بقالي فتره كبيره مش بكتب حاجة هنا و كمان لما بكتب بتبقي حاجات عادية وتهاني وخلاص
الحقيقة اني مش عارف اصلا افكر زي زمان ولا اكتب زي الاول
تفكيري بقي عادي جدا مبيتعداش احداث اليوم الروتينيه اللي بتمر عادي زيها زي اي احداث عند اي شخص مبقتش افكر في اللي حواليا زي زمان ولا بقيت احلل الامور واخرج منها بكذا فكره وكذا حاجة
حتي الجادوفرينيا او الشخص التاني مش لاقيه
دورت عليه كتير ولكنه مش موجود معايا وكأنه رجع لمرايته من تاني و سكن جواها وسابني بقيت اروح اطفي نور الاوضه وافتح الشباك بالليل واقف فيه منتظره يخرجلي مصحوب بموسيقي تصويريه زي بتاعت فيلم اسف للازعاج ولكن برضه مبيخرجش
عشان انا نفسي مخي مبقاش يفكر كتير ويسأل ويستفسر زي الاول
معقول اكون خفيت ؟؟؟
اه اصل انا كنت بعتقد اللي عندي وتفكيري الزايد ضرب من الجنون وناس كانت بتقول اني بصعب الامور وبكلكع الدنيا واني مبخدش الحاجة زي م هي من شكلها لا لازم افصصها
علي فكره علي قد م ان اللي انا فيه حاليا مضايقني لانه سحب مني قدرتي علي التعبير والكتابه هنا علي قد م انا مرتاح ان دماغي بقت ثابته ومستقره
حتي حياتي نفسها مبقتش زي الاول او انا اللي حاسس انها كده
حاسس انها فيها حاجات اتغيرت واهتمامات اتبدلت
تستغربوا لو قولتلكم مبقتش فعلا ازعل علي حاجة زي الاول ؟؟ ولا اضايق روحي واقعد اعيط ليها واشتكي زي زمان ويمكن ده احد اسباب اختفاء الجادوفرينيا
اصل فعلا مفيش حاجة مستاهله نضيع ايام وشهور في البكاء عليها
حاجات قليله قوي قوي في حياتنا وان كانت تبدو كتيره هي اللي تستاهل يتبكي عليها بجد
حاسس ان الدنيا حلوه قوي بس احنا اللي بنصعبها وبقيت ابص لنص الكوبايه المليان بس برضه مبنساش اشوف الجزء الفاضي منها عشان مبقاش عايش في دنيا الاحلام الورديه والنظره الحالمه العابره للواقع الاقرب للمستحيل
ناس كتير بقت تتهمني بالتشاؤم وانا بستغرب جدا دلوقت لده لاني الفتره دي متفائل جدااااااااااااااااا بس عشان لما بيتكلموا معايا بيلاقوني بفكر لكل خطوه بمشيها وبحسبها وهما يقعدوا يقولولي يابني بطل مش كده الدنيا مش بتتاخد كده وانا معاهم بس بحب اكون منظم وعارف هعمل ايه حتي لو جد في الامور امور واتلخبط كل ترتيبي لكن علي الاقل ابقي راسم طريق ولو في مخيلتي
انا عشان اكتب البوست ده عمال امسح واكتب فيه بشكل كبير وده عمره م حصل وانا بدون
علي طول بدون علي البلوج علي طول مش بكتب البوست بره وانقله دلوقت بكتب وبمسح ولا كاني بكتب موضوع تعبير عاوز احسن صياغته للناس او كاني اول مره ادون هنا
كالعاده طبعا هتقولوا علي كلامي اي كلام
بس متنسوش اسم المدونه ايه
اهو اي كلام :D
سلام
:)
17 comments:
ياااااااااه
انت كتبت كلام كتير كتبته من ايام فى مدونتى ومسحته قبل ما انزله
كنت حساها فى الاول مرحله توهان او لا مبالاه
وشويه فراغ نفسى على فراغ ذهنى
بس يمكن فعلا هي مرحله انتقاليه علشان نوصل لدرجه من النضج الواقعى بقى
عموما يكفى انك حاسس انك افضل
وبدأت تستقر على مسمى وملامح محدده للحاله اللى بتسيطر عليك
وبتنظرلها بشكل ايجابى كمان
اكتب اى كلام
المهم انك تكتب
كنت داخله اقولك نفس كلام بندقه
بداية هنيئا لحضرتك التغيير طالما للاحسن وهذا هو المطلوب،،حتى وان كان سيأتي على قدراتك في التعبير بس المهم ان عقلك ارتاح وبالتالي نفسيتك ارتاحت وجسدك ارتاح،،ولو اني اشك انها هتيجي على قدراتك كما ذكرت،،اللي عنده موهبه عمرها مبتروح منه الا لو هوا اللي اهدرها وضيعها منه،،حضرتك بس اتعودت على استخدامها في كل ما يحزنك ولم تتعود على استغلالها في كل ما يفرحك،شويه شويه قدراتك هتتكيف مع الوضع الجديد وهتقدر تبدع تاني والايام بيننا بس اصبر عليها واعتبرها في مقام ابنك
معلش ليا سؤال: التغيير بدأ مع حضرتك قبل يوم الفن داي بتاع دفعتنا ولا قبله؟؟
سؤال غريب لكن فيه هدف من وراؤه هقوله بعد الاجابه باذن الله((ويارب منساش))
lonely girl
كويس اني كتبته هنا اهو كانك انتي اللي كاتباه :)
حقيقي انا فعلا ابتديت انظر بشكل مختلف لحياتي و ربنا يكرم واقدر اعمل اللي مرتبه فيها ويكرمني فيه :)
متشكر للتعليق وعذرا للتقصير في الزياره
بندقه
م انا بكتب يا بندقه اهو اي كلام بس يارب يكون كلام خفيف علي اللي بيقراه مش يدخل يسترخمه ويمشي :)
زي الهوا
منوره المدونه دايما والله بزورك كتير بس زيارات خاطفه كده مش بلحق اكتب كومنتات بس شويه وهرجع اصدعلك المدونه من تاني ان شاء الله :)
د.هبة
كالعاده تعليق حضرتك بينور المدونه
انا فعلا والله نفسي استغل قدرتي اللي كنت بكتب بيها ايام الحزن اني اكتب بيها حاجات تفرح وابسط الناس بيها لكن الموضوع صعب جايز عشان زي م حضرتك قولتي اني اتعودت استغلها بس في الاحزان وربنا يكرم ويبقي في الفرح كمان
اما موضوع التغيير ده فهو بدأ بعد نتيجه سنه خامسه ووصل للذروه من حوالي شهرين تلاته ومازال الحمد لله
لكن الغرض من سؤال قبل ولا بعد الفن داي ده ياريت حضرتك توضحيلي ليه :D
وان شاء الله مش هتنسي وهفكر حضرتك :)
بداية الله يعزك يا د.ديد وربنا يكرمك
انا بس بكرر لحضرتك تاني صدقني قدرتك هتتكيف مع التغيير لكن اصبر عليها ومتستعجلش واديها وقتها،،القدره لم تخلق من حزنك ولكن خلقت فيك وانت اللي استغلتها في الحزن وهناك فرق(يارب يكون مقصدي واضح) وهتقدر بعد عدة محاولات انك تستغلها في الفرح لما عقلك الباطن يبدأ يتكيف ويصدق انك اتغيرت وانك في فرح هيبدا يساعدك على التعبير
اما عن الفان داي فأنا سألت لاني لاحظت بشكل واضح ان حضرتك فيك حاجه متغيره،،ايه هيا معرفش
بس لما شفت حضرتك حسيت ان في شئ مختلف مقدرتش احدده
فربطت اليوم ده بهذا الموضوع لذا سألت،،
لان لو فعلا التغيير وصل مع حضرتك الى حد انه ظاهر عليك امام الناس فبالتالي لازم هيكون وصل لعقلك الباطن وبدأ يستوعبه وتكون عديت شووط طويل،لان مش من السهوله ان الناس تحس بحاجه الا لو العقل والجسم كله صدق الحاله
زي مثلا المكتئب من غير كلام بيبان عليه لان جسمه وعقله صدق انه عايش في جو الكآبه
ربنا يوفق حضرتك ويعينك على التغيير للافضل،،واحلى حاجه ان ننظر للدنيا بنظره تفاؤليه عشان نقدر نعيش فيها،،،ولا مانع من قليل من الكآبه وقت الضروره
بالتوفيق
نصيحه اخيره متواضعه
بداية اقتناع عقلك الباطن بالتغيير ان تغير من اسم ديد مان التشاؤمي وتبدله بشئ مبهج
عشان تصدق نفسك بجد
د.هبة
ربنا يكرمك يارب علي الكلام ده ويارب دايما نكون كلنا في احسن حال وصحه
منوره المدونه دائما بتعليقاتك الجميله :)
d
والله جيت اغير الاسم فعلا الناس مرضيتش وقالت لاا خليه عشان عرفناك بيه :)
ملحوظه
انا برضه
d
بس اتبعت قبل ما اكمل اسمي
عموما برضه انا رايي الشخصي ان حضرتك تغيره وكما تعودوا على الرجل الميت
هيتعودوا على الاسم الجديد
المنتدى كله بيغير في اسماؤه عادي واكتب تحت ملفك الشخصي ديد مان سابقا وبكده هيعرفوك
واتركها لغاية ما يتعودوا على الاسم الجديد
صدقني مهم جدا تلعب على عقلك الباطن بشتى السبل عشان تقدر تقنعه بحاجه غير اللي اتعود عليا من 4 5 6 سنين مثلا
وجزئية الاسم دي منها
وده راي متواضع وحضرتك طبعا صاحب الرأي
د.هبة
والله يا فندم انا فعلا جديا فكرت في كده بس فعلا الاسم عزيز عليا جدا جدا وليه عندي ارتباط باحداث كتير بحب دايما عن طريق الاسم انها تبقي قدامي عشان م اكررهاش واتعلم منها
شكرا يا دكتوره لرايك الجميل وجديا انا فعلا الحمد والشكر لله اقنعت عقلي الباطن بالتغيير والاسم بقي عندي بس مجرد ذكري مش اكتر
نسيت
وقت مستقطع
اة
استني لحظة
او الشخص التاني مش لاقيه
عندي عجز فى معرفه طريقه انا كمان
بتاعي يعني
بس انا بطبيعة الحال مبفصفصش الحياة اصلا
بسيبها كدة تمشى و خلاص وانا ماشية
مشكلتي فى عدم وجود هذا الشخص
اللى كان دايما بيطلع وانا بكتب لنفسى اى حاجة
انه كان بيفصفصلي حياتي انا
مش الحياة فى معناها المطلق
كان بيقولي لأ دة غلط و دة صح
لا مفروض كان دة يحصل
لا اعملي كذا عشان تبقى كويسة
كان بيطبطب عليا اما ابقى كئبانة و يقولي سيبك الدنيا مافيهاش حاجة تسوى
وكان بيهيص معايا اما افرح
وا اما اجيبله حاجة ينتعش
هذا الشخص اختفى اذ فجأة
لما بكتب كلام مبيطلعليش حد من جوايا يناكفني
ولا يقولي ان كلامى غلط ولا يتناقش معايا
يلا خير
تقريبا انا بحس انى مببصش عالكوباية اصلا
وببص على الماية اللى جواها
مش كتير او قليل
مش مالية الكوباية او لا
الماية نفسها كشئ
خير خير
عامة مادام حضرتك مرتاح كدة يبقى اخر فل
بس متسيبهوش لحسن يزعل و يتقمص
ان محدش سأل عليه ولا دور عليه
ربنا يعملك اللى فيه الخير ليك وا لصالح
قول آمين
سلام عليك
نعكشه
عارفه انه لما غاب عني علي قد م ارتحت لكن اضايقت
بس ظهرلي تاني النهارده لما حس اني بعمل حاجة غلط ووقفني ووجهني
بجد ببقي في قمه ساعدتي بحس ان جوايا لسه انسان
لسه بيحس وبيخاف ربنا وبيعرف ايه الصح من الغلط وبيعيد نفسه ويقومها
بجد ياريته علي طول معايا ياريت بجد لان هو نفسي وهو صوت الضمير والعقل الباطن
ومدام لسه عايش وبينبهني عن اخطائي يبقي انا لسه انسان :)
الضمير دة ينام ينام و يصحى يقلب علينا المواجع
ههههههههههههههههه
يلا خير
كويس انه بيرجعلك كل شوية
ربنا يخليكوا لبعض
ومايحرمكش من صفة الانوسية
الانسنة
ان تكون انسان يعني
سلام عليك
Post a Comment