارف ليه يمكن عشان كتير بنحتاج انسان وفي وصادق جنبنا و في اي وقت مبنلاقيش غير نفسنا
هههه بقى كدة على فكرة فية موضوع تاني بتاع اللبن المسكوب -_-
بس ما قلتليش يا ديد اية الحل لما ازهق مني ؟؟!
حنان
سبيها فتره كده لوحدها وراقبيها من بعيد و هي هتتعلم و هترجعلك تاني
على فكره ساعات مبنبقاش عارفين نفسنا
بس بيتفرض علينا في حالة لما يحصلنا ظروف نبقى فيها لوحدنا
بنقرب منها ونفهمها اكتر وممكن كمان نحبها ونفضل نبقى معاها مهما الناس كترت من حوالينا
مش جنون اطلاقا :):)
special
اول كومنت ليكي تقريبا هنا منوره المدونه بجد
انا عارف انه مش جنون وانه مصارحه مع النفس وعتاب بس ناس بتفتكره كده وانا بحب اوصل للناس كل حاجة حتي لو متعارض معاهم
بس حاليا انا الجادوفرينيا مش معايا مش عارف ليه مش عارف زحمه مواضيع وامتحانات ولا ايه
شكرا لمرورك يا سبيشيال ويارب متكونش اول واخر مره :D
Post a Comment